ARDB និង ADBC​ នឹងចុះហត្ថលេខាសហការគ្នាលើការផ្តល់ហិរញ្ញប្បទានដល់វិស័យកសិកម្ម

ធនាគារអភិវឌ្ឍន៍ជនបទ និងកសិកម្មរបស់កម្ពុជា (ARDB) និង ធនាគារអភិវឌ្ឍន៍កិសកម្ម របស់ប្រទេស ចិន ​ (ADBC)​ មានផែនការក្នុងការចុះកិច្ចព្រមព្រៀងសហការគ្នាលើការផ្តល់កម្ចីដល់វិស័យកសិកម្ម និងការបង្កើតក្រុមការងារសិក្សាស្រាវជ្រាវរួមគ្នាលើការអនុវត្តហិរញ្ញប្បទានបៃតង និងការប្រយុទ្ធប្រឆាំងលើការប្រែប្រួលអាកាសធាតុ។

ផែនការទាំងនេះត្រូវបានលើកឡើងក្នុងជំនួបទ្វេរភាគីរវាងលោក កៅ ថាច អគ្គនាយករបស់ ARDB និងលោក ​QIAN WENHUI ប្រធានក្រុមប្រឹក្សាភិបាល នៃធនាគារ ADBC នៅរដ្ឋធានីប៉េកាំង ប្រទេសចិននៅព្រឹកថ្ងៃទី២៧ខែកញ្ញា​។ នេះបើយោងតាម ARDB។

លោកកៅ ថាច ​បានស្នើសុំទៅកាន់ ភាគី ធនាគារ ADBC ធ្វើជាធនាគារអន្តរការី (Correspondent Bank) របស់ធនាគារ ARDB ដើម្បីទូទាត់ប្រាក់ឆ្លងប្រទេស នៅប្រទេសចិន។ ​ជាមួយគ្នានោះដែរ លោកក៏បានស្នើសុំ ARDB បង្កើតក្រុមការងារសិក្សាស្រាវជ្រាវរួមគ្នាលើការអនុវត្តហិរញ្ញប្បទានបៃតង និងការប្រយុទ្ធប្រឆាំងលើការប្រែប្រួលអាកាសធាតុ និង ការធានាបានការធ្វើកសិកម្មប្រកបដោយចីរភាព , កសិកម្មវ័យឆ្លាត និងធុនអាកាសធាតុ ។

លោកថាភាគីទាំងពីរនឹងធ្វើការចុះអនុស្សរណៈយោគយល់គ្នា រវាងធនាគារទាំងពីរ នៅពេលខាងមុខសំដៅពង្រឹងទំនាក់ទំនង និងការចែករំលែកព័ត៌មានក្នុងការផ្តល់ហិរញ្ញប្បទានដល់វិស័យកសិកម្ម។

លើសពីនោះទៅទៀត លោកក៏បានស្នើឱ្យមានការបង្កើតកម្មវិធីផ្តាស់ប្តូរបុគ្គលិករវាងធនាគារទាំងពីរដើម្បីផ្តាស់ប្តូរបទពិសោធន៍ការងារ និងចំណេះដឹង និងការចូលរួមសិក្សាស្រាវជ្រាវនៅនៅមជ្ឈមណ្ឌល (Center of excellence) របស់ APRACA នៅ ធនាគារ ARDB ដោយផ្តោតសំខាន់លើ ហិរញ្ញប្បទានបៃតងផងដែរ។

លោក QIAN WENHU បានបង្ហាញ នូវការគាំទ្រ សម្រាប់អ្វីដែល ភាគី ARDB បានលើក និងស្នើឡើង មកកាន់ ធនាគារ ADBC ។

លោកបានគូសបញ្ជាក់ថា៖« បេសកកម្ម របស់ធនាគារ ADBC និងធនាគារ ARDB ដូចគ្នា​ ពោលគឺការអនុវត្តគោលនយោបាយរបស់រដ្ឋាភិបាល។ ដូចនេះជំហានបន្ទាប់ លោក យល់ស្របជាមួយ ធនាគារ ARDB ដើម្បីបង្កើតក្រុមការងាររួម ដើម្បីសិក្សា លើ ការស្នើសុំរបស់ភាគី ARDB ដើម្បីឈានទៅដល់ការចុះអនុស្សរណៈយោគយល់គ្នា រវាងភាគីទាំងពីរនាពេលខាងមុខនេះ»៕