ព័ត៌មានអន្ដរជាតិ

អាហ្វ្រិកខាងត្បូងស៊ើបអង្កេតប្រឆាំងការលក់បង្ខូចតម្លៃរបស់វៀតណាម លើសំបកកង់រថយន្ត

បានផុស

៦ ខែ មុន

នៅ

ថ្ងៃចន្ទ ៣០ កញ្ញា ២០២៤

ដោយ

អាជ្ញាធរសំណងពាណិជ្ជកម្មវៀតណាម ចំណុះឱ្យក្រសួងឧស្សាហកម្ម និងពាណិជ្ជកម្ម បានឱ្យដឹងថា ប្រទេសអាហ្រ្វិកខាងត្បូងបានចាប់ផ្តើមការស៊ើបអង្កេតជាផ្លូវការ ប្រឆាំងនឹងការគេចពន្ធដែលអាចកើតមាន និងការលក់បង្ខូចតម្លៃ លើផលិតផលសំបកកង់រថយន្ត ឡានក្រុង និងឡានដឹកទំនិញ ដែលនាំចូលពីប្រទេសវៀតណាម ថៃ និងកម្ពុជា។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចាត់វិធានការយ៉ាងដូច្នេះរបស់អាហ្វ្រិកខាងត្បូង ធ្វើឡើងដោយផ្អែកលើការចោទប្រកាន់ថា ផលិតផលទាំងនេះកំពុងគេចពន្ធប្រឆាំងការលក់បង្ខូចតម្លៃ ដែលអាហ្វ្រិកខាងត្បូងបានដាក់រួចហើយទៅលើប្រភេទទំនិញស្រដៀងគ្នា នាំចូលពីប្រទេសចិន។

ផលិតផលដែលកំពុងស្ថិតក្រោមការស៊ើបអង្កេតរួមមានសំបកកង់រថយន្ត ឡានក្រុង និងឡានដឹកទំនិញ។ ដើមបណ្តឹងក្នុងករណីនេះ គឺសមាគមក្រុមហ៊ុនផលិតសំបកកង់អាហ្រ្វិកខាងត្បូង ដែលបានផ្តួចផ្តើមការស៊ើបអង្កេតនៅថ្ងៃទី ២០ ខែកញ្ញា ឆ្នាំ ២០២៤ ដោយចោទប្រកាន់ថា ក្រុមហ៊ុនវៀតណាមរួចចំណែកលើការលក់បង្ខូចតម្លៃគិតជាទឹកប្រាក់ រហូតដល់ ៨៤ ភាគរយ។

ជុំវិញបញ្ហានេះ អាជ្ញាធរពាណិជ្ជកម្មវៀតណាមបានស្នើថា សមាគម និងអ្នកផលិត និងអ្នកនាំចេញដែលពាក់ព័ន្ធ ត្រូវតែ ពិនិត្យឱ្យបានហ្មត់ចត់លើពាក្យសុំស៊ើបអង្កេត ការជូនដំណឹងផ្សេងៗ និងគោលការណ៍ណែនាំ និងបទប្បញ្ញត្តិដែលផ្តល់ដោយអាហ្វ្រិកខាងត្បូង។

លើសពីនេះទៀត អាជីវកម្មគួរតែពិចារណាលើការធ្វើពិពិធកម្មទីផ្សារនាំចេញរបស់ពួកគេ ព្រោះប្រសិនបើអាហ្រ្វិកខាងត្បូងដាក់ពន្ធប្រឆាំងការលក់បង្ខូចតម្លៃនោះ នោះប្រទេសសមាជិកផ្សេងទៀតនៃសហភាពគយអាហ្វ្រិកខាងត្បូង (រួមទាំងប្រទេស បុតស្វាណា ឡេសូថូ ណាមីប៊ី អាហ្វ្រិកខាងត្បូង និងអេស្វាទីនី) អាចនឹងចាត់វិធានការដូចគ្នា៕