កូរ៉េខាងជើង សាងសង់មូលដ្ឋានទ័ពជើងទឹកថ្មី ដ៏ទំនើប

មេដឹកនាំកូរ៉េខាងជើងលោក គីម ជុងអ៊ុន បានចុះទៅពិនិត្យការដ្ឋានសាងសង់មូលដ្ឋានទ័ពជើងទឹកថ្មីដ៏ទំនើបនៅទីក្រុងTapchon ក្នុងឈូងសមុទ្រ Wonsan ហើយប្តេជ្ញាអភិវឌ្ឍកងកម្លាំងដែនសមុទ្ររបស់ប្រទេសនេះ ឲ្យរឹតតែខ្លាំងថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ KCNA កាលពីថ្ងៃអាទិត្យទី៨ខែកញ្ញាឆ្នាំ២០២៤, លោក គីម បានបញ្ជាក់ច្បាស់ថា ការធ្វើទំនើបកម្មកងទ័ពជើងទឹក គឺជាអាទិភាពបន្ទាន់មួយ ខណៈបរិយាកាសសន្តិសុខក្នុងតំបន់ កំពុងអាប់អួ។

នៅពេលបញ្ចប់ លោក គីម រំពឹងថា ទីតាំងនេះនឹងក្លាយជាមូលដ្ឋានទ័ពជើងទឹកដ៏លេចធ្លោមួយរបស់ប្រទេស ដែលមានន័យថា ជាកន្លែងផ្ទុកនាវាចម្បាំង និងនាវាមុជទឹកទំនើបៗ។

ស្របពេលជាមួយនឹងការសាងសង់មូលដ្ឋានទ័ពជើងទឹកថ្មីនេះ ប្រទេសកូរ៉េខាងជើង ក៏ប្រកាសពីការសង់ទីក្រុងកំពង់ផែថ្មីដ៏ទំនើប ក៏ដូចជាអាវុធទំនើបៗ ដែលនឹងដាក់ឲ្យប្រើប្រាស់នាពេលអនាគតដ៏ខ្លីខាងមុខផងដែរ។

កាលពីចុងឆ្នាំមុន លោក គីម បានបញ្ជាឲ្យឧស្សាហកម្មផលិតអាវុធនិងយោធារបស់កូរ៉េខាងជើង ត្រូវពន្លឿនការត្រៀមលក្ខណៈធ្វើសង្រ្គាម ស្របពេលមានការប្រឈមមុខដាក់គ្នាកម្រិតខ្ពស់មិនធ្លាប់មានរវាងកូរ៉េខាងជើង ជាមួយសហរដ្ឋអាមេរិកនិងសម្ព័ន្ធមិត្តក្នុងតំបន់។

ចាប់តាំងពីពេលនោះមក ទីក្រុងព្យុងយ៉ាង បានបង្កើនការធ្វើតេស្ត​មីស៊ីល ហើយបានបង្អួតអាវុធជាច្រើនប្រភេទដូចជាជើងទម្របាញ់រ៉ុកកែតពហុមុខងារនិងដ្រូន kamikaze ជាដើម។

សូមបញ្ជាក់ថា សហរដ្ឋអាមេរិក កូរ៉េខាងត្បូង និងជប៉ុន បានចោទប្រកាន់កូរ៉េខាងជើង ម្តងហើយម្តងទៀត ចំពោះសកម្មភាពបង្កើនភាពតានតឹងក្នុងតំបន់ ជុំវិញការធ្វើតេស្តមីស៊ីលនិងបង្ហាញសាច់ដុំយោធាយ៉ាងញឹកញាប់។ យ៉ាងណាក្តី ទីក្រុងព្យុងយ៉ាងទទូចថា កម្មវិធីយោធារបស់ខ្លួនគឺគ្រាន់តែដើម្បីការពារខ្លួន ពីសកម្មភាពឈានពានរបស់បរទេសប៉ុណ្ណោះ៕

អត្ថបទ៖ សុខ​ សុវណ្ណ

ចុចអាន៖ កូរ៉េ​ខាង​ជើង ចាប់ផ្ដើម​បង្ហោះ​ប៉េងប៉ោង​សំរាម​ចូល​ដី​កូរ៉េ​ខាង​ត្បូង​វិញ ក្រោយ​ផ្អាក​ជិត​១​ខែ