ជីវិតកម្សាន្ដ

សួង សាខារ៉ានីត បារម្ភយុវជនជំនាន់ក្រោយសប្បាយភ្លើតភ្លើននឹងគ្រឿងស្រវឹងភ្លេចខ្លួន

បានផុស

៥ ខែ មុន

នៅ

ថ្ងៃអង្គារ ១៧ កញ្ញា ២០២៤

ដោយ

តួសម្ដែងក្នុងរឿង”កូនក្រក” សួង សាខារ៉ានីត បានបង្ហាញក្តីព្រួយបារម្ភជាខ្លាំងចំពោះប្រជាពលរដ្ឋ ពិសេសយុវជនជំនាន់ក្រោយ ខ្លាចតែពួកគាត់សប្បាយភ្លើតភ្លើននឹងគ្រឿងស្រវឹងភ្លេចខ្លួន រហូតបង្កឲ្យមានគ្រោះដល់សុខភាព និងបញ្ហាផ្សេងៗ ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាស្រីសម្តីផ្អែម សួង សាខារ៉ានីត បានប្រាប់កម្ពុជាថ្មីឲ្យដឹងថា នាងពិតជាមានការព្រួយបារម្ភខ្លាំងណាស់ទៅលើបញ្ហាគ្រឿងស្រវឹង ព្រោះបច្ចុប្បន្នមានយុវជនមួយចំនួនមិនសូវបានយល់ពីផលប៉ះពាល់ នៃការពិសាគ្រឿងស្រវឹងទេ ព្រោះអ្នកខ្លះគិតថា ការបរិភោគគ្រឿងស្រវឹងមិនត្រឹមតែធ្វើឲ្យសប្បាយនោះទេ ពោលគឺថែមទាំងមានការលើកទឹកចិត្តតាមរយៈការដាក់រង្វាន់នៅលើក្រវិលកំប៉ុងទៀតផង។

សួង សាខារ៉ានីត សង្កត់ធ្ងន់ថា “ខ្ញុំសូមស្នើដល់បងប្អូនយើង ព្រមទាំងយុវជនមួយចំនួន កុំឈ្លក់វង្វេងនឹងការពិសាគ្រឿងស្រវឹងខ្លាំងពេក ព្រោះពេលខ្លះគឺវាជះឥទ្ធិពលមិនល្អសម្រាប់ខ្លួនយើង សង្គមជាតិ និងក្រុមគ្រួសារ ដោយសារគ្រឿងស្រវឹង បង្កឲ្យប៉ះពាល់សុខភាព,បង្កើតជាអំពើហិង្សាក្នុងគ្រួសារ និងបញ្ហាធំ គឺបង្កគ្រោះថ្នាក់ចរាចរណ៍នៅលើដងផ្លូវជាដើម”។

រ៉ានីត និយាយទៀតថា នាងមានការខ្វល់ខ្វាយជាខ្លាំងជាមួយប្រជាជន ប្រសិនបើពួកគាត់ហូបត្រឹមលក្ខណៈជួបជុំសប្បាយម្ដងម្កាល ដោយកម្រិតល្មមៗ វាជារឿងធម្មតាទេ ប៉ុន្តែខ្លាចតែលក្ខណៈហូបជ្រុល ឬ រាល់ថ្ងៃ ដើម្បីតាមយករង្វាន់។

នាងបន្តថា សូមកុំឲ្យការសប្បាយដឹកមុខ ព្រោះនៅពេលដែលមានបញ្ហាកើតឡើងគឺមានតែខ្លួនយើងប៉ុណ្ណោះជាអ្នកពិបាកមុនគេ៕

អត្ថបទ ៖ ចាន់រ៉ា