Update៖ អគ្គិភ័យឆេះឃ្លាំងសិប្បកម្មធ្វើពូក រាលដាលដល់ឃ្លាំងអេតចាយឆេះខូចខាតទាំងស្រុង

អគ្គិភ័យឆាបឆេះឃ្លាំងសិប្បកម្មផលិតពូក និងរាលដាលដល់ឃ្លាំងស្តុកអេតចាយយ៉ាងសន្ធោរសន្ធៅ ផ្អើលពលរដ្ឋ និង សមត្ថកិច្ចជួយអន្តរាគមន៍។

អគ្គិភ័យនេះបានកើតឡើងនៅវេលាម៉ោង៩និង៣០នាទីព្រឹក នៅតាមបណ្តោយផ្លូវបេតុង ទល់មុខវត្តតាភេម ក្នុងសង្កាត់កំបូល ខណ្ឌកំបូល រាជធានីភ្នំពេញ។

បើតាមប្រភពពីពលរដ្ឋនៅក្បែរនោះបានអោយដឹងថា មុនពេលកើតហេតុគេឮមានសម្លេងផ្ទុះ៣ទៅ៤ដង ទើបមួយសន្ទុះក្រោយមានក្លិនឈ្ងៀម និងផ្សែងហុយយ៉ាងសន្ធោរសន្ធៅចេញពីខាងក្រោយនៃឃ្លាំង។ ស្របពេលនោះដែរប្រជាពលរដ្ឋបាននាំគ្នាព្យាយាមយកបំពង់ពន្លត់អគ្គិភ័យបាញ់ពន្លត់អស់ជាច្រើនបំពង់ដែរ ប៉ុន្តែដោយសភាពឆាបឆេះកាន់តែខ្លាំងឡើង មិនអាចគ្រប់គ្រងបាន និងរាលដាលដល់ឃ្លាំងស្តុកអេតចាយចំនួន១ខ្នងទៀត។ ភ្លាមៗប្រជាពលរដ្ឋក៏បានរាយការណ៍ជូនសមត្ថកិច្ច ដើម្បីមកជួយអន្តរាគមន៍ការពារទប់ស្កាត់រាលដាលដល់ផ្ទះក្បែរខាង។

ប្រភពដដែលបានបន្តទៀតថា កាលពីប៉ុន្មានថ្ងៃមុន ឃ្លាំងខាងលើនេះបានដឹកកម្ទេចក្រណាត់មួយកុងទីនឺរពេញយកមកស្តុកទុកនៅឃ្លាំងនេះ។

ក្នុងហេតុការណ៍ឆាបឆេះនេះ បណ្តាលអោយឃ្លាំងប្រភេទថ្ម ដំបូលប្រក់ស័ង្កសី ចំនួន០២ ត្រូវបានអណ្ដាតភ្លើងឆាបឆេះទាំងស្រុង និងបានប្រើប្រាស់រថយន្តពន្លត់អគ្គិភ័យអស់ជាច្រើនគ្រឿង មានរថយន្តពន្លត់របស់ស្នងការរាជធានី រថយន្តកងពលតូចង៧០ រថយន្តពន្លត់ ៩១១ និងរថយន្តពន្លត់ស្រាបៀរកម្ពុជា។ ចំពោះមូលហេតុ សមត្ថកិច្ចបានសន្និដ្ឋានថា គឺមកពីឆ្លងចរន្តអគ្គិសនី៕

អត្ថបទ៖ រដ្ឋា