ក្រសួងរៀបចំដែនដី ឱ្យអតិថិជនរបស់បុរីមហាសេដ្ឋី ត្រៀមឯកសារ ដាក់ពាក្យស្នើសុំផ្ទេរកម្មសិទ្ធិ បញ្ចប់ទំនាស់

ក្រសួងរៀបចំដែនដី នគរូបនីយកម្ម និងសំណង់ បានប្រកាសឱ្យអតិថិជនរបស់បុរីមហាសេដ្ឋី ស្ថិតនៅភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ត្រៀមឯកសារពាក់ព័ន្ធ ដើម្បីដាក់ពាក្យស្នើសុំផ្ទេរកម្មសិទ្ធិ និងធ្វើបច្ចុប្បន្នកម្មទិន្នន័យនៅថ្ងៃទី ១១ ខែតុលា ឆ្នាំ ២០២៤ ខាងមុខនេះ។

ក្រសួងរៀបចំដែនដី បានសម្របសម្រួលស្វែងរកដំណោះស្រាយជាមួយម្ចាស់បុរីមហាសេដ្ឋី និងភាគីពាក់ព័ន្ធ ដើម្បីបញ្ចប់បញ្ហា ខណៈក្រសួងកកំពុងដំណើរការរៀបចំឯកសារ និងនីតិវិធី ដើម្បីឱ្យអតិថិជនមកដាក់ពាក្យស្នើសុំផ្ទេរកម្មសិទ្ធិចំពោះអតិថិជនដែលបានបង់ប្រាក់គ្រប់ចំនួន ១០០% និងធ្វើបច្ចុប្បន្នកម្មទិន្នន័យអតិថិជនដែលបង់ប្រាក់មិនទាន់គ្រប់ចំនួន។

កាលពីឆ្នាំ ២០១៧ ប្រជាពលរដ្ឋប្រមាណ ៥០ នាក់ ដែលជាអតិថិជនបុរីមហាសេដ្ឋី បានប្រមូលផ្ដុំគ្នាតវ៉ានៅមុខ ការិយាល័យលក់របស់បុរីមហាសេដ្ឋីទាមទារឱ្យម្ចាស់បុរីផ្ដល់ប័ណ្ណកម្មសិទ្ធិឱ្យពួកគាត់ទៅតាមកិច្ចសន្យា។

ឆ្លើយតបបញ្ហានេះ លោក សំ ចេក តំណាងម្ចាស់ក្រុមហ៊ុនបុរីមហាសេដ្ឋី ធ្លាប់បញ្ជាក់ថា ខាងបុរីមហាសេដ្ឋី​មិនបានបោកប្រាស់​អតិថិជន ដែល​បានចំណាយលុយ​មកទិញផ្ទះនៅក្នុងបុរី​មហាសេដ្ឋីនោះទេ តែខាងបុរី ទទួល​ស្គាល់ថា ពិតជាមានការ​យឺតយ៉ាវក្នុងការធ្វើប័ណ្ណកម្ម​សិទ្ធិជូនពួកគាត់មែនដោយសារ៖ ទី១. ប្រជាពលរដ្ឋខ្លះ បានទិញផ្ទះល្វែងបង់រំលួសពីបុរីដោយ ប្រើរយៈពេលវែងចាប់ពី១៧ឆ្នាំទៅ២០ឆ្នាំឯណោះ។ ទី.២ ពលរដ្ឋខ្លះទិញផ្ទះរួចតែ មិនទាន់ប្រគល់ថវិកាគ្រប់ចំនួននៅឡើយ។ ទី៣. អ្នកខ្លះ ទៀត ទិញផ្ទះបានហើយ តែបែរជាមកខ្ចីថវិកាពីខាងបុរីទៅវិញដើម្បីយកទៅពង្រីកមុខរបរអាជីវកម្មទទួលទានរបស់ខ្លួន។ទី៤. អ្នកទិញផ្ទះបាន តែបែជាចង់លក់វិញក៍មាន ទើបធ្វើឲ្យខាងបុរីមហាសេដ្ឋីមិនអាចផ្ដល់ប័ណ្ណកម្មសិទ្ធិជូនបាន៕

សេចក្ដីប្រកាសព័ត៌មានខាងក្រោម៖