ព្យុះ យ៉ាកជី បណ្តាល​ឲ្យ​មាន​មនុស្ស​ស្លាប់​២៤នាក់និង​របួស​២២៩​នាក់​នៅវៀតណាម 

តាមសេចក្តីរាយការណ៍របស់ VN Express កាលពីថ្ងៃអាទិត្យទី៨ខែកញ្ញឆ្នាំ២០២៤, ឥទ្ធិពលនៃព្យុះទីហ្វុង យ៉ាកជី បានសម្លាប់មនុស្សចំនួនរហូតដល់ទៅ២៤នាក់ និងបណ្តាលឲ្យរបួស២២៩នាក់ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានបង្ការគ្រោះមហន្តរាយធម្មជាតិ បានបញ្ចេញរបាយការណ៍ថា មនុស្សស្លាប់និងរបូសភាគច្រើនគឺដោយសារបាក់ដីសង្កត់និងដើមឈើរលំលើ ហើយក្នុងចំណោមអ្នកស្លាប់ក៏រួមមានទាំងមន្ត្រីប៉ូលិសនៅខេត្ត Quang Ninh ផងដែរ។

ក្រៅពីបណ្តាលឲ្យមនុស្សស្លាប់និងរបួស ព្យុះទីហ្វុង Yagi ថែមទាំងបានបំផ្លាញផ្ទះជាង ៨ ០១០ខ្នង និងពន្លិចកប៉ាល់ខ្នាតតូចចំនួន២៥គ្រឿងនៅខេត្ត Quang Ninh ទៀតផង ខណៈ Hai Phong, Thai Binh, Hai Duong និង Hanoi នៅតែមិនទាន់មានអគ្គិសនីប្រើប្រាស់។

លើសពីនេះ បើនិយាយពីវិស័យកសិកម្មវិញ, ស្រូវជិត ១១០ ០០០ហិកតាត្រូវបានជន់លិច ខណៈដំណាំបន្លែ ​១៧ ៩២០​ហិកតា និង​ដំណាំ​ហូប​ផ្លែ​ ៦ ៩០០​ហិកតា​ត្រូវ​ខូចខាត។

ត្បិតតែព្យុះយ៉ាកជី បានថមថយឥទ្ធិពលទៅហើយក៏ពិតមែន ប៉ុន្តែវៀតណាមព្រមានថា ហានិភ័យនៃគ្រោះទឹកជំនន់និងបំណាក់ដីនៅតែមានកម្រិតខ្ពស់។

យ៉ាងណាមិញ ព្យុះនេះបានបង្ខំឲ្យមនុស្សជិត ៥០ ០០០នាក់ត្រូវជម្លៀសចេញពីបណ្តាទីក្រុងឆ្នេរសមុទ្រវៀតណាម ហើយជើងហោះហើរជាច្រើនត្រូវបានលុបចោល ចំណែកសាលារៀន កីត្រូវបិទជាបណ្តោះអាសន្ននៅក្នុងខេត្តភាគខាងជើងចំនួន១២ រួមទាំងទីក្រុងហាណូយផងដែរ។

សូមបញ្ជាក់ជាថ្មី យ៉ាកជី គឺជាព្យុះទីហ្វុងកាចសាហាវលំដាប់ទីពីរក្នុងឆ្នាំ២០២៤ ហើយបានវិវឌ្ឍខ្លួនឲ្យខ្លាំងទ្វេដង ចាប់តាំងវាយប្រហារភាគខាងជើងប្រទេសហ្វីលីពីនកាលពីដើមសប្តាហ៍នេះ៕

អត្ថបទ៖ សុខ សុវណ្ណ

ចុចអាន៖ វៀតណាម មានមនុស្សស្លាប់និងរបួសសរុប ៨២នាក់ ដោយឥទ្ធិពលព្យុះ យ៉ាកជី