អ៊ីស្រាអែល ប្រកាសឲ្យពលរដ្ឋនៅលីបង់ ប្រញាប់ចាកចេញពីទីតាំងក្រុមហេសបូឡា 

ប្រទេសអ៊ីស្រាអែល បានប្រាប់អ្នករស់នៅក្នុងប្រទេសលីបង់ទាំងអស់ ត្រូវចេញឲ្យឆ្ងាយពីទីតាំងឈរជើងរបស់ក្រុមហេសបូឡា, ដែលនេះធ្វើឲ្យគេសង្ស័យថា មិនយូរទេកងទ័ពរបស់លោក Benjamin Netanyahu នឹងបើកការវាយប្រហារទ្រង់ទ្រាយធំលើចលនាសកម្មប្រយុទ្ធ គាំទ្រដោយអ៊ីរ៉ង់មួយនេះហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការអំពាវនាវដ៏កម្រទៅកាន់ប្រជាជនលីបង់, លោក Daniel Hagari អ្នកនាំពាក្យយោធាអ៊ីស្រាអែលនិយាយថា «យើងសូមជំរុញឲ្យជនស៊ីវិលរស់នៅតាមភូមិដែលមានទីតាំងនៅក្នុងតំបន់ឬជិតអគារដែលក្រុមហេសបូឡាប្រើប្រាស់សម្រាប់គោលបំណងយោធា ដូចជាឃ្លាំងអាវុធ ត្រូវចេញពីផ្លូវគ្រោះថ្នាក់ទាំងនេះជាបន្ទាន់ ដើម្បីសុវត្ថិភាព»។

ការអំពាវនាវនេះកើតឡើងត្រឹមមួយថ្ងៃប៉ុណ្ណោះ បន្ទាប់ពីអ៊ីស្រាអែលនិងក្រុមហេសបូឡា បើក​ការបាញ់ប្រហារគ្នា​​ទៅវិញទៅមកទ្រង់ទ្រាយធំ បន្ទាប់​ពី​ភាគី​អ៊ីស្រាអែល បញ្ជូន​យន្តហោះទៅទម្លាក់គ្រាប់បែក​​បំផ្លាញ​ទីតាំង​​​​​មូលដ្ឋាន​​ទ័ព​​​​រាប់​សិប​កន្លែង​រួម​ទាំង​​សម្លាប់បាន​មេទ័ព​កំពូល​​របស់​ក្រុម​សកម្មប្រយុទ្ធ​ហេសបូឡា​​​ទៀតផង។

យោធាអ៊ីស្រាអែលអះអាងថា ខ្លួនបានវាយប្រហារគោលដៅចំនួន២៩០​កន្លែង​​នៅថ្ងៃទី២១​ខែកញ្ញា រួមទាំង​​​ទីតាំង​បាញ់គ្រាប់រ៉ុកកែតផងដែរ ហើយនិយាយថា ខ្លួននឹងបន្តវាយប្រហារគោលដៅនៃចលនាគាំទ្រដោយអ៊ីរ៉ង់។

ពាក់ព័ន្ធភាពតានតឹងនេះដែរ ឯកអគ្គរដ្ឋទូតលីបង់ប្រចាំចក្រភពអង់គ្លេស ព្រមានថា បើអ៊ីស្រាអែល វាយលុកលីបង់មែន វានឹងក្លាយជាសង្គ្រាមវិនាសអន្តរាយ។ ប្រេសិតលីបង់លោក Rami Mortada ប្រាប់ទៅសារព័ត៌មាន Times of Israel ថា កងកម្លាំងប្រដាប់អាវុធលែងទ្រាំទៀតហើយ ប្រសិនបើអ៊ីស្រាអែល បើកការវាយលុកដីគោកនិងអាកាសមែន។

តាមពិតទៅ អ៊ីស្រាអែលក៏ចាប់ផ្តើមប្រតិបត្តិការយោធាទ្រង់ទ្រាយធំនៅប្រទេសលីបង់ក្នុងឆ្នាំ ១៩៨២ដែរ ដោយសម្រេចការកាន់កាប់តំបន់ខ្លះរយៈពេល៣ឆ្នាំ ហើយក៏នាំឲ្យក្រុមហេសបូឡា កកើតឡើងក្លាយជាកម្លាំងយោធានិងនយោបាយដ៏លេចធ្លោ។ លុះមកដល់ឆ្នាំ២០០៦ អ៊ីស្រាអែល ក៏វាយលុកលីបង់ម្តងទៀត ដែលប្រតិបត្តិការនោះ ចាយពេលអស់មួយខែ៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល​និង​ហេសបូឡា​លីបង់​​​ផ្តើម​ប្រយុទ្ធគ្នា​ទ្រង់​ទ្រាយ​ធំ​​