ព័ត៌មានអន្ដរជាតិ

អាមេរិក ស្នើច្បាប់ហាមឃាត់រថយន្តមានបំពាក់បច្ចេកវិទ្យាចិន និងរុស្ស៊ី

បានផុស

១៤ វិនាទី មុន

នៅ

ថ្ងៃអង្គារ ២៤ កញ្ញា ២០២៤

ដោយ

ដោយលើកឡើងពីកង្វល់សន្តិសុខជាតិ សហរដ្ឋអាមេរិកកំពុងគ្រោងចាត់វិធានការហាមឃាត់ការលក់ ឬនាំចូលរថយន្តឆ្លាតវៃដែលបំពាក់បច្ចេកវិទ្យាចិន ឬរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីប្រកាសមួយកាលពីថ្ងៃទី២៣កញ្ញា ក្រសួងពាណិជ្ជកម្មអាមេរិកបានស្នើច្បាប់ដែលនឹងហាមឃាត់ការនាំចូល និងលក់ប្រព័ន្ធទំនាក់ទំនងយានយន្ត (VCS) ឬប្រព័ន្ធបើកបរស្វ័យប្រវត្តិ (ADS) ឬកម្មវិធីដែលផលិតដោយក្រុមហ៊ុនជាប់ពាក់ព័ន្ធនឹងចិន ឬរុស្ស៊ី។

ការហាមឃាត់កម្មវិធី (Software) របស់រថយន្តដែលបំពាក់បច្ចេកវិទ្យាចិននិងរុស្ស៊ី នឹងចូលជាធរមានសម្រាប់ប្រភេទយានយន្តស៊េរីចាប់ពីឆ្នាំ២០២៧ ហើយការហាមឃាត់ផ្នែកគ្រឿងបន្លាស់ (Hardware) វិញនឹងចូលជាធរមានសម្រាប់រថយន្តស៊េរីចាប់ពីឆ្នាំ២០៣០។

ក្រសួងពាណិជ្ជកម្ម បានបញ្ជាក់ទៀតថា ច្បាប់ដែលបានស្នើឡើងក៏នឹងរារាំងការប្រើប្រាស់បច្ចេកវិទ្យា VCS ឬ ADS ពីចិន ឬរុស្ស៊ីនៅក្នុងរថយន្តដែលផលិតនៅក្នុងទឹកដីសហរដ្ឋអាមេរិកផងដែរ។

លោកស្រី Gina Raimondo រដ្ឋមន្ត្រីក្រសួងពាណិជ្ជកម្ម បាននិយាយនៅក្នុងសេចក្តីថ្លែងការណ៍មួយថា បើគ្មានវិធានការទាំងនេះទេ សត្រូវបរទេសអាចបិទ ឬគ្រប់គ្រងយានជំនិះដែលកំពុងប្រតិបត្តិការនៅសហរដ្ឋអាមេរិក ដោយបង្កើតភាពវឹកវរនៅលើដងផ្លូវនានា។

ក្រុមហ៊ុនផលិតរថយន្តជាច្រើន បានប្រើប្រាស់គ្រឿងបន្លាស់ដែលនាំចូលពីប្រទេសចិន ហើយច្បាប់ដែលបានស្នើឡើងត្រូវបានគេរំពឹងថានឹងប៉ះពាល់ដល់ក្រុមហ៊ុនទាំងនោះដែលនាំរថយន្តចេញទៅកាន់សហរដ្ឋអាមេរិក៕

ដោយ៖ ឈាង

Related Topics:សហរដ្ឋអាមេរិក