ស្ថានការណ៍វិវត្តចុងក្រោយ នៃសង្គ្រាមអ៊ីស្រាអែល-ហេសបូឡាលលីបង់

ជម្លោះអ៊ីស្រាអែល-ហេសបូឡាលីបង់ កាន់តែរីកធំ ធ្វើឲ្យភាពតានតឹងនៅមជ្ឈិមបូព៌ា ឈានដល់កម្រិតខ្ពស់បំផុត ខណៈបណ្តាថ្នាក់ដឹកនាំក្នុងតំបន់និងពិភពលោកព្រមានថា ជម្លោះនេះអាចផ្ទុះឡើងធំហួសការគ្រប់គ្រង បង្កជាវិនាសកម្មធ្ងន់ធ្ងរថែមទៀតផង។

កាលពីដើមសប្តាហ៍នេះ អ៊ីស្រាអែល បានបាញ់មីស៊ីលស្រោចលើទីតាំងក្រុមហេសបូឡា រាប់ពាន់កន្លែង សម្លាប់មនុស្សជាង៥០០នាក់ និងជំរុញឲ្យមានការជម្លៀសមនុស្សទ្រង់ទ្រាយធំ។

ខាងក្រោមនេះ គឺជាស្ថានការណ៍វិវត្តចុងក្រោយនៃសង្គ្រាមអ៊ីស្រាអែល-ហេសបូឡាលីបង់៖

តួលេខមនុស្សស្លាប់កើនឡើងកាន់តែច្រើន

គិតត្រឹមព្រឹកថ្ងៃពុធទី២៥ខែកញ្ញាឆ្នាំ២០២៥ ក្រសួងសុខាភិបាលលីបង់ បានចេញរបាយការណ៍ថា មនុស្សស្លាប់ក្នុងការវាយប្រហារដ៏សាហាវរបស់អ៊ីស្រាអែលរយៈពេល២ថ្ងៃ បានកើនដល់ ៥៦៩នាក់ហើយ ខណៈ ១ ៨៣៥នាក់ត្រូវរបួស។

ក្រុមហេសបូឡា បញ្ជាក់​ពី​ការ​ស្លាប់​ ​មេ​បញ្ជាការ​ជាន់ខ្ពស់ម្នាក់

ក្រុមហេសបូឡា បានចេញសេចក្តីថ្លែងការណ៍ថា «មេបញ្ជាការជាន់ខ្ពស់ឈ្មោះ Ibrahim Qubaisi ត្រូវគេសម្លាប់ពេលកំពុងធ្វើដំណើរទៅកាន់ទីក្រុងហ្ស៊េរុយសាឡិម នៃប្រទេសអ៊ីស្រាអែល ដើម្បីជួយប្រយុទ្ធនៅហ្គាហ្សា»។

ទោះបីជាយ៉ាងណាក៏ដោយ អ៊ីស្រាអែលអះអាងថា មិនមែនម្នាក់ទេ, គឺមានច្រើននាក់ទៀតដែលស្លាប់។

ពលរដ្ឋលីបង់រាប់ម៉ឺននាក់ត្រូវរត់ភៀសខ្លួនចោលផ្ទះសម្បែង

ពលរដ្ឋលីបង់រាប់ម៉ឺននាក់ ត្រូវជម្លៀសចេញពីផ្ទះសម្បែង នៅភាគខាងត្បូងឆ្ពោះទៅភាគខាងជើងប្រទេស។ ក្រៅពីការជម្លៀសមនុស្សទ្រង់ទ្រាយធំ សាលារៀនជាច្រើននៅក្នុងប្រទេសនេះ ក៏ត្រូវបង្ខំចិត្តបិទទ្វារផងដែរ ដោយសារតែស្ថានការណ៍កាន់តែធ្ងន់ធ្ងរ ហើយមានសាលាមួយចំនួន ត្រូវគេយកធ្វើជាទីជ្រកកោនសម្រាប់ជនភៀសខ្លួន។

អង់គ្លេស ប្រកាសឲ្យពលរដ្ឋខ្លួនចេញពីលីបង់ ជាបន្ទាន់

រដ្ឋាភិបាលអង់គ្លេស បានប្រកាសឲ្យពលរដ្ឋរបស់ខ្លួនចាកចេញពីប្រទេសលីបង់ជាបន្ទាន់ ដោយរដ្ឋមន្ត្រីក្រសួងការពារជាតិលោក John Healey និយាយថា «ព្រឹត្តិការណ៍ប៉ុន្មានថ្ងៃកន្លងមកនេះ​ បានបង្ហាញពីភាពប្រែប្រួលនៃស្ថានភាព ហើយជាមូលហេតុដែលយើងសូមផ្ញើសារឲ្យ ជនជាតិអង់គ្លេសគួរតែចាកចេញឥឡូវនេះ»។

អ៊ីរ៉ង់ ប្រាប់មេដឹកនាំ UN កុំឲ្យនៅស្ងៀម

ប្រធានាធិបតីអ៊ីរ៉ង់ Masoud Pezeshkian ប្រាប់មហាសន្និបាតអង្គការសហប្រជាជាតិ កាលពីថ្ងៃអង្គារថា ការវាយប្រហាររបស់អ៊ីស្រាអែលនៅក្នុងប្រទេសលីបង់នាពេលថ្មីៗនេះ មិនអាចបណ្តោយឲ្យកន្លងផុតទៅដោយគ្មានការឆ្លើយតបបានទេ ហើយលោកថែមទាំងព្រមានអំពី ការរីកធំនៃជម្លោះក្នុងតំបន់ផងដែរ។

លោកលើកឡើងថា «វាជារឿងចាំបាច់ដែលសហគមន៍អន្តរជាតិ ត្រូវតែបញ្ឈប់អំពើហិង្សាជាបន្ទាន់និងនាំមកនូវបទឈប់បាញ់ជាអចិន្ត្រៃយ៍នៅហ្គាហ្សា និងបញ្ចប់ភាពព្រៃផ្សៃរបស់អ៊ីស្រាអែលនៅក្នុងប្រទេសលីបង់ មុនពេលរីកសាយពេញតំបន់នេះនិងពិភពលោកទាំងមូល»។

​អង្គការ​លើកលែងទោស​ ​ថា អ៊ីស្រាអែល ​ប្រព្រឹត្ត​ល្មើស​​ច្បាប់​អន្តរជាតិ

លោកស្រី Agnes Callamard អគ្គលេខាធិការអង្គការលើកលែងទោសអន្តរជាតិបានប្រាប់ Al Jazeera ថា អ៊ីស្រាអែល កំពុងរំលោភច្បាប់អន្តរជាតិហើយ។

លោកស្រីនិយាយថា «ដោយចាប់ផ្តើមជាមួយនឹងការវាយប្រហារមិនរើសមុខលើជនជាតិប៉ាឡេស្ទីននៅតំបន់ហ្គាហ្សា ក្នុងរយៈពេលប៉ុន្មានខែចុងក្រោយនេះ រហូតដល់ការសម្លាប់បុគ្គលិកមនុស្សធម៌ ឈានដល់ការសម្លាប់អ្នកកាសែតទៀត។ នោះគឺជាការរំលោភច្បាប់អន្តរជាតិ យ៉ាងច្បាស់ក្រឡែត»។

ប្រធានាធិបតិអាមេរិក អំពាវនាវឲ្យមានដំណោះស្រាយការទូត

ថ្លែងនៅមហាសន្និបាតអង្គការសហប្រជាជាតិ ប្រធានាធិបតីអាមេរិកលោក ចូ បៃដិន បានអំពាវនាវឲ្យមានដំណោះស្រាយការទូត ហើយព្រមាន កុំឲ្យផ្ទុះសង្គ្រាមទ្រង់ទ្រាយធំឲ្យសោះ។

លោកថ្លែងថា «គ្មាននរណាចង់បានសង្គ្រាម​ទ្រង់ទ្រាយ​ធំឡើយ។ ដំណោះស្រាយការទូតនៅតែជាជម្រើសអាចកើតឡើងបាន។ វានៅតែជាផ្លូវតែមួយគត់ ឆ្ពោះទៅកាន់សន្តិសុខយូរអង្វែង»៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល បន្តវាយប្រហារលីបង់, មនុស្សរាប់ម៉ឺននាក់ ត្រូវភៀសខ្លួន ចោលផ្ទះសម្បែង