ព័ត៌មានអន្ដរជាតិ

ប៉ូលិសចាប់មេដឹកនាំកំពូលៗក្នុងបក្សលោក Imran Khan ខណៈហិង្សាផ្ទុះខ្លាំង

បានផុស

២ សប្តាហ៍ មុន

នៅ

ថ្ងៃអង្គារ ១០ កញ្ញា ២០២៤

ដោយ

ប៉ូលិសប៉ាគីស្ថានបានចាប់ខ្លួនមេដឹកនាំកំពូលៗជាច្រើននាក់នៃគណបក្សប្រឆាំងរបស់អតីតនាយករដ្ឋមន្ត្រី Imran Khan ដែលកំពុងជាប់ពន្ធនាគារ ខណៈការចាប់ខ្លួននេះកើតឡើងមួយថ្ងៃ បន្ទាប់ពីមនុស្សមួយចំនួនបានប៉ះទង្គិចជាមួយប៉ូលិសក្នុងការតវ៉ាទាមទារឱ្យមានការដោះលែងអតីតនាយករដ្ឋមន្ត្រីរូបនេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១០ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមអ្នកដែលត្រូវបានចាប់ខ្លួនក្រោមការប្រកាន់ពីបទញុះញង់ឲ្យមានអំពើហិង្សានោះ គឺ លោក Gohar Khanប្រធានគណបក្ស Tehreek-e-Insaf នៃប្រទេសប៉ាគីស្ថាន។ វីដេអូដែលបានផ្សព្វផ្សាយតាមអ៊ីនធឺណិត បានបង្ហាញថា ប៉ូលិសចាប់ទាញគាត់ចេញពីរថយន្តមុននឹងវាយខ្នោះបញ្ជូនទៅកាន់ប៉ុស្តិ៍ប៉ូលិស។ ចំណែកមន្ត្រីបក្សកំពូលៗផ្សេងទៀតត្រូវបានចាប់ខ្លួននៅក្នុងការវាយឆ្មក់ជាបន្តបន្ទាប់ជាច្រើនដង ប៉ុន្តែប៉ូលិសមិនបានបង្ហាញពីចំនួនមនុស្សជាក់លាក់ដែលត្រូវបានឃុំខ្លួននោះទេ។

មុនការចាប់ខ្លួននេះ អ្នកគាំទ្ររាប់ម៉ឺននាក់គាំទ្រអតីតនាយករដ្ឋមន្ត្រីដែលត្រូវបានបណ្តេញចេញពីតំណែងនៅក្នុងការបោះឆ្នោតដែលមិនគួរទុក្ខចិត្តបានក្នុងឆ្នាំ២០២២ និងការចាប់ខ្លួនក្រុមមេដឹកនាំបក្សប្រឆាំងនេះ បានបណ្តាលឱ្យមានអំពើហិង្សារីករាលដាល និងការដើរក្បួនតវ៉ាតាមផ្លូវដើម្បីទាមទារឱ្យមានការដោះលែងគាត់។ ការតវ៉ាទាំងនោះភាគច្រើនបានបង្កជាអំពើហិង្សា ដូចជាមានការប៉ះទង្គិចគ្នាជាមួយប៉ូលិសនៅលើមហាវិថីធំៗក្បែរទីប្រជុំជន Sanjrani ជាយក្រុងអ៊ីស្លាម៉ាបាដជាដើម។

ចំណែកនៅឯ Sanjrani មេដឹកនាំគណបក្ស PTI បានថ្លែងទៅកាន់ក្រុមបាតុករនៅក្នុងសុន្ទរកថាដែលបង្ហាញពីការឈឺចាប់ថា នឹងមានការតវ៉ាបន្ថែមទៀត ប្រសិនបើលោក Khan មិនត្រូវបានដោះលែងក្នុងរយៈពេលពីរសប្តាហ៍ខាងមុខនេះទេ។ អ្នកនាំពាក្យរបស់ លោក Khan បានប្រាប់បណ្តាញព័ត៌មានក្នុងស្រុកថា ពួកគេបានបាត់ការទាក់ទងជាមួយលោក Khan និងមិនទាន់ដឹងច្បាស់ថាតើគាត់ត្រូវបានចាប់ខ្លួនឬក៏ចូលទៅលាក់ខ្លួននៅកន្លែងណាមួយនោះទេ។

គួរបញ្ជាក់ថា លោក Khan ប្រឈមនឹងផ្លូវច្បាប់មួយចំនួន ហើយត្រូវបានជាប់ពន្ធនាគារជិតមួយឆ្នាំបន្ទាប់ពីត្រូវបានកាត់ទោសក្នុងសំណុំរឿងពុករលួយ។ គាត់គឺជាគូប្រជែងដ៏សំខាន់របស់នាយករដ្ឋមន្ត្រីបច្ចុប្បន្ន Shehbaz Sharif ហើយនៅតែជាឥស្សរជនដ៏មានប្រជាប្រិយមួយរូប បើទោះបីជាករណីទាំងនេះ ត្រូវបានរងការរិះគន់ក៏ដោយ៕

អត្ថបទ៖ ប៊ុន សុភាព