ស្វាយរៀង​បង្កើត​គណៈកម្មការ​រៀប​ចំ​ការ​​​ប្រកួត​បាល់ទាត់ប្រចាំ​ខេត្ត​​ជា​ផ្លូវ​ការ

បន្ទាប់​ពី​រៀបចំ​កម្មវិធី​ប្រកួត​​ជា​ច្រើន​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​ ​ថ្នាក់​ដឹក​នាំ​សហភាព​សហព័ន្ធ​យុវជន​កម្ពុជា​ខេត្ត​ស្វាយរៀង​បាន​សម្រេច​បង្កើត​គណៈកម្មការ​សម្រាប់​រៀបចំ​ព្រឹត្តិការណ៍​ប្រកួត​នានា​ប្រចាំ​ខេត្ត។

នៅថ្ងៃទី៧ ខែកញ្ញា ឆ្នាំ២០២៤ លោក ម៉ៅ សុនិដេន សមាជិកអចិន្រ្តៃយ៍ នៃគណៈកម្មាធិការ សសយក ខេត្តស្វាយរៀង និងជាប្រធានគណៈកម្មការប្រកួតបាល់ទាត់ ខេត្តស្វាយរៀង បាន​ដឹកនាំកិច្ចប្រជុំផ្សព្វផ្សាយសេចក្តីសម្រេចបង្កើតគណៈកម្មការប្រកួតបាល់ទាត់ ខេត្តស្វាយរៀង និងប្រកាសទទួលស្គាល់សមាសភាព ប្រធាន-អនុប្រធាន សមាជិក-សមាជិកា សរុបចំនួន ២៥រូប នៅស្នាក់ការសហភាពសហព័ន្ធយុវជនកម្ពុជា ខេត្តស្វាយរៀង។

គណៈកម្មការរៀបចំការប្រកួតបាល់ទាត់ ខេត្តស្វាយរៀង មានប្រធាន​១រូប អនុប្រធាន​៥រូប និងសមាជិក១៩រូប ​ដែល​ត្រូវ​បាន​​បង្កើតឡើងក្នុងគោលបំណងដើម្បីដឹកនាំ រៀបចំព្រឹត្តិការណ៍ប្រកួត និងសកម្មភាពកីឡាបាល់ទាត់នានា គ្រប់កម្រិត​ ​ប្រចាំ​ខេត្តស្វាយរៀង ក្នុងក្របខណ្ឌសហភាពសហព័ន្ធយុវជនកម្ពុជា ខេត្តស្វាយរៀង។

សូម​បញ្ជាក់​ថា រហូត​ដល់​ពេល​នេះ ថ្នាក់​ដឹក​នាំ​សហភាព​សហព័ន្ធ​កម្ពុជា​ខេត្ត​ស្វាយ​រៀង​​បាន​រៀបចំ​ការ​ប្រកួត​បាល់ទាត់​ជា​ច្រើន​កម្មវិធីដូច​ជា ពាន​រង្វាន់​ស្វាយរៀង​ខាប់ ពាន​រង្វាន់​ស្វាយរៀង​ខាប់​អាយុ​​១៥​ឆ្នាំ ពាន​រង្វាន់​ស្វាយរៀង​ខាប់​អាយុ​១៨​ឆ្នាំ ពាន​រង្វាន់​ស្វាយរៀង​ខាប់​នារី និង​ពាន​រង្វាន់​ស៊ូបភើ​ខាប់​ជា​ដើម៕

អត្ថបទ៖ វីរបុត្រ