ព័ត៌មានជាតិ

ការប្រើប្រាស់យានយន្តអគ្គិសនីនៅកម្ពុជា កើនដល់ ៣ ៦៧៦ គ្រឿង

បានផុស

៥ ថ្ងៃ មុន

នៅ

ថ្ងៃពុធ ១៨ កញ្ញា ២០២៤

ដោយ

លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងថា ការប្រើប្រាស់យានយន្តអគ្គិសនី រួមចំណែកយ៉ាងសំខាន់ក្នុងការកាត់បន្ថយផលប៉ះពាល់ ដែលបង្កឡើងដោយការបំភាយឧស្ម័នកាបូនឌីអុកស៊ីតចេញពីប្រភេទយានយន្តដែលប្រើប្រាស់ប្រេងឥន្ទនៈ។

ជាមួយគ្នានេះ លោកក៏បង្ហើបទិន្នន័យការប្រើប្រាស់យានយន្តអគ្គិសនីនៅកម្ពុជា គិតត្រឹមខែសីហា ឆ្នាំ២០២៤ ដែលបានចុះបញ្ជីមានចំនួនសរុបជាង ៣ ៦៧៦ គ្រឿង ខណៈដែលទីកន្លែងបញ្ចូលថាមពលអគ្គិសនីនៅទូទាំងប្រទេសមានចំនួន ២១ កន្លែង ដែលមានទូបញ្ចូលអគ្គិសនីបានលឿនបំផុតចំនួន ២៧ ទូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុង «សិក្ខាសាលាផ្សព្វផ្សាយគោលនយោបាយជាតិ ស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០» នាព្រឹកថ្ងៃទី ១៨ ខែកញ្ញា រដ្ឋមន្ត្រីក្រសួងសាធារណការ លោក ប៉េង ពោធិ៍នា បានគូសបញ្ជាក់ថា ការកើនឡើងនៃការប្រើប្រាស់យានយន្តអគ្គិសនីនៅកម្ពុជា បានកំពុងដើរទន្ទឹមនឹងការអភិវឌ្ឍន៍វិស័យយានយន្តអគ្គិសនីនៅក្នុងក្របខ័ណ្ឌនៃនិន្នាការសកល ដែលកំពុងមានសន្ទុះយ៉ាងលឿនគួរឱ្យកត់សម្គាល់។

បើទោះបីជាការកំណើននៃការប្រើប្រាស់យានយន្តអគ្គិសនីក៏ពិតមែន រដ្ឋមន្រ្តីក្រសួងសាធារណការនិងដឹកជញ្ជូន មើលឃើញការអភិវឌ្ឍវិស័យយានយន្តអគ្គិសនី ចាំបាច់ត្រូវទាមទារនូវការគាំទ្រពីគ្រប់ភាគីពាក់ព័ន្ធបន្ថែមទៀត ព្រមទាំងការដាក់ចេញនូវគោលការណ៍ជាក់លាក់ និងគោលការណ៍លើកទឹកចិត្តដល់អ្នកប្រើប្រាស់ ក៏ដូចជាវិនិយោគិន ដើម្បីបង្កើនសន្ទុះនៃការប្រើប្រាស់ និងការវិនិយោគលើយានយន្តអគ្គិសនីដែលមាននៅក្នុងប្រទេសកម្ពុជា។

ក្នុងការសម្រេចជាប្រទេសអព្យាក្រឹត្យកាបូន រាជរដ្ឋាភិបាលកម្ពុជាដាក់ចេញយុទ្ធសាស្ត្ររយៈពេលវែង ដើម្បីជំរុញសម្រេចឱ្យបាននូវការប្រើប្រាស់យានយន្តអគ្គិសនីក្នុងអត្រា ៤០% និងទោចក្រយានអគ្គិសនីក្នុងអត្រា ៧០% នៅឆ្នាំ២០៥០៕