បំណុល​គ្រួសារ​​ថៃ​ ហក់​ឡើង​ខ្ពស់​ដល់​កំណត់ត្រា​ថ្មី ដោយសារ​បញ្ហា​សេដ្ឋកិច្ច​

កាសែត​បាងកកប៉ុស្តិ៍​បាន​​ចុះ​ផ្សាយកាល​ពី​ថ្ងៃ​អង្គារ​ ដោយ​ស្រង់​ការស្ទង់មតិមួយដែល​​បង្ហាញ​ថា បំណុលគ្រួសារជាមធ្យមក្នុងប្រទេសថៃ បានឈានដល់កម្រិតខ្ពស់បំផុតដោយសារតែកំណើនសេដ្ឋកិច្ចយឺតយ៉ាវ​ ប្រាក់ចំណូលទាប និងថ្លៃរស់នៅខ្ពស់ ហើយប្រជាជនកំពុងមានបញ្ហាក្នុងការទូទាត់​បំណុល​របស់​ខ្លួន​។​

ការ​ស្ទង់មតិ​​របស់​សាកលវិទ្យាល័យសភាពាណិជ្ជកម្មថៃដែលបានធ្វើឡើងនៅដើមខែកញ្ញានេះ​ និង​ចេញ​ផ្សាយ​កាល​ពី​ថ្ងៃ​អង្គារ​ បាន​បង្ហាញ​ថា គ្រួសារ​ថៃ​មួយ​ត្រូវ​ជាប់​បំណុល​ជា​មធ្យម​ ប្រមាណ​ ៦០៦ ៣៧៨ បាត​ ដោយ​កើន​ឡើង​ប្រមាណ​ ៨,៤ ភាគរយ​ ធៀប​នឹង​ឆ្នាំ​មុន​។ នេះគឺ​ជាតួលេខខ្ពស់បំផុត រាប់​ចាប់តាំងពីការស្ទង់មតិបានចាប់ផ្តើមធ្វើ​ឡើងជា​លើក​ដំបូង​ក្នុងឆ្នាំ ២០០៩។ ​

ការ​ស្ទង់​មតិ​ដដែល​បានរកឃើញថា ​​បំណុលពីការផ្តល់ប្រាក់កម្ចីជាផ្លូវការរួម​ចំណែក​ប្រមាណ ៦៩,៩ ភាគរយ (ធ្លាក់ចុះពី ៨០,២ ភាគរយ កាល​ពី​ឆ្នាំ​មុន​) ​ខណៈ​​បំណុល​ពីការផ្តល់ប្រាក់កម្ចីក្រៅផ្លូវការរួម​ចំណែក​ ៣០ ភាគរយ។ ​សមាមាត្រនៃ ប្រាក់កម្ចីក្រៅផ្លូវការបានកើនឡើង ដោយសារតែប្រជាជន​ថៃ​កាន់តែច្រើន ឈានដល់ដែនកំណត់ទទួល​បាន​ឥណទានរបស់​ខ្លួន​ពីស្ថាប័ន​​ហិរញ្ញវត្ថុ​​ ដែលបណ្តាលឱ្យពួកគេងាកទៅរកប្រាក់កម្ចី​ក្រៅ​ផ្លូវ​ការ​។

ការ​ស្ទង់​មតិ​បន្ថែម​ថា​ ​អ្នក​ជាប់​បំណុល​ជាច្រើន មានប្រាក់ចំណូលមិនគ្រប់គ្រាន់ក្នុងការចំណាយ និង​ត្រូវ​ប្រឈមមុខ​នឹង​ភាពអាសន្នផ្នែកហិរញ្ញវត្ថុ និងថ្លៃរស់នៅខ្ពស់​ (ការ​ចំណាយ​ប្រចាំថ្ងៃ​ខ្ពស់​) ដែលមិនរំពឹងទុក។ ការសងបំណុលប្រចាំខែជាមធ្យមគឺ​ ១៨ ៧៨៧ បាត/ខែ​ ដោយ​កើនឡើងពី ១៦ ៧៤២ បាត​/ខែ​ កាល​ពី​ឆ្នាំ​មុន​ ខណៈ​អត្រា​បង់​ប្រាក់​យឺត​យ៉ាវ​មាន​រហូត​ដល់​ ៧១,៦ ភាគរយ​។ ​

គួរ​គូស​បញ្ជាក់​ថា​ បំណុល​គឺ​ជា​​បន្ទុក​​សេដ្ឋកិច្ច​ដ៏​ធំ​មួ​​​យ​សម្រាប់​ប្រទេស​ថៃ​ ដែល​ប្រឈម​នឹង​​កំណើន​សេដ្ឋកិច្ចយឺត​យ៉ាវ និង​ខ្សោយ​ជាង​ប្រទេស​ក្នុង​តំបន់​ផ្សេ​ងៗ ជាមួយ​នឹង​អត្រា​ការ​ប្រាក់​កម្ចី​ខ្ពស់​ និង​ការ​នាំ​ចេញ​ខ្សោយ​ នៅ​ពេលការ​ស្ទុះ​ងើប​ឡើង​វិញ​នៃ​​សេដ្ឋកិច្ច​ចិន​ ដែល​ជា​ដៃគូពាណិជ្ជកម្មកំពូលរបស់ថៃ​ ស្ថិត​នៅ​ក្នុង​ល្បឿន​យឺត​យ៉ាវ​។

កន្លង​មក​ រដ្ឋាភិបាល និងធនាគារកណ្តាលថៃ បានសម្តែងការព្រួយបារម្ភចំពោះបំណុលគ្រួសាររបស់ប្រទេសចំនួន ១៦,៤ ទ្រីលាន​បាត​ ឬ​ស្មើ​នឹង​ ៩០,៨ ភាគរយ​ ធៀប​នឹង​ផលិតផលក្នុងស្រុកសរុប (GDP) ​គិត​ត្រឹម​ចុងខែមីនា ឆ្នាំ ២០២៤ ដែល​ធ្វើ​ឱ្យ​ថៃ​ស្ថិត​នៅ​ក្នុង​ចំណោម​ប្រទេស​អាស៊ី​កំពូល​ៗ​ដែល​មាន​បំណុល​គ្រួសារ​ខ្ពស់​។ ​ធនាគារកណ្តាលបានគូសបញ្ជាក់ពីវិធានការជាបន្តបន្ទាប់ដែលខ្លួនសង្ឃឹមថា នឹងធ្វើឱ្យសមាមាត្របំណុលគ្រួសារធ្លាក់ចុះដល់ ៨៩ ភាគរយ នៃ GDP នៅឆ្នាំក្រោយ៕