មនុស្ស១៤៨នាក់ ស្លាប់នៅនេប៉ាល់ ដោយសារទឹកជំនន់និងបំណាក់ដី ដ៏ធ្ងន់ធ្ងរ

គ្រោះធម្មជាតិនៅប្រទេសនេប៉ាល់ កំពុងធ្វើទុក្ខបុកម្នេញខ្លាំងដល់ប្រជាពលរដ្ឋ ដោយបើតាមការចុះផ្សាយរបស់ BBC, គិតត្រឹមថ្ងៃអាទិត្យទី២៩ខែកញ្ញាឆ្នាំ២០២៤ ចំនួនមនុស្សស្លាប់ព្រោះទឹកជំនន់និងបំណាក់ដី បានកើនឡើងដល់១៤៨នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីមនុស្សស្លាប់ នៅមានអ្នករបួសជាង១០០នាក់ទៀតទូទាំងប្រទេស ខណៈជាង៥០នាក់ កំពុងបាត់ខ្លួននៅឡើយ បន្ទាប់ពីភ្លៀងធ្លាក់ខ្លាំងដូចហែកមេឃរយៈពេល២ថ្ងៃ បានបង្កការជន់លិចតំបន់នានានៅជុំវិញរដ្ឋធានី កដ្ឋមណ្ឌូ។

តាមការបញ្ជាក់ពីក្រុមមន្ត្រី, ផ្លូវថ្នល់ធំៗជាច្រើនដែលតភ្ជាប់រដ្ឋធានី ទៅកាន់កន្លែងផ្សេងៗទូទាំងប្រទេស ត្រូវដីបាក់ពាំងផ្លូវមិនអាចធ្វើដំណើរបាន ហើយគ្រោះទឹកជំនន់ បានជន់លិចផ្ទះប្រជាជពលរដ្ឋលិចដល់ដំបូលឯណោះ។

ចំពោះហេតុការណ៍ដ៏រន្ធត់បំផុតគឺថា កីឡាករបាល់ទាត់ចំនួន៦នាក់ ត្រូវសម្លាប់នៅពេលដីបាក់សង្កត់លើទីលានហ្វឹកហាត់ក្នុងទីក្រុង Makwanpur ភាគនិរតីរដ្ឋធានី។

ទាក់ទិនគ្រោះធម្មជាតិនេះ អ្នកនាំពាក្យរដ្ឋាភិបាលលោក Prithvi Subba Gurung បានប្រាប់ទូរទស្សន៍រដ្ឋនេប៉ាល់ថា ទឹកជំនន់បានផ្តាច់ប្រព័ន្ធទឹកស្អាត ថែមទាំងប៉ះពាល់ដល់បណ្តាញទូរស័ព្ទនិងចរន្តអគ្គិសនីទៀតផង។

លើសពីនេះ ការធ្វើដំណើរតាមផ្លូវអាកាសក៏រងផលប៉ះពាល់ផងដែរកាលពីថ្ងៃសុក្រនិងថ្ងៃសៅរ៍ ដោយជើងហោះហើរក្នុងស្រុកជាច្រើន ត្រូវពន្យារពេល ឬលុបចោល។

ត្បិតតែឥឡូវស្ថានភាពហាក់ធូរស្រាលបន្តិចមែន ប៉ុន្តែគេព្យាករថា ភ្លៀងនឹងបន្តធ្លាក់រហូតដល់ថ្ងៃអង្គារ ដូច្នេះប្រជាជននេប៉ាល់ នៅតែត្រូវរក្សាការប្រុងប្រយ័ត្នជានិច្ច៕

អត្ថបទ៖ សុខ សុវណ្ណ

ចុចអាន៖ មនុស្សជិត ២០០នាក់បានស្លាប់នៅ​នេប៉ាល់ ដោយមហន្តរាយ​ទឹកជំនន់និងបំណាក់ដី