មកស្គាល់ពីកសិដ្ឋានចិញ្ចឹមគោយកទឹកដោះចំនួន៤ ក្នុងប្រទេសកម្ពុជា

ប្រិយមិត្តខ្លះប្រាកដជាបានដឹង និងបានស្គាល់ខ្លះមកហើយអំពីកសិដ្ឋានចិញ្ចឹមគោយកទឹកដោះ ដែលមាននៅក្នុងប្រទេសកម្ពុជាយើង តែក៏មានប្រិយមិត្តខ្លះក៏មិនពុំទាន់បានស្គាល់ច្បាស់ថា តើប្រទេសកម្ពុជានាពេលបច្ចុប្បន្នមាន កសិដ្ឋានចិញ្ចឹមគោផលិតទឹកដោះចំនួនប៉ុន្មាន? និងមានទីតាំងនៅកន្លែងណាខ្លះ?

ថ្ងៃនេះ! កម្ពុជាថ្មី សូមនាំអារម្មណ៍ប្រិយមិត្តទាំងអស់គ្នាឱ្យស្គាល់កសិដ្ឋានចំនួន៤ ដែលកំពុងតែបានអភិវឌ្ឃខ្លួន និងកំពុងតែបានផ្គត់ផ្គង់ទីផ្សារទឹកដោះគោស្រស់ ក្នុងប្រទេសកម្ពុជានាពេលបច្ចុប្បន្ន។

១. កសិដ្ឋានចិញ្ចឹមគោយកទឹកដោះគិរីសួគ៌ ស្ថិតនៅភ្នំតាម៉ៅ ស្រុកបាទី ខេត្តតាកែវ ​មានសមត្ថភាព​ផលិត​ទឹកដោះគោស្រស់ចន្លោះ​ពី ១ ២០០០-១ ៥០០០ លីត្រក្នុងមួយថ្ងៃ។ កសិដ្ឋាននេះ សមត្ថភាពផលិតទឹកដោះគោស្រស់រហូតដល់ ១ ៥០០០ ពាន់លីត្រក្នុងមួយថ្ងៃ​ និងផ្គត់​ផ្គង់​បានប្រមាណ ១៥ ភាគ​រយ​​​នៃចំណែកទីផ្សារកម្ពុជា។

កសិដ្ឋានគិរីសួគ៌ ជា​កសិដ្ឋាន​ខ្នាតធំថ្នាក់ជាតិដំបូងគេនៅកម្ពុជា ដែលមានសង្វាក់ផលិតកម្មទំនើប មានសមត្ថភាព​ផលិតទឹកដោះគោសុទ្ធស្រស់មានគុណភាពខ្ពស់ និងជំនួយផ្នែកអាហារូបត្ថម្ភ។

កសិដ្ឋានគិរីសួគ៌មានចំនួនគោសរុបជិត ១ ពាន់ក្បាល (៩២៨) និងមានគម្រោង បង្កើនចំនួន​គោយក​ទឹក​ដោះឱ្យដល់ ៣ ពាន់ក្បាល ដើម្បីបង្កើនផលិត​កម្ម​ទឹកដោះគោស្រស់ និងផលិតផលទឹកដោះគោ ដោយ​វេចខ្ចប់ជាកញ្ចប់ដាក់ក្រដាសតូចៗ ​សម្រាប់​ផ្គត់ផ្គង់នៅតាមសាលារៀន។

២. កសិដ្ឋានចិញ្ចឹមគោយកទឹកដោះ មូមូ ហ្វាម ស្ថិតនៅក្រុងអរិយក្សត្រ ខេត្តកណ្ដាល កសិដ្ឋានអាចមានលទ្ធភាពផលិតទឹកដោះគោស្រស់ បានជិត១ពាន់លីត្រ ក្នុងមួយថ្ងៃ សម្រាប់ផ្គត់ផ្គង់ក្នុងទីផ្សារក្នុងប្រទេសកម្ពុជា។

កសិដ្ឋានចិញ្ចឹមគោយកទឹកដោះ មូមូ ហ្វាម បានបើកដំណើរតាំងពីឆ្នាំ ២០០៨ មកម្ល៉េះ បច្ចុប្បន្ននេះ កសិដ្ឋានមានផ្ទៃដីជាង ៦ហិកតា និងមានគោសរុបចំនួន២០០ក្បាល ដែលជាមធ្យមកសិដ្ឋានអាចផលិតបានទឹកដោះគោស្រស់ ជិត១ពាន់លីត្រ ក្នុងមួយថ្ងៃ។

៣. កសិដ្ឋានចិញ្ចឹមគោយកទឹកដោះ តេជោសែន​ឫស្សី​ត្រឹប​ គឺជា​ផលិតផល​ខ្មែរ​​​សុទ្ធ​ ១០០ ​ភាគរយ ​ត្រូវ​បាន​​​ផលិត​ពី​​កសិដ្ឋាន​មួយ​​កន្លែង​​​​ស្ថិត​នៅ​​ឃុំ​ឆែប ២ ស្រុក​ឆែប ​ខេត្ត​ព្រះវិហារ​​ ​ក្នុង​តំបន់​ឧទ្យាន​​ជាតិ​​​​​រាជ​បណ្ឌិត្យ​សភា​កម្ពុជា​​តេជោ​ឫស្សីត្រឹប​ នៅ​លើ​វិសាលភាព​ផ្ទៃ​ដី​កសិដ្ឋាន​សរុប​​​ ចំនួន ៧០ ហិកតា​ ។ ​

កសិដ្ឋានចិញ្ចឹមគោយកទឹកដោះនេះ ត្រូវបានបង្កើតឡើងនៅឆ្នាំ ២០១៤ ដែលជាគម្រោងរបស់រាជបណ្ឌិត្យសភាកម្ពុជា សម្រាប់ពេលបច្ចុប្បន្ន កសិដ្ឋានអាចមានសមត្ថភាពផលិតទឹកដោះគោះស្រស់ បាន​ចន្លោះពី ១០០លីត្រ ទៅ​ ​២០០ លីត្រ ក្នុងមួយថ្ងៃ។​ ​

៤. កសិដ្ឋានចិញ្ចឹមគោយកទឹកដោះ អូម៉ មានទីតាំងស្ថិតនៅ សង្កាត់ព្រែកលៀប  ខណ្ឌជ្រោយចង្វារ  រាជធានីភ្នំពេញ។ កសិដ្ឋាននេះ មានគោចំនួនជាង ៨០ក្បាល ដែលជាប្រភេទពូជគោល្អៗ ត្រូវបាននាំចូលពីប្រទេសជិតខាង យកមកចិញ្ចឹម និងថែទាំយ៉ាងយកចិត្តទុកដាក់នៅក្នុងកសិដ្ឋានផ្ទាល់ ដើម្បីធានាបានថា ទឹកដោះគោស្រស់ ដែលចម្រាញ់ចេញមកគឺមានគុណភាពល្អ ធានាបាននូវរសជាតិ ចេញពីគោធម្មជាតិ និងល្អសម្រាប់សុខភាពរាងកាយរបស់មនុស្សទូទៅ។

គួរជម្រាបថា គិតត្រឹមខែមីនា ឆ្នាំ ២០២៤នេះ កសិដ្ឋានទាំង៤ មានគោយកទឹកដោះចំនួន ១.១៧៦ ក្បាល ដែលអាចផលិតទឹកដោះគោស្រស់ ជាង ១៣ ពាន់លីត្រក្នុងមួយថ្ងៃ ​ស្មើនឹងជាង ៥ លានលីត្រក្នុង១ ឆ្នាំ ឬ ១៧ ភាគរយ នៃតម្រូវការទឹកដោះគោ​ស្រស់ក្នុងស្រុកជាង ៣០ លានលីត្រ៕

អត្ថបទ ៖ សួស សិត