មុនទទួលមរណភាពក្នុងវ័យក្មេង តួឯកប្រុសរឿង «ចំណងស្នេហ៍ទ្វេភព» ​បន្សល់នូវស្នាដៃឲ្យគេកោតសរសើរ

Om Akapan ជា​តារា​សម្ដែង​វ័យ​ក្មេង​ដ៏មានទេពកោសល្យ​​ ដែល​ត្រូវ​បាន​គេដឹងថា លោកបង្ហាញ​ខ្លួនលើកដំបូងតាមរយៈតួកំប៉ិកកំប៉ុក មុនពេលចាប់ផ្ដើមក្លាយជាតួឯកប្រុសក្នុងរឿងភាគថៃ​ប្រចាំ​ប៉ុស្ដិ៍​ធំៗ ដែលមានទស្សនិកជននិងអ្នកគាំទ្រពេញចិត្តមកដល់សព្វថ្ងៃ។

មែនទែនទៅ ឈ្មោះពិតរបស់​ om គឺ Akkapan Namart កើតនៅថ្ងៃទី ២៨ ខែមករា ឆ្នាំ ១៩៨៥ បច្ចុប្បន្នមានអាយុ ៣៩ ឆ្នាំ។ លោកបាន​បញ្ចប់​ការ​សិក្សា​ថ្នាក់​មធ្យម​សិក្សា​នៅសាកលវិទ្យាល័យ​រាម​ខេង និងបរិញ្ញាបត្រនៅមហាវិទ្យាល័យទំនាក់ទំនងសិល្បៈ សាកលវិទ្យាល័យបាងកក ដេប៉ាតឺម៉ង់ផ្សព្វផ្សាយពាណិជ្ជកម្ម បន្ទាប់មកគាត់ចាប់ផ្តើមប្រឡូកពេញទំហឹងក្នុងវិស័យកម្សាន្តតែម្ដង។

លោក Om កើត​ក្នុង​គ្រួសារ​មួយ​មាន​បងប្អូន​បង្កើត​ពីរ​នាក់​ គាត់​ជា​បង​ប្រុស​ច្បង ដោយបានចូលប្រឡូកក្នុងវិស័យសិល្បៈ ពីការថតស្ពតពាណិជ្ជកម្ម និងថតវីដេអូចម្រៀង មុនឈានជើងចូលវិស័យសម្តែងក្នុងនាមជាតួសម្តែង។ បង្ហាញ​ខ្លួន​ដំបូងលោកលេងត្រឹមជាតួរ៉ាយរ៉ង និង​តួ​ចិត្តអាក្រក់ រហូតឡើងដល់តួនាទីនាំមុខ។ នាពេលនោះការសម្តែងរបស់គាត់ត្រូវបានគេហៅថាមិនធម្មតាដោយមានការពេញចិត្តពីអ្នកទស្សនា​​ គាត់បានឈ្នះពានរង្វាន់ទូរទស្សន៍មាសក្នុងប្រភេទតារាសម្តែងឆ្នើម ហើយ​បាន​ឡើង​កាន់​តំណែង​ជា​តួ​បុរស​ជួរមុខ និង​បង្កើត​ស្នាដៃ​អនុស្សាវរីយ៍​សម្រាប់​អ្នកគាំទ្រ​រឿង​ភាគ​ជាច្រើន​។

មិនត្រឹមតែប៉ុណ្ណឹងទេ​ Om ត្រូវបានគេស្គាល់ថាជាតួឯកប្រុសពូកែដាក់មនោសញ្ចេតនាខ្លាំង ក្នុងរឿងភាគប្រភេទស្នេហា។ លោកមានបុគ្គលិកលក្ខណៈសុភាពរាបសារ ហើយបានក្លាយជាការពេញនិយមយ៉ាងខ្លាំងក្នុងអំឡុងពេលនៃរឿងភាគ និងប្រភេទអាថ៌កំបាំង។ ជាមួយគ្នានេះដែរ គាត់​ក៏​ត្រូវ​បាន​អ្នក​គាំទ្រ​ពេញ​ចិត្ត​ចំពោះ​សមត្ថភាពសម្ដែង និង​ភាព​ទន់ភ្លន់​ផ្ទាល់​ខ្លួន​របស់​គាត់នៅខាងក្រៅឆាកសម្ដែងផងដែរ។

លោក​បាន​សម្ដែងជាតួឯកប្រុស​ក្នុង​រឿង​ភាគ​ដំបូងក្រោមចំណងជើងថា Ruk Sorn Kaen នៅ​ប៉ុស្ដិ៍​លេខ​៣ ។ បន្ទាប់មក ស្រាប់តែបានទទួលតួនាទីលេចធ្លោដំបូងនៅក្នុងរឿង Prajan Lai Payak​ នៅប៉ុស្តិ៍លេខ៧ រហូតដល់ទទួលបានពានរង្វាន់ទូរទស្សន៍មាស ប្រភេទ​តួ​សម្តែង​ឆ្នើម។ ក្រោយ​ៗមក​ទៀត លោក​​សម្ដែង​ជា​តួ​ឯក​ក្នុង​រឿង Sao Chai Hi-Tech ជា​មួយ​តារាស្រី Jooy Warattaya។ ដោយសារតែមានជំនាញនិងដុងពីកំណើតផង ទើបធ្វើឲ្យតារាប្រុសថៃត្រូវអ្នកដឹកនាំរឿងពេញចិត្តពេញថ្លើមយ៉ាងខ្លាំង ដោយដាក់លោកជា​តួ​ឯកប្រុសក្នុង​រឿង Tawipob ឬចំណងស្នេហ៍ទ្វេភព” កាលឆ្នាំ២០១១ ជាមួយតារាស្រីជួរមុខ Pancake។ ​ក្នុង​ឆ្នាំ ២០១៧ លោកក៏ផ្លោះបានមួយជំហ៊ានទៀត ​ដោយចូល​រួម​ក្នុងស៊េរី​រឿងភាគដ៏ល្បីល្បាញ “Paragit Ruk” ​​សម្ដែង​ជា​អនុសេនីយ៍ឯក Jirawat ។ រឿងភាគប្រចាំប៉ុស្តិ៍លេខ៧នេះទទួលបានភាពល្បីល្បាញខ្លាំង ទទួលស្គាល់ដោយអ្នកទស្សនាជាច្រើន ហើយបានដាក់ឈ្មោះ Om​ ថា លោកអនុសេនីយ៍ឯក Jirawat តាំងពីពីនោះមក។

យ៉ាងណាមិញ ចាប់តាំងពីប្រឡូកនៅក្នុងអាជីពសម្ដែងដំបូង រហូតដល់ថ្ងៃមរណភាព លោកទទួលការងារឲ្យទូរទស្សន៍ប៉ុស្តិ៍លេខ៣ បានត្រឹមតែ៣រឿងប៉ុណ្ណោះ ទើបតារាប្រុស​ Om Akapan បានផ្លាស់ទៅទូរទស្សន៍ប៉ុស្តិ៍លេខ៧ សរុបភាពយន្តចំនួន១៤រឿង។

ក្នុងពេលដែលអាជីពកំពុងឡើងស្រឺតៗ នៅឆ្នាំ២០២២ ស្រាប់តែមានពាក្យចចាមអារ៉ាមថា Om Akapan បានចាប់ផ្តើមកើតជំងឺមហារីកនៅតំបន់សាច់ដុំបេះដូងដំណាក់កាលទី៣ រហូតបង្ខំចិត្តលាឈប់ពីរឿងភាគដែលកំពុងសម្ដែងចុងក្រោយ ដើម្បីព្យាបាលខ្លួនឲ្យឆាប់ជាសះស្បើយ។​​ ក្នុងកំឡុងខែមករាឆ្នាំ ២០២៣ គាត់ទទួលបានការវះកាត់ដោយសុខភាពក៏មានភាពប្រសើរឡើងច្រើន។ នៅពាក់កណ្ដាលឆ្នាំ ២០២៤ លោកបានបង្ហាញខ្លួនចុងក្រោយនៅមជ្ឈមណ្ឌលសន្និបាតជាតិ Queen Sirikit បង្កើតភាពភ្ញាក់ផ្អើលយ៉ាងខ្លាំងដល់អ្នកគាំំទ្រដោយសង្ឃឹមថា លោកនឹងឆាប់ជាសះស្បើយ ហើយវិលមកកាន់អាជីពសម្ដែងដូចពីមុន។

ទោះបីជាយ៉ាងណាក៏ដោយ នៅថ្ងៃទី ២២ ខែកញ្ញា ឆ្នាំ ២០២៤ ប៉ុស្តិ៍លេខ៧ ស្រាប់តែចេញមកបញ្ជាក់ថា​ តារាសម្ដែងប្រុស Om Akapan បានទទួលមរណៈភាពហើយ កាលពីថ្ងៃ២២ ខែកញ្ញា ក្នុងវ័យ ៣៩ ឆ្នាំ ដែលធ្វើឲ្យវិស័យសិល្បៈថៃមានការសោកស្ដាយជាពន់ពេក​​ នូវការបាត់បង់តារាសម្ដែងឆ្នើមនិងមានទេព​កោសល្យ​មួយរូបនេះ៕

អត្ថបទ៖ សាង ស្រីល័ក្ខ

ចុចអាន៖៤ ខែមុន Om ប្រកាសក្ដែងៗថា វិលចូលសិល្បៈ ពេលនេះបែរទទួលដំណឹងមរណភាពរបស់លោក