ខេត្ត​រតនគិរី មានរោងចក្រ​កែច្នៃ​ម្សៅមី​មួយ​កន្លែង អាច​ផលិត ១.២០០ តោន/២៤ម៉ោង

ក្រៅពីសហគ្រាស​តូច​ធំ​ជាង ២០០ កន្លែង ខេត្ត​រតនគិរីមានការ​វិនិយោគ​សាងសង់រោងចក្រ​​កែច្នៃ​ម្សៅមី​សម្រាប់នាំ​ចេញ​ទៅ​ក្រៅ​ប្រទេស​។

​ស្ថិត​នៅ​ភាគ​ឦសាន​​មាន​ចម្ងាយ​ជាង ៥៨៨ គីឡូម៉ែត្រពីរាជធានី​ភ្នំពេញ សំបូរ​ជនជាតិ​ភាគតិច​រស់នៅ​​ ខេត្ត​រតនគិរី​មានធនធាន​ធម្មជាតិ​ដ៏​សំបូរ​បែប​ សម្រាប់​ទាក់ទាញ​ការ​វិនិយោគ។ ជាមួយរោងចក្រម្សៅមីដែល​កំពុង​ដំណើរការ​ផ្តល់​ការងារ​រាប់​រយ​កន្លែង​ដល់ពលរដ្ឋ​ក្នុងស្រុក ខេត្តរតនគិរីក៏មាន​​ក្រុមហ៊ុន​សម្បទាន​ដី​សេដ្ឋកិច្ច​ជាច្រើន​ក្រុមហ៊ុនកំពុង​​វិនិយោគ​ក្នុង​ខេត្ត។

ស្ថានភាពទូទៅនៃភូមិសាស្ត្រខេត្តរតនគិរី

ខេត្តរតនគិរីស្ថិតនៅ​ភាគឦសាន្ត មាន​ចម្ងាយពីរាជធានី​ភ្នំពេញ ៥៨៨ គីឡូម៉ែត្រ មាន​ព្រំប្រទល់​ខាង​លិច​ជាប់​នឹង​ខេត្តស្ទឹងត្រែង ខាងកើត​ជាប់នឹង​ខេត្តយ៉ាឡាយ និង​ខេត្តកន្ទុម នៃ​សាធារណរដ្ឋ​សង្គម​និយម​វៀតណាម​ប្រវែង ២១០គ.ម ខាងជើង​ជាប់​នឹង​ខេត្ត​អត្តពឺ​នៃ​សាធារណរដ្ឋ​ប្រជាធិបតេយ្យ​ប្រជាមានិត​ឡាវប្រវែង ១៦៥គ.ម និង​ខាងត្បូងជាប់នឹងខេត្តមណ្ឌលគិរី។

ភូមិសាស្ត្រ​ខេត្តជាតំបន់ ខ្ពង់រាបសម្បូរភ្នំ ជ្រោះជ្រលងដងអូរ និងព្រៃឈើគ្រប់ប្រភេទ ហើយ​មាន​ទន្លេ​ឆ្លងកាត់​ចំនួន ០២ គឺ​ទន្លេ​សេសាន និង​ទន្លេ​ស្រែពក។ ខេត្ត​មាន​ផ្ទៃដី​សរុប ១០.៧៨២​គីឡូម៉ែត្រ​ក្រឡា។

រដ្ឋបាល​ដែនដីត្រូវបានចែកជា ០១ ក្រុង ០៨ស្រុក ៤៦ឃុំ ០៤ សង្កាត់ និង២៤៣ភូមិ មាន​ច្រក​ទ្វារ​អន្តរជាតិ​មួយ​គឺ​ច្រក​ទ្វារ​អូរយ៉ាដាវ​ជាមួយ​ប្រទេស​វៀតណាម។

ស្ថានភាព​ប្រជាសាស្ត្រ

ផ្អែកតាមទិន្នន័យមូលដ្ឋានក្នុងឆ្នាំ២០២២. ប្រជាជន​សរុប​ចំនួន ២២៧.២២៧នាក់ ស្ត្រីសរុប ១១១.៨៧៣​ នាក់ ស្មើ៤៩,១៣% អត្រា​កំណើនប្រជាជន​ប្រចាំឆ្នាំ ២,០៣% គ្រួសារសរុបចំនួន ៥៥.២៦៣ គ្រួសារ និង​ស្ត្រីជា​មេគ្រួសារមាន ៨,៣៥% ទំហំគ្រួសារជាមធ្យម ៤នាក់/ គ្រួសារ និង​ដង់ស៊ីតេ​ប្រជាពលរដ្ឋ ១៩នាក់/គម២។ ចំណែកជនជាតិដើមភាគតិចមាន ៨អម្បូរ ស្មើ ៥៦,៨៦% នៃ​ប្រជាពលរដ្ឋ​សរុប។

អត្រា​គ្រួសារមានមុខរបរធ្វើកសិកម្មជាចម្បងចំនួន ៨២,៤% គ្រួសារមានមុខរបរធ្វើសិប្បកម្មជាចម្បង ចំនួន ០,៧% គ្រួសារមានមុខរបរសេវាកម្មជាចម្បងចំនួន ១៦,៩%។

ផលិតផលក្នុងស្រុក(GDP) សរុបសម្រាប់មនុស្សម្នាក់ឆ្នាំ២០១៨ ចំនួន ១.២៣៨ ដុល្លា/នាក់ ដល់ឆ្នាំ ២០១៩ ចំនួន ១.៣៦៤ដុល្លា/នាក់ មានកំណើនប្រចាំឆ្នាំ៨%។

វិស័យ​ហេដ្ឋារចនាសម្ព័ន្ធ​៖

ផ្លូវ​ជាតិ​ពី​ភ្នំពេញ​ទៅ​ទីរួម​ខេត្ត​រតនគិរី​មាន​ប្រវែងសរុប ៥៨៨ គ.ម និង​កំណាត់​ផ្លូវ​ជាតិ​ក្នុង​ខេត្តមាន ផ្លូវ​ជាតិ​លេខ ៧៦ (ប្រវែង ៦០.៧៣ គម) ផ្លូវ​ជាតិ​លេខ ៧៨ (ប្រវែង ១២៥.៥៤ គម) ផ្លូវ​ជាតិ​លេខ ៧៨-៥ (ប្រវែង ១៩១ គម) និង​ផ្លូវ​ជាតិ​លេខ ៧៨​សេ (ប្រវែង ៦០.៦៣ គម)។

វិស័យអភិវឌ្ឍន៍ជនបទ

ទស្សនវិស័យ​របស់​រាជរដ្ឋាភិបាល​កម្ពុជា បាន​កំណត់​ឆ្នាំ២០២៥ ប្រជាពលរដ្ឋនៅសហគមន៍​ជនបទ ត្រូវមាន​ការផ្គត់ផ្គង់ទឹកស្អាត និងអនាម័យគ្រប់គ្រាន់ និងរស់នៅក្នុងបរិស្ថានដែលមានអនាម័យ ប្រកប​ដោយ​និរន្តរភាព” រួមមាន៖

-អត្រាគ្របដណ្ដប់ទឹកស្អាតទូទាំងខេត្តមាន​ចំនួន ៧១,៧៦% កើន​ឡើង ១៤,១៦% ធៀប​នឹងឆ្នាំ ២០១៨ មាន​ត្រឹម ៥៧,៦០% អត្រាកំណើនក្នុងមួយឆ្នាំ ២,៨៣%។
– អត្រាអនាម័យជនបទ គ្របដណ្តប់ទូទាំងខេត្ត ៦០% កើន​ឡើង ២១% បើធៀបនឹងឆ្នាំ២០១៨ មាន​ត្រឹម ៣៩% អត្រាកំណើនក្នុងមួយឆ្នាំ ៤,២%។
– ផ្ទះ​ដែលមាន​បង្គន់អនាម័យប្រើប្រាស់សរុប​ចំនួន ២៣,៧៧៤ ខ្នងផ្ទះ​នៃ​ខ្នងផ្ទះសរុបចំនួន ៤៥.៨៤ ០ខ្នង ស្មើនឹង ៥១,៨៦%។
– ភូមិ​ដែលបានបញ្ឈប់ការបន្ទោរបង់ពាសវាលពាសកាល (ODF) ចំនួន ៥៥ ភូមិ ស្មើនឹង ៧ឃុំ និង ១​ស្រុក។

ថាមពលអគ្គិសនី

គិតត្រឹមឆ្នាំ២០២២ មាន​ប្រភព​អគ្គិសនី​ផ្គត់ផ្គង់​ចំនួន ៤ (អនុ​ស្ថានីយ​តាអង វារីអគ្គិសនី​អូរជុំ វារី​អគ្គិសនី​សេសាន​ក្រោម​២ និង​ពី​ប្រទេស​វៀតណាម)។ ភូមិមានអគ្គីសនីប្រើប្រាស់ចំនួន ២៣១/ ២៤៣ ភូមិ ស្មើនឹង ៩៥,៦% គ្រួសារ​មាន​អគ្គិសនីប្រើប្រាស់​ចំនួន ២៤.០១៣ គ្រួសារ ស្មើនឹង ៥១,៧%​។

អាកាសចរណ៍

ព្រលាន​យន្តហោះ​ថ្នាក់​ខេត្ត​បាន​ផ្អាក​ដំណើរការ​។

វិស័យកសិកម្ម រុក្ខាប្រមាញ់ និងនេសាទ

វិស័យកសិកម្ម ត្រូវបានចាត់ទុកជាវិស័យអាទិភាព ក្នុងការលើកកម្ពស់​សេដ្ឋកិច្ចរបស់ប្រជាពលរដ្ឋ ដោយ​អត្រាមុខរបរពឹងផ្អែកលើវិស័យកសិកម្មនៅក្នុងខេត្ត​មានចំនួន ៨១,១០% នៃប្រជាជនសរុប ហើយ​អត្រានេះ​មានការប្រែប្រួលតិចបំផុត។

ការ​វិនិយោគ​

នៅក្នុងខេត្តមានរោងចក្រកែច្នៃម្សៅមី ១ កន្លែង មានសមត្ថភាពផលិត ១.២០០តោន/២៤ម៉ោង (គិត​ជា​ម្សៅ​ពី ៣០០ តោន) ឆ្នាំ២០២២។ ក្រុមហ៊ុនបាននាំចេញម្សៅមីចំនួន ២.៦២២តោន តាម​ច្រកទ្វារ​អន្តរជាតិ​អូរយ៉ាដាវ។

ខេត្ត​ក៏​មាន​ក្រុមហ៊ុន​វិនិយោគ​សម្បទាន​ដី​សេដ្ឋកិច្ច​គិត​ត្រឹម​ឆ្នាំ ២០២២ មាន​ចំនួន ២៧ ក្រុមហ៊ុន។

សហគសធុនតូច នឹងមធ្យម

សហគ្រាសធុនតូច និងមធ្យម (SME) ត្រូវបានចាត់ទុកថាជាក្បាលម៉ាស៊ីននៃកំណើនសេដ្ឋកិច្ច ដោយ​បានរួមចំណែកក្នុងការអភិវឌ្ឍសេដ្ឋកិច្ច និងបង្កើតការងារក្នុង​មូលដ្ឋាន​។

នៅឆ្នាំ២០១៨ នៅក្នុងខេត្តមានសហគ្រាសធុនតូច និងមធ្យម ចំនួន ១៧៧ មូលដ្ឋាន មាន​កម្លាំង​ពលកម្ម​ចំនួន ៩៣១​នាក់ ដើមទុនសរុប ៤.៨០៦.៨៩៤ លានដុល្លារអាមេរិច និង​នៅ​ឆ្នាំ​២០២២ មាន​ចំនួន ២០១ មូលដ្ឋាន (កើនឡើង ២៤ មូលដ្ឋាន) មានកម្លាំងពលកម្ម ចំនួន ១.០៤៧នាក់ ដើមទុន​សរុប ៦.៦៨១.៣៩៨ដុល្លារអាមេរិច។

វិស័យទេសចរណ៍

រមណីយដ្ឋានទេសចរណ៍ក្នុងខេត្តរតនគិរីមានចំនួន ៣០ កន្លែង ក្នុងនោះរួមមាន រមណីយដ្ឋានធម្មជាតិ​ចំនួន ២០ កន្លែង រមណីយដ្ឋានវប្បធម៌ធម្មជាតិចំនួន ០២ កន្លែង និងកែច្នៃចំនួន ០៨ កន្លែង និង​សារមន្ទីរ ០១ កន្លែង។

រមណីយដ្ឋានធម្មជាតិ​មាន​ដូចជា (បឹងយក្សឡោម,ទឹកជ្រោះអូរស៊ិនលែរ៍,ទឹកធ្លាក់កា​ទៀង, ទឹកធ្លាក់​ចាអ៊ុង, បឹង​លំកុដ, ទឹកជួរ​តាតតៃ, វាលរំប្លង់, បឹងយក្សអោមយក្សការ៉ា, ទឹកធ្លាក់កាចាញ, បឹង​យក្សម៉ាយ,កោះ​សាំង, ទំនប់អូរភ្លង, អូរធម្មជាតិ​ថ្មរអិល,កោះ​សំពៅ, ទឹកធ្លាក់​អូរយ៉ាណាយ, ទឹក​ជួរទីង, កោះ​គ្រាំ, កោះ​កំប្រាច, ដែន​ជម្រកសត្វព្រៃលំផាត់, ឧទ្យានជាតិវីរៈជ័យ។

រមណីយដ្ឋានវប្បធម៌​មាន (តំបន់​វប្បធម៌​ជនជាតិ​ដើម​ភាគតិច វត្តឥសីបតមៈ និងភ្នំស្វាយ) និង​រមណីយដ្ឋានកែឆ្នៃ​មាន (ភូមិខ្មែរ រីសត,គង់វារី រីសត, មល្លិកា ​រីសត,ចម្ការ​ដូង រីសត, ជាងអេង រីសត)។

សណ្ឋាគារក្នុង​ខេត្ត​​មាន ១៣ កន្លែង និង​ផ្ទះសំណាក់ ៣២ កន្លែង មាន​ភោជនីយដ្ឋាន អាហារដ្ឋាន​ចំនួន ៣៨ កន្លែង

ធនធានធម្មជាតិ

ធនធានរ៉ែ (រ៉ែ​មាស រ៉ែ​សំណ-ទង់ដែង-សង្កស៊ី រ៉ែត្បូងថ្ម) និង​ដែនជម្រកសត្វព្រៃលំផាត់។

វិស័យសក្ដានុពល និងអាទិភាពសម្រាប់ការអភិវឌ្ឍនាពេលអនាគត

១. ទេសចរណ៍ធម្មជាតិ
២. កសិ-ឧស្យានកម្ម
៣. ធ្វើអាជីវកម្មធនធានរ៉
៤. កសិកម្ម (កៅស៊ូ កាហ្វេ…)
៥. វារីអគ្គិសនី

វិស័យសេដ្ឋកិច្ច និងទីផ្សារ

ផ្សាររដ្ឋ​មាន ៤ កន្លែង និង​ផ្សារឯកជន មាន ០១ កន្លែង

វិស័យ​សាសនា

វត្ត​អារាម​ព្រះពុទ្ធសាសនា​មាន​ចំនួន ៤០ កន្លែង វិហារ​គ្រឹស្តសាសនា​មាន​ចំនួន ២១ កន្លែង និង​វិហារ​ឥស្លាម​សាសនា​មាន​ចំនួន ១៨ កន្លែង៕