ស្នងការរាជធានី បញ្ជាឱ្យស្រាវជ្រាវ ម្ចាស់ស្ថានីយ៍ប្រេងឥន្ធនៈ ដេញបុក យុវជន ៣ នាក់

លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យកម្លាំងនគរបាលជំនាញធ្វើការស្រាវជ្រាវ និងកោះហៅម្ចាស់ស្ថានីយ៍ប្រេងឥន្ធនៈសាវីមិច ឈ្មោះ តាំង សឿន អាយុ ៤៨ឆ្នាំ នៅសង្កាត់ក្រាំងធ្នង់ ខណ្ឌសែនសុខ ចូលខ្លួនជាបន្ទាន់ពាក់ពន្ធ័ករណីនាំកូនប្រុស និងបក្សពួកប្រមាណជិត ១០ នាក់ ជិះរថយន្ដ និងម៉ូតូដេញបុក ម៉ូតូយុវជន ៣ នាក់ រួចព្រួតវាយចាប់ចងដៃទាំងកម្រោលបណ្ដាលឱ្យរងរបួស។

ការបញ្ជានេះធ្វើឡើង នៅរសៀលថ្ងៃទី២១ ខែកញ្ញា ឆ្នាំ២០២៤ បន្ទាប់ពីទទួលបានពាក្យបណ្ដឹងពីក្រុមគ្រួសារជនរងគ្រោះ ៣ នាក់ ពាក់ព័ន្ធករណីម្ចាស់ស្ថានីយ៍ប្រេងឥន្ធនៈសាវីមិច នាំគ្នាជិះរថយន្ដ និងម៉ូតូដេញបុក ម៉ូតូមានគ្នាប្រហែលជិត ១០ នាក់ ព្រួសវាយចាប់ចងដៃជនរងគ្រោះ ដោយមិនដឹងមូលហេតុ។​

ក្រោយពេលព្រួតវាយ និងចាប់ជនរងគ្រោះរួច បុគ្គលឈ្មោះ តាំង សឿន បានប្រាប់សមត្ថកិច្ចថា ខ្លួនយល់ច្រឡំស្មានតែយុវជន ៣ នាក់នេះជាអ្នកគប់ផាវចូលស្ថានីយ៍ប្រេងរបស់ខ្លួន កាលពីពេលកន្លងទៅ ទាំងដែលយុវជនទាំង ៣ នាក់នេះ មិនដឹងរឿងអ្វីទាល់តែសោះ ហើយក៏មិនជាប់ពាក់ព័ន្ធដែរ និងបានបង្ខំឱ្យយុវជនទាំង ៣ នាក់ ផ្ដិតមេដៃធ្វើកិច្ចសន្យាបញ្ចប់រឿង មិនប្ដឹងរឿងចាប់ចងព្រួតគ្នាបណ្ដាលឱ្យរងរបួស។

រហូតដល់ថ្ងៃទី២០ ខែកញ្ញា ឆ្នាំ២០២៤ ក្រុមគ្រួសារជនរងគ្រោះបានទៅដាក់ពាក្យបណ្ដឹងដើម្បីរកយុត្តិធម៌ ចំពោះរឿងរ៉ាវព្រួតវាយកូនរបស់គាត់បណ្ដាលឱ្យរងរបួសពេញខ្លួន ហើយថា ជារឿងយល់ច្រលំទៅវិញ។

បើយោងតាមពាក្យបណ្ដឹងពីក្រុមគ្រួសាររងគ្រោះបានឱ្យដឹងថា កាលពីថ្ងៃទី១៩ ខែកញ្ញា ឆ្នាំ២០២៤ វេលាម៉ោងប្រហែល ១១ យប់ ពួកគេទាំង៣នាក់បានជិះម៉ូតូចេញពីបន្ទប់ជួល ដើម្បីទៅទិញបាយឆាហូប។ លុះពេលទៅលើមុខស្ថានីយប្រេងឥន្ធនៈសាវីមិច របស់ជនបង្កឈ្មោះ តាំង សឿន ស្រាប់តែបុគ្គលនេះ និងបក្សពួកជិះរថយន្ដ ម៉ូតូ ដេញបុកពួកគេ ដោយគ្មានហេតុ នៅពេលដេញបុកម៉ូតូរបស់ពួកគេដួល ហើយក្នុងចំណោម ៣ នាក់ មានម្នាក់រត់ឱ្យអ្នកភូមិជួយ និង ២ នាក់ទៀត ត្រូវក្រុមជនបង្កចាប់បាន រួចចងដៃ ដកទូរសព្ទ និងព្រួតវាយយ៉ាងដំណំ។ ប៉ុន្តែជនរងគ្រោះដែលរត់រួច ក៏ត្រូវក្រុមបង្កតាមទៅចាប់យកមកដល់ស្ថានីយ៍ប្រេង និងបានប្រើហិង្សាផងដែរ។ ក្រោយនាំមកដល់កន្លែងរបស់ខ្លួន ក្រុមជនបង្ក បានប្រគល់ពួកគេទៅឱ្យនគរបាលប៉ុស្ដិ៍រដ្ឋបាលសង្កាត់ក្រាំងធ្នង់ ដើម្បីធ្វើការសួរនាំ។ នៅពេលសមត្ថកិច្ចសួរនាំជនបង្កឈ្មោះ តាំង សឿន បានអះអាងថា ពួកគេវាយជនរងគ្រោះច្រឡំ និងបង្គាប់ឱ្យធ្វើកិច្ចសន្យាមិនប្ដឹងផ្ដល់ទៅវិញ៕

អត្ថបទ៖ ម៉េង