ព័ត៌មានអន្ដរជាតិ

ហូឡង់ ត្រៀមលុយជាង៤០០លានដុល្លារ វិនិយោគលើគម្រោងស្រាវជ្រាវដ្រូនជាមួយអ៊ុយក្រែន

បានផុស

៤ ខែ មុន

នៅ

ថ្ងៃចន្ទ ៧ តុលា ២០២៤

ដោយ

Chheang

នៅអំឡុងទស្សនកិច្ចក្នុងទីក្រុងកៀវកាលពីថ្ងៃទី៦ខែតុលា លោក Ruben Brekelmans រដ្ឋមន្ត្រីក្រសួងការពារជាតិហូឡង់ បានប្រកាសថា ប្រទេសរបស់លោកនឹងវិនិយោគថវិកាចំនួន ៤៤០លានដុល្លារ លើការអភិវឌ្ឍដ្រូនជាមួយអ៊ុយក្រែន។

(រូបភាព៖ Twitter របស់ប្រធានាធិបតីអ៊ុយក្រែន)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Brekelmans បាននិយាយថា៖ «សង្គ្រាមពិតណាស់គឺតានតឹងជារៀងរាល់ថ្ងៃ ហើយអ៊ុយក្រែនកំពុងរៀបចំកងពលបន្ថែមទៀត ដែលសុទ្ធតែត្រូវការការគាំទ្រ និងសុទ្ធតែត្រូវការសម្ភារៈយោធា។ យើងត្រូវមានលំហូរនៃការគាំទ្រជាបន្តបន្ទាប់បែបនេះទៀត»។ លោករដ្ឋមន្ត្រី បានបញ្ជាក់ទៀតថា ផែនការអភិវឌ្ឍន៍ដ្រូននេះ នឹងច្របាច់បញ្ចូលគ្នារវាងបច្ចេកវិទ្យាថ្មីរបស់អ៊ុយក្រែន និងចំណេះដឹងរបស់ហូឡង់ ដើម្បីពង្រឹងសមត្ថភាពដ្រូននៅលើសមរភូមិ។

លោកបន្តថា គម្រោងនេះ នឹងផ្ដោតលើការផលិតដ្រូនប្រភេទផ្សេងៗគ្នាដូចជា ដ្រូនឈ្លបការណ៍ ដ្រូនការពារ និងដ្រូនប្រយុទ្ធ ហើយថវិកាវិនិយោគនឹងត្រូវបែងចែកពាក់កណ្ដាលនៅហូឡង់ និងនៅសេសសល់យកទៅធ្វើនៅអ៊ុយក្រែន និងបណ្ដាប្រទេសមួយចំនួនទៀត។ ប្រសិនបើគម្រោងអភិវឌ្ឍន៍ដ្រូននេះជោគជ័យ នោះថវិកាវិនិយោគបន្ថែមនឹងកើនឡើង។

ក្រៅតែពីរៀបរាប់អំពីគម្រោងអភិវឌ្ឍន៍ដ្រូន លោក Brekelmans ក៏បាននិយាយប្រាប់អ៊ុយក្រែនផងដែរថា ការវាយប្រហារគោលដៅយោធានៅរុស្ស៊ីគឺជាវិធីតែមួយគត់ដែលអាចការពារខ្លួនបាន។

អ៊ុយក្រែនធ្លាប់អំពាវនាវឲ្យសម្ព័ន្ធមិត្តរបស់ខ្លួនអនុញ្ញាតឲ្យប្រើប្រាស់សព្វាវុធរយៈចម្ងាយឆ្ងាយរបស់ពួកគេវាយចូលជ្រៅក្នុងប្រទេសរុស្ស៊ី ហើយក៏បានសំណូមពរសម្រាប់ជំនួយការពារដែនអាកាសថែមទៀតផងដែរ។

ហូឡង់ ដែលជាសម្ព័ន្ធមិត្ត បានផ្ដល់ជាជំនួយយន្តហោះចម្បាំង F-16 ប៉ុន្មានគ្រឿងរួចហើយទៅឲ្យអ៊ុយក្រែន ហើយត្រៀមបញ្ជូនបន្ថែមទៀតនៅប៉ុន្មានខែខាងមុខ ឬដើមឆ្នាំក្រោយ ដោយចំនួនសរុបមាន ២៤គ្រឿង។

សូមបញ្ជាក់ថា ហូឡង់ បានប្រកាសផ្ដល់ជំនួយយោធាចំនួន១០ពាន់លានអឺរ៉ូ សម្រាប់អ៊ុយក្រែន ចាប់តាំងពីការឈ្លានពានរបស់រុស្ស៊ីកាលពីខែកុម្ភៈឆ្នាំ២០២២។ បច្ចុប្បន្ន ហូឡង់បានចំណាយប្រហែល ៤ពាន់លានអឺរ៉ូឲ្យអ៊ុយក្រែនរួចមកហើយ៕

ដោយ៖ ឈាង

ចុចអាន៖ F-16 របស់ហូឡង់ បានទៅដល់ដៃអ៊ុយក្រែន ហើយ