ព័ត៌មានជាតិ

ចុងខែនេះ រោងម៉ាស៊ីនកិនស្រូវមួយក្នុងស្រុកថ្មគោល ប្រកាសនាំចេញអង្ករក្រអូប ១០០ កុងតឺន័រ ទៅទឹកដីបារាំង

បានផុស

១ សប្តាហ៍ មុន

នៅ

ថ្ងៃចន្ទ ១៦ កញ្ញា ២០២៤

ដោយ

ក្រុមហ៊ុន ស៊ីធីរ៉ាយស៍ អ៉ីមផត អិចផត ខូ អិលធីឌី (City Rice Import Export Co., Ltd) ដែលក្រុមហ៊ុននាំចេញអង្ករធំជាងគេនៅក្នុងស្រុកថ្មគោល ខេត្តបាត់ដំបង បានឱ្យ «កម្ពុជាថ្មី» ដឹងថា នៅចុងខែកញ្ញា ឆ្នាំ២០២៤ នេះ ក្រុមហ៊ុនតៀមនាំចេញអង្ករក្រអូបប្រមាណ ១០០ កុងតឺន័រ ទៅកាន់ទឹកដីឯនាយសមុទ្រក្រោមការគ្រប់គ្រងរបស់បារាំង New Caledonia។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧកញ៉ា ឡាយ ឈុនហួ អគ្គនាយក ក្រុមហ៊ុន ស៊ីធីរ៉ាយស៍ អ៊ិមផតអិចផតខូអិលធីឌី ដែលជាក្រុមហ៊ុននាំចេញអង្ករធំ១នៅស្រុកថ្មគោលបានឱ្យដឹងថា ខាងក្រុមហ៊ុនរបស់លោកបានស៊ីញ៉េកុងត្រា ជាមួយភាគីទីផ្សារប្រទេសបារាំង ដោយធ្វើការនាំចេញអង្ករក្រអូបសរុបប្រមាណជិត ៥ ពាន់តោន។ ក្នុងនោះបាននាំចេញ ១០០ កុងតឺន័រ រួចទៅហើយ នៅក្នុងឆមាសទីមួយនៃឆ្នាំ ២០២៤ ហើយក៏គ្រោងនឹងដឹកជញ្ជូន ១០០ កុងតឺន័របន្ថែមទៀត។

ជុំវិញការនាំចេញអង្ករទៅកាន់ទឹកដីកោះក្រោមការគ្រប់គ្រងរបស់បារាំង ឧកញ៉ា ឡាយ ឈុនហួ បានគូសបញ្ជាក់ថា «ការពិតទៅខាងរោងម៉ាស៊ីនរបស់លោក ត្រូវនាំទៅកាន់កោះនៃប្រទេសបារាំងច្រើនជាងនេះ ប៉ុន្តែដោយសារប្រឈមនិងបញ្ហាមួយចំនួន។ ទី១ ដោយសារដើមរដូវច្រូតកាត់ កសិករប្រមូលផលមិនទាន់បានច្រើន ជាហេតុធ្វើខាងរោងម៉ាស៊ីនមានកង្វះខាតអង្ករមិនអាចនាំចេញគ្រប់គ្រាន់តាមតម្រូវការ និងទី២ គឺមានការពន្យារពេលខ្លះ ដោយសារចន្លោះពីខែមីនា ដល់ខែឧសភា នៅក្នុងទឹកដីកោះ New Caledonia មានភាពចលាចល និងបាតុកម្មខ្លះៗទើបធ្វើឱ្យមានការអាក់ខានបែបនេះ។

យ៉ាងណាមិញ លោកឧកញ៉ា ឡាយ ឈុនហួ បានអះអាងថា នៅចុងខែកញ្ញានេះ ខាងរោងម៉ាស៊ីននឹងធ្វើការនាំចេញអង្ករក្រអូប ១០០ កុងតឺន័រ បន្ថែមទៀតទៅកាន់ទឹកដី New Caledonia ទៅតាមកុងត្រាដែលនិយាយគ្នា។

ម្ចាស់រោងម៉ាស៊ីនកិនស្រូវរូបនេះបញ្ជាក់ថា ភាពជោគជ័យក្នុងការនាំចេញអង្ករទៅកាន់ទឹកដី New Caledonia របស់ប្រទេសបារាំងគឺជាសក្ខីភាពមួយចំពោះការខិតខំប្រឹងប្រែង និងការលះបង់ក៏ដូចជាទំនាក់ទំនងដ៏រឹងមាំរបស់ក្រុមហ៊ុនជាមួយកសិករនិងដៃគូ។ លើសពីនេះទៀត តាមរយៈការជំរុញការនាំចេញនេះ មិនត្រឹមតែរួមចំណែកដល់ការរីកលូតលាស់នៃឧស្សាហកម្មអង្កររបស់កម្ពុជាប៉ុណ្ណោះទេ ក៏បានបង្ហាញពីសក្តានុពលកសិកម្មរបស់ប្រទេសកម្ពុជាទៅកាន់ពិភពលោកផងដែរ៕