វៀតណាម កើតបាតុភូតចម្លែក អ្នកខ្លះបារម្ភថា ជាប្រផ្នូលមិនល្អ

នៅព្រឹកថ្ងៃសុក្រទី៦ខែកញ្ញាឆ្នាំ២០២៤ ប្រជាជនវៀតណាម មានការភ្ញាក់ផ្អើលយ៉ាងខ្លាំង ក្រោយឃើញរូបភាពបង្ហាញពីពពកដែលមើលទៅហាក់ដូចជារលកយក្សស៊ូណាមិ ដល់ថ្នាក់មនុស្សមួយចំនួនបារម្ភថា នេះអាចជាប្រផ្នូលមិនល្អអំពីគ្រោះមហន្តរាយធម្មជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់គេហទំព័រ Kenh​ 14, បាតុភូតចម្លែកនេះកើតឡើងនៅខេត្ត Nghe An មុនពេលព្យុះកំណាចទីហ្វុង យ៉ាកជី ត្រូវបានគេព្យាករថា នឹងវាយប្រហារប្រទេសវៀតណាមពេញទំហឹង។

គ្រាន់តែរូបភាពទាំងនេះ ត្រូវគេចែកចាយក្នុងបណ្តាញសង្គមភ្លាម ស្រាប់តែជនជាតិវៀតណាមចូលទៅ share និង comment ព្រោងព្រាត ដោយអ្នកខ្លះនិយាយថា វាគ្រាន់តែជាបាតុភូតធម្មជាតិប៉ុណ្ណោះ ប៉ុន្តែមានអ្នកខ្លះក៏បារម្ភដែរថា នេះអាចជាប្រផ្នូលនៃគ្រោះអាក្រក់ក៏ថាបាន។

យ៉ាងណា មិនទាន់មានការបកស្រាយអ្វីទេពីអ្នកជំនាញ ទាក់ទងនឹងបាតុភូតនេះ។

សូមបញ្ជាក់ថា ពាក់ព័ន្ធនឹងឥទ្ធិពលព្យុះយ៉ាកជីនេះដែរ វៀតណាម បានបិទព្រលានយន្តហោះចំនួន៤កន្លែងនិងជម្លៀសមនុស្សជាង១៣ ០០០នាក់ រួចទៅហើយ។

យោងតាមអាជ្ញាធរអាកាសចរណ៍ស៊ីវិលវៀតណាម, ព្រលានយន្តហោះ Van Don, Cat Bi, Noi Bai និង Tho Xuan នឹងត្រូវបិទជាបណ្តោះអាសន្ន ព្រោះតែព្យុះនេះមានកម្លាំងខ្លាំង ​អាចបង្កហានិភ័យនៃគ្រោះមហន្តរាយ គំរាមកំហែងដល់សុវត្ថិភាពនៅអាកាសយានដ្ឋាន។ 

ស្របពេលជាមួយគ្នានោះ ប្រជាជនវៀតណាមជាង ១៣ ០០០នាក់ដែលរស់នៅតាមកន្លែងងាយរងគ្រោះដូចជា Hai Phong, Quang Ninh និង Thai Binh ក៏ត្រូវបានជម្លៀសផងដែរ។

មិនត្រឹមប៉ុណ្ណឹង ទីក្រុង Hai Phong ក៏សម្រេចចិត្តបិទសាលាហើយឲ្យសិស្សរៀនតាមអនឡាញវិញ ដើម្បីធានាសុវត្ថិភាពសិស្ស កុំឲ្យជួបគ្រោះថ្នាក់ពេលធ្វើដំណើរទៅរៀន៕

អត្ថបទ៖ សុខ សុវណ្ណ

ចុចអាន៖ ព្យុះកំណាច យ៉ាកជី៖ វៀតណាម បិទព្រលានយន្តហោះនិងជម្លៀសមនុស្សជាង ១៣ ០០០នាក់