ព័ត៌មានជាតិ

អភិបាលខណ្ឌឫស្សីកែវ ចុះពិនិត្យស្ថានភាពទឹកទន្លេសាប កំពុងហក់ឡើងគួរឲ្យព្រួយបារម្ភ លិចលង់ផ្ទះសម្បែងប្រជាពលរដ្ឋ

បានផុស

២២ នាទី មុន

នៅ

ថ្ងៃសុក្រ ២៧ កញ្ញា ២០២៤

ដោយ

អភិបាលខណ្ឌឫស្សីកែវ បានដឹកនាំកម្លាំងចុះពិនិត្យស្ថានភាពទឹកកំពុងហក់ឡើងខ្លាំង ធ្វើឲ្យមានការជន់លិចផ្ទះប្រជាពលរដ្ឋមួយចំនួននៅតាមដងទន្លេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីថ្ងៃទី ២៦ ខែកញ្ញា ឆ្នាំ ២០២៤ ម្សិលមិញនេះ លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំកម្លាំងចុះពិនិត្យស្ថានភាពទឹកទន្លេសាប កំពុងហក់ឡើងគួរឲ្យព្រួយបារម្ភ ដែលបណ្ដាលឲ្យលិចលង់ផ្ទះសម្បែងរបស់ប្រជាពលរដ្ឋមួយចំនួន។

លោកអភិបាលខណ្ឌ បានណែនាំឲ្យប្រជាពលរដ្ឋរស់នៅតាមបណ្ដោយមាត់ទន្លេ យកចិត្តទុកដាក់ថែទាំសុខភាពឲ្យបានល្អ និងរក្សាអនាម័យ ព្រោះសុខភាពជាកត្តាចម្បងសម្រាប់មនុស្សគ្រប់គ្នា ដូច្នេះសូមគ្រប់ក្រុមគ្រួសារត្រូវបរិភោគទឹកដាំឆ្អិនល្អ ដើម្បីការពារកុំឲ្យកើតមានជំងឺរាករូស ឬជំងឺតម្កាត់នានា ធ្វើឲ្យខាតបង់ពេលវេលា និងថវិកាក្នុងការព្យាបាលជំងឺ។

លោកអភិបាលខណ្ឌ ក៏បានណែនាំបន្ថែមថា នៅពេលទឹកស្រក មុនពេលត្រឡប់ទៅរស់នៅលំនៅឋានវិញ សូមសម្អាតផ្ទះ ឬបរិស្ថានជុំវិញផ្ទះឲ្យបានស្អាត មានអនាម័យ ហើយខិតខំបន្តបង្កបង្កើតផល ដាំដុះ ចិញ្ចឹមសត្វ ដើម្បីស្តារសេដ្ឋកិច្ចគ្រួសារឡើងវិញ។ សូមមានស្មារតីប្រុងប្រយ័ត្នជានិច្ចចំពោះអគ្គិភ័យ និងការលង់ទឹកជាយថាហេតុ៕

អត្ថបទ ៖ ម៉េង