រដ្ឋអាជ្ញាតួក​គីចោទប្រកាន់​មន្ត្រី​គ្រាក់ៗ​១៣នាក់ជុំវិញភ្លើង​ឆេះក្លឹបរាត្រីសម្លាប់មនុស្ស២៩នាក់

រដ្ឋអាជ្ញានៅក្នុងប្រទេសតួកគីបានចោទប្រកាន់មន្ត្រីសាធារណៈចំនួន១៣នាក់ជុំវិញអគ្គីភ័យដែលបានសម្លាប់មនុស្ស២៩ នាក់នៅក្លឹបរាត្រីដែលកំពុងជួសជុលនៅរដ្ឋធានី​ អ៊ីស្តង់ប៊ុលកាលពីខែមេសា។ នេះយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៥ខែកញ្ញានេះ។

ទីភ្នាក់ងារព័ត៌មាន Anadolu របស់​​ប្រទេសតួកគី បានរាយការណ៍​ថា ជនជាប់ចោទដែលរាប់បញ្ចូលទាំងមន្ត្រីបច្ចុប្បន្ន និង​អតីតពីសាលាក្រុង Besiktas និងមន្ត្រី​នៃ​អង្គភាព​ពន្លត់អគ្គីភ័យ ប្រឈមមុខនឹងការជាប់ពន្ធនាគាររហូតដល់​១៧ ឆ្នាំ ពីបទរំលោភបំពានច្បាប់ និងបណ្តាលឱ្យមានមនុស្សស្លាប់ដោយសារការធ្វេសប្រហែស។

ការចោទប្រកាន់ដែលរៀបចំឡើងដោយការិយាល័យអគ្គរដ្ឋ​អាជ្ញាក្រុងអ៊ីស្តង់ប៊ុល បានកំណត់ភាពមិនស្របគ្នាក្នុងការត្រួតពិនិត្យសុវត្ថិភាព និងអាជ្ញាប័ណ្ណប្រតិបត្តិការដែលផ្តល់ដល់ការគ្រប់គ្រងរបស់ក្លឹបរាត្រីចាប់តាំងពីឆ្នាំ២០០៦។ លើសពីនេះតុលាការ​ឧក្រិដ្ឋកម្ម​​ជាន់ខ្ពស់​​អ៊ីស្តង់ប៊ុល (Istanbul 33rd High Criminal Court) រួមបញ្ចូលគ្នានូវសំណុំរឿងនេះជាមួយនឹងការកាត់ទោសជនជាប់ចោទប្រាំបួននាក់ផ្សេងទៀត រួមទាំងម្ចាស់អាជីវកម្មផងដែរ ដែលពីមុនត្រូវបានចោទប្រកាន់ពីបទល្មើសស្រដៀងគ្នានេះ។

គួរបញ្ជាក់ថា ហេតុការណ៍អគ្គិសភ័យនេះបានកើតឡើងកាលពីខែមេសាបានសម្លាប់កម្មករដែលជាប់គាំង និងនិយោជិតនៅខាងក្នុងក្លឹបរាត្រី Masquerade ខណៈពេលដែលវាត្រូវបានបិទសម្រាប់ការជួសជុល។ កន្លែង​នេះ​មាន​ទីតាំង​នៅ​ជាន់​ផ្ទាល់​ដី និង​ជាន់​ក្រោម​នៃ​អគារ​លំនៅឋាន​កម្ពស់ ១៦ ជាន់​ក្នុង​សង្កាត់ Besiktas ​នៃ​ទីក្រុង Istanbul។ ហេតុការណ៍នេះបានបណ្ដាលឲ្យមានមនុស្សស្លាប់២៩នាក់និង របួសរាប់សិបនាក់៕

អត្ថបទ៖ ប៊ុន សុភាព