ព័ត៌មានអន្ដរជាតិ

ប្រមុខ UN ថ្កោលទោសអ៊ីរ៉ង់ ក្រោយអ៊ីស្រាអែល ដាក់សម្ពាធខ្លាំងពេក

បានផុស

២ នាទី មុន

នៅ

ថ្ងៃព្រហស្បតិ៍ ៣ តុលា ២០២៤

ដោយ

តាមការចុះផ្សាយរបស់ RT, អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសអ៊ីរ៉ង់ហើយ ចំពោះការវាយប្រហារលើប្រទេសអ៊ីស្រាអែល ដែលការថ្កោលទោសនេះកើតឡើងបន្ទាប់ពីអ៊ីស្រាអែល រិះគន់គាត់ដែលនៅស្ងៀមនិងហាមជាន់ដីរបស់ខ្លួន។

អគ្គលេខាធិការអង្គការសហប្រជាជាតិ លោក Antonio Guterres (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃអង្គារទី១ខែតុលាឆ្នាំ២០២៤, កងឆ្មាំបដិវត្តឥស្លាមអ៊ីរ៉ង់ (IRGC) បានបាញ់មីស៊ីលស្រោចលើអ៊ីស្រាអែល ដើម្បីសងសឹកចំពោះការសម្លាប់មេដឹកនាំក្រុមហាម៉ាសនិងហេសបូឡា នាពេលថ្មីៗនេះ។

ពាក់ព័ន្ធបញ្ហានេះ លោក Guterres បានប្រាប់ក្រុមប្រឹក្សាសន្តិសុខអង្គការសហប្រជាជាតិថា «ដូចទៅនឹងការវាយប្រហាររបស់អ៊ីរ៉ង់កាលពីខែមេសាដែរ ហើយរឿងដែលស្តែងចេញកាលពីម្សិលមិញ, ខ្ញុំសូមថ្កោលទោសយ៉ាងខ្លាំងក្លាជាថ្មីម្តងទៀត ចំពោះការវាយប្រហារដោយមីស៊ីលទ្រង់ទ្រាយធំរបស់អ៊ីរ៉ង់លើអ៊ីស្រាអែល»។

ការអត្ថាធិប្បាយរបស់គាត់ កើតឡើងមិនយូរប៉ុន្មានបន្ទាប់ពីរដ្ឋមន្ត្រីការបរទេសអ៊ីស្រាអែល លោក Israel Katz បានស្តីបន្ទោសប្រមុខ UN មិនសំចៃមាត់ ដែលមិនហ៊ានថ្កោលទោសការវាយប្រហារដ៏សាហាវរបស់អ៊ីរ៉ង់ ហើយអះអាងថា លោក Guterres មិនទាន់ទាំងស្តីឲ្យចំពោះការសម្លាប់រង្គាលនិងអំពើឃោរឃៅផ្លូវភេទ ដែលប្រព្រឹត្តដោយក្រុមហាម៉ាសកាលពីថ្ងៃទី៧ខែតុលាឬប្រកាសដាក់ក្រុមសកម្មប្រយុទ្ធប៉ាឡេស្ទីនថាជាអង្គការភេរវករផង។

សូមបញ្ជាក់ថា អ៊ីរ៉ង់បានបាញ់មីស៊ីលផ្លោងជាង១៨០គ្រាប់ដាក់អ៊ីស្រាអែល ចំពេលការប្រយុទ្ធគ្នារវាងក្រុមសកម្មប្រយុទ្ធហេសបូឡាដែលខ្លួនគាំទ្រនៅលីបង់និងអ៊ីស្រាអែល ក៏កំពុងពុះកញ្ជ្រោលដែរ។

ក្នុងចំណោមមីស៊ីលផ្លោងទាំងនោះ មីស៊ីលភាគច្រើនត្រូវស្ទាក់ចាប់បាននៅកណ្តាលអាកាស ប៉ុន្តែខ្លះបានទម្លាយសំណាញ់ការពារ ហើយទោះមីស៊ីលខ្លះបានធ្លាក់ចូលក្នុងទីក្រុងតែល អាវីវ ក៏ពិតមែន ប៉ុន្តែមិនមានអ្នករងរបួសឡើយ៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែលហាមអគ្គលេខាធិការ UN ចូលទឹកដីខ្លួន ក្រោយមិនថ្កោលទោសអ៊ីរ៉ង់