ព័ត៌មានអន្ដរជាតិ

រុស្ស៊ី បណ្ដេញមន្ត្រីទូតអង់គ្លេស៦នាក់ ចោទពីបទចារកម្ម និងសកម្មភាពបំផ្លិចបំផ្លាញ

បានផុស

៤ ខែ មុន

នៅ

ថ្ងៃសុក្រ ១៣ កញ្ញា ២០២៤

ដោយ

Chheang

ទីភ្នាក់ងារសន្តិសុខ FSB របស់រុស្ស៊ី បាននិយាយនៅថ្ងៃសុក្រថា ខ្លួនបានដកហូតការទទួលស្គាល់មន្ត្រីការទូតអង់គ្លេស ៦នាក់នៅទីក្រុងមូស្គូ ដែលសកម្មភាពរបស់ពួកគេមានជាប់ពាក់ព័ន្ធនឹងការងារចារកម្ម និងសកម្មភាពបំផ្លិចបំផ្លាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

FSB ដែលជាទីភ្នាក់ងារស្នងតំណែងដ៏សំខាន់បន្ទាប់ពី KGB របស់សូវៀត បានប្រកាសថា ខ្លួនមានឯកសារដែលបង្ហាញថានាយកដ្ឋានការិយាល័យបរទេសរបស់ចក្រភពអង់គ្លេសនៅទីក្រុងឡុងដ៍ ដែលទទួលខុសត្រូវចំពោះអឺរ៉ុបខាងកើត និងអាស៊ីកណ្តាល កំពុងសម្របសម្រួលនូវអ្វីដែលហៅថា «ការកើនឡើងនៃស្ថានភាពនយោបាយ និងយោធា» ហើយមានភារកិច្ចធ្វើយ៉ាងណាឲ្យរុស្ស៊ីទទួលបរាជ័យក្នុងសង្គ្រាមប្រឆាំងនឹងអ៊ុយក្រែន។

សេចក្ដីថ្លែងការណ៍របស់ FSB បានឲ្យដឹងថា៖ «អង្គហេតុដែលបានលាតត្រដាងបានផ្តល់ហេតុផលដើម្បីពិចារណាពីសកម្មភាពរបស់អ្នកការទូតអង់គ្លេសដែលត្រូវបានបញ្ជូនទៅទីក្រុងមូស្គូដោយនាយកដ្ឋានរដ្ឋាភិបាល ថាជាការគំរាមកំហែងដល់សន្តិសុខរបស់សហព័ន្ធរុស្ស៊ី»។

មន្ត្រីការទូតទាំង៦រូបរបស់អង់គ្លេស ត្រូវបានគេរាយឈ្មោះនៅតាមទូរទស្សន៍រដ្ឋរុស្ស៊ី ព្រមទាំងបង្ហាញរូបថតរបស់ពួកគេផងដែរ។

FSB បានសង្កត់ធ្ងន់ថា រុស្ស៊ីនឹងស្នើឲ្យមន្ត្រីការទូតអង់គ្លេសផ្សេងទៀតត្រឡប់ទៅប្រទេសរបស់ពួកគេវិញឲ្យបានឆាប់ ប្រសិនបើពួកគេត្រូវបានគេរកឃើញថាបានចូលរួមនៅក្នុងសកម្មភាពស្រដៀងគ្នានេះ។

អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បាននិយាយថា សកម្មភាពរបស់ស្ថានទូតអង់គ្លេសនៅទីក្រុងមូស្គូបានដំណើរការជ្រុលហួសពីអនុសញ្ញាការទូត ហើយបានចោទប្រកាន់ថា អង់គ្លេសបានធ្វើសកម្មភាពដោយចេតនាដើម្បីបង្កគ្រោះថ្នាក់ដល់ប្រជាជនរុស្ស៊ី៕

ដោយ៖ ឈាង