ព័ត៌មានអន្ដរជាតិ

លោក Ishiba ក្លាយជានាយករដ្ឋមន្ត្រីផ្លូវការរបស់ជប៉ុន

បានផុស

១ ខែ មុន

នៅ

ថ្ងៃអង្គារ ១ តុលា ២០២៤

ដោយ

Chheang

លោក Shigeru Ishiba ត្រូវបានសភាប្រកាសថាជានាយករដ្ឋមន្ត្រីថ្មីផ្លូវការរបស់ប្រទេសជប៉ុន នៅថ្ងៃអង្គារនេះ បន្ទាប់ពីលោកបានយកឈ្នះការបោះឆ្នោតក្លាយជាប្រធានគណបក្សប្រជាធិបតេយ្យសេរី (LDP) កាលពីថ្ងៃសុក្រសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតរដ្ឋមន្ត្រីការពារជាតិអាយុ ៦៧ឆ្នាំរូបនេះ បានឡើងកាន់អំណាចបន្តពីលោក Fumio Kishida ដែលប្រកាសពីការលាលែងពីតំណែងកាលពីខែសីហាកន្លងទៅ។ ការសម្រេចចិត្តលាលែងពីតំណែងរបស់លោក Kishida ធ្វើឡើងបន្ទាប់ពីបែកធ្លាយរឿងអាស្រូវជាច្រើនពាក់ព័ន្ធនឹងអំពើពុករលួយនៅក្នុងគណបក្ស LDP ទាក់ទិននឹងការកឹបកេងលុយដែលរៃអង្គាសបានរបស់បក្ស ហើយឈានដល់ការចាប់ខ្លួនមន្ត្រីជាប់ពាក់ព័ន្ធប៉ុន្មាននាក់ កាលពីខែមករា។

លោក Ishiba នឹងប្រកាសពីគណៈរដ្ឋមន្ត្រីថ្មីរបស់លោកនៅរសៀលថ្ងៃអង្គារ។

គួរបញ្ជាក់ថា នាយករដ្ឋមន្ត្រីថ្មីរូបនេះ កាលពីថ្ងៃចន្ទបានកំណត់យកថ្ងៃទី២៧ខែតុលាខាងមុខសម្រាប់ការរៀបចំការបោះឆ្នោតសភានៅប្រទេសជប៉ុន។ លោក Ishiba ថា៖ «ខ្ញុំជឿថាវាមានសារៈសំខាន់ដើម្បីឲ្យរដ្ឋបាលថ្មីទទួលបានការវិនិច្ឆ័យរបស់សាធារណជនឲ្យបានឆាប់តាមដែលអាចធ្វើទៅបាន»។

លោក Ishiba នឹងត្រូវបង្រួបបង្រួមការបែកបាក់នៅក្នុងបក្ស ហើយដោះស្រាយបញ្ហាដែលទំនងជាកើនឡើងបន្ថែមទៀតដោយសារវិបត្តិសេដ្ឋកិច្ចជប៉ុនសព្វថ្ងៃ ព្រោះការធ្លាក់នៃលុយយ៉េន ក៏ដូចជាការកើនឡើងភាពតានតឹងភូមិសាស្ត្រនយោបាយជាមួយប្រទេសចិន៕

ដោយ៖ ឈាង

Related Topics:ប្រទេសជប៉ុន