ព័ត៌មានអន្ដរជាតិ

វៀតណាមឃើញពីវិជ្ជមានក្នុងវិស័យវាយនភណ្ឌ បើមើលលើការបញ្ជាទិញពីប្រទេសអតិថិជន

បានផុស

៧ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

សមាគមវាយនភ័ណ្ឌ និងសម្លៀកបំពាក់វៀតណាម (VITAS) បានឱ្យដឹងថា ក្រុមហ៊ុនវាយនភណ្ឌវៀតណាមជាច្រើនបានទទួលបាននូវការបញ្ជាទិញរហូតដល់ដំណាច់ឆ្នាំ ២០២៤ ហើយកំពុងចរចាបន្ថែមទៀតសម្រាប់ការបញ្ជាទិញនៅដើមឆ្នាំក្រោយ ដែលវាគឺជាសញ្ញាវិជ្ជមានសម្រាប់វិស័យវាយនភណ្ឌក្នុងស្រុក។ នេះបើតាមការចុះផ្សាយរបស់កាសែត VnExpress កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្រូវការទីផ្សារនាំចេញសំខាន់ៗសម្រាប់វាយនភណ្ឌរបស់វៀតណាម រួមទាំងសហរដ្ឋអាមេរិក ជប៉ុន កូរ៉េខាងត្បូង និងចិន បានបង្ហាញពីកំណើនវិជ្ជមាន។ គិតតែក្នុងខែកក្កដា ចំណូលពីការនាំចេញវាយនភណ្ឌបានឈានដល់ ៣,៧២ ប៊ីលានដុល្លារ ពោលគឺកើនឡើង ១៧,៦ ភាគរយ ធៀបនឹងខែមិថុនា។

យោងតាមទិន្នន័យគយវៀតណាម ចាប់ពីខែមករាដល់ខែកក្កដា ការនាំចេញវាយនភណ្ឌរបស់វៀតណាម មានទំហំប្រមាណ ២០,៣ ប៊ីលានដុល្លារ ដោយកើនឡើង ៦,៣ ភាគរយ ក្នុងអត្រាប្រចាំឆ្នាំ ពោលគឺធៀបនឹងរយៈពេលដូចគ្នាកាលពីឆ្នាំមុន។

VITAS បានព្យាករថា ការនាំចេញវាយនភណ្ឌរបស់វៀតណាមនឹងបន្តរឹងមាំ ដែលវាជំរុញដោយកំណើនតម្រូវការរបស់ទីផ្សារនាំចូលក្នុងប៉ុន្មានខែចុងក្រោយនៃឆ្នាំនេះ។ កំណើនតម្រូវការនេះ គឺជាផ្នែកមួយនៃពិធីបុណ្យ/ព្រឹត្តិការណ៍សកលធំៗផ្សេងៗ ដូចជាកីឡាអូឡាំពិក ឬរដូវបុណ្យណូអែល ឬឆ្លងឆ្នាំជាដើម។

ប៉ុន្តែបច្ចុប្បន្ន អ្នកជំនាញមើលឃើញថា កំណើនក៏មានការរួមចំណែកផងដែរពីអស្ថិរភាពក្នុងប្រទេសបង់ក្លាដែស ដែលបង្កការបិទទ្វាររោងចក្រជាបណ្ដោះអាសន្នជាច្រើន ហើយជំរុញឱ្យអតិថិជនទូទាំងពិភពលោកស្វែងរកជម្រើសបញ្ជាទិញផ្សេងៗទៀត ដូចជាប្រទេសវៀតណាមជាដើម។

ទោះបីជាយ៉ាងណាក៏ដោយ ខណៈមាននិន្នាការវិជ្ជមានក្នុងការបញ្ជាទិញក៏ដោយ ប្រាក់ចំណេញរបស់ឧស្សាហកម្មវាយនភណ្ឌវៀតណាម នៅតែស្ថិតក្រោមសម្ពាធដោយសារតែការកើនឡើងនៃតម្លៃពលកម្ម។ ប្រាក់ឈ្នួលអប្បបរមាក្នុងប្រទេសវៀតណាម បានកើនឡើង ៧ ភាគរយ ក្នុងខែកក្កដា ដែលជាបញ្ហាប្រឈមសម្រាប់ក្រុមហ៊ុនជាច្រើន។ ក្នុងចំណោមក្រុមហ៊ុនវាយនភណ្ឌចំនួន ៣០ ដែលបានចុះបញ្ជីក្នុងផ្សារហ៊ុនចំនួន២ មានតែប្រហែលពាក់កណ្តាលប៉ុណ្ណោះ ដែលបានរាយការណ៍ពីកំណើនប្រាក់ចំណេញក្នុងត្រីមាសទី២៕