ព័ត៌មានអន្ដរជាតិ

រលកយក្សស៊ូណាមិតូចមួយវាយប្រហារប្រជុំកោះ Izu របស់ជប៉ុន

បានផុស

១៧ វិនាទី មុន

នៅ

ថ្ងៃអង្គារ ២៤ កញ្ញា ២០២៤

ដោយ

ប្រជុំកោះ Izu ដែលនៅដាច់ស្រយាលក្នុងប្រទេសជប៉ុន ស្ថិតនៅភាគខាងត្បូងទីក្រុងតូក្យូ បានរងការវាយប្រហារដោយរលកយក្សស៊ូណាមិ នៅព្រឹកថ្ងៃអង្គារនេះ បន្ទាប់ពីកើតមានគ្រោះរញ្ជួយដីកម្រិត៥,៩ រ៉ិចទ័រ ដោយមិនទាន់មានរបាយការណ៍អំពីការខូចខាតភ្លាមៗនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារឧតុនិយមជប៉ុន រលកយក្សស៊ូណាមិនេះមានកម្ពស់ ៥០សង់ទីម៉ែត្រ ហើយបានទៅដល់កោះ Hachijo ដែលជាកោះមួយក្នុងចំណោមតំបន់ប្រជុំកោះ Izu ប្រហែល៤០នាទីបន្ទាប់ពីការរញ្ជួយដី។

ទូរទស្សន៍ NHK បានរាយការណ៍ថា មិនមានការខូចខាតពីរលកយក្សស៊ូណាមិ ឬការរញ្ជួយដីត្រូវបានបញ្ជាក់នោះទេ។

មុនកើតមានរលកយក្សស៊ូណាមិនេះ ទីភ្នាក់ងារឧតុនិយមជប៉ុន បានព្រមានថា អ្នកស្រុកនៃប្រជុំកោះ Izu និងប្រជុំកោះ Ogasawara ត្រូវតែត្រៀមខ្លួនសម្រាប់រលកយក្សស៊ូណាមិដែលមានកម្ពស់រហូតដល់១ម៉ែត្រ បន្ទាប់ពីការរញ្ជួយដីបានកើតឡើងនៅក្រោមសមុទ្រនៅជិតកោះ Torishima ដែលគ្មានមនុស្សរស់នៅ ហើយស្ថិតនៅចម្ងាយប្រហែល ៦០០គីឡូម៉ែត្រពីភាគខាងត្បូងទីក្រុងតូក្យូ។

ប្រជុំកោះ Izu និងប្រជុំកោះ Ogasawara មានមនុស្សរស់នៅសរុបប្រហែល ២៤ ០០០នាក់ប៉ុណ្ណោះ គិតត្រឹមចុងឆ្នាំ២០២៣៕

ដោយ៖ ឈាង