ពេជ្រ ចរណៃ អំពាវនាវឲ្យប្រជាពលរដ្ឋគោរពច្បាប់ចរាចរណ៍នាឱកាសពិធីបុណ្យភ្ជុំបិណ្ឌ

តារាសម្តែងកញ្ញា ពេជ្រ ចរណៃ បានធ្វើការបំផុសនិងអំពាវនាវដល់ប្រជាពលរដ្ឋ មហាជន ពិសេសយុវជនខ្មែរទូទាំងប្រទេស ចូលរួមគោរពច្បាប់ចរាចរណ៍ឲ្យបានត្រឹមត្រូវ ដើម្បីបញ្ចៀសគ្រោះថ្នាក់ចំពោះខ្លួនឯងនិងអ្នកដទៃ។

ចំពោះការចេញមុខអំពាវនាវ ពីសំណាក់តារាសម្តែងរូបស្រស់ល្បីល្បាញខាងគុនល្បុក្កតោនេះ គឺស្របពេលដែលឱកាសនៃពិធីកាន់បិណ្ឌនិងភ្ជុំបិណ្ឌ បាននិងកំពុងចូលមកដល់។ ចរណៃ ដាស់តឿនថា “ដើម្បីកុំឲ្យមានគ្រោះថ្នាក់ សូមបងប្អូនទាំងគ្នាត្រូវមានការប្រុងប្រ័យគ្រប់ពេលដំណើរនៅលើដងវិថី”។

កញ្ញា ពេជ្រ ចរណៃ បានប្រាប់កម្ពុជាថ្មីទៀតថា នាងមានការបារម្ភអំឡុងពេលថ្ងៃដែលបងប្អូនឈប់សម្រាកពីការងារធ្វើដំណើរទៅលេងតាមស្រុកកំណើត ដូច្នេះយើងម្នាក់ៗត្រូវបើកបរដោយមានការប្រុងប្រយ័ត្ន ហើយចូលរួមគោរពនូវច្បាប់ចរាចរណ៍ឲ្យបានគ្រប់ៗគ្នា។ កញ្ញាបន្ថែមថា “បើកបរដោយការយោគយល់គ្នា គឺនាំមកនូវសុវត្ថិភាពជាចំបង” ។

ជាមួយគ្នានេះពេជ្រ ចរណៃ ក៏បានស្នើដល់បងប្អូនប្រជាពលរដ្ឋទាំងនៅពេលដំណើរសុំកំពិសារគ្រឿងស្រវឹងដែលលើសពីសមត្ថភាព ឬរហូតដល់ជ្រុលជ្រួសបង្កជាគ្រោះថ្នាក់ផ្សេងៗផងដែរ នាឱកាសពិធីបុណ្យភ្ជុំបិណ្ឌនេះ។

គួរជម្រាបដែរថា កញ្ញាពេជ្រ ចរណៃ កាលពីពេលថ្មីៗក៏បានអះអាងប្រាប់កម្ពុជាថ្មីឲ្យដឹងដែរថា ដាច់ខាតខ្លួនមិនទទួលយកការផ្សព្វផ្សាយនូវពាណិជ្ជកម្ម ល្បែងស៊ីសង និងគ្រឿងស្រវឹងនោះទេ ទោះបីក្នុងតម្លៃថ្លៃយ៉ាងណាក៏ដោយ៕ អត្ថបទ៖ ចាន់រ៉ា