ដូណាល់ ត្រាំ ប្រកាសនាំអាមេរិក ទៅភពអង្គារ

អំឡុងពេលបង្ហាញខ្លួនសាជាថ្មី នៅទីក្រុង Butler នៃរដ្ឋ Pennsylvania ដែលជាកន្លែងលោករួចជីវិតពីការធ្វើឃាតកាលពីខែកក្កដា, អតីតប្រធានាធិបតីអាមេរិក ដូណាល់ ត្រាំ បានប្រកាសក្តែងៗថា បើជាប់ឆ្នោត លោកនឹងនាំសហរដ្ឋអាមេរិក ទៅភពអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT កាលពីថ្ងៃអាទិត្យទី៦ខែតុលាឆ្នាំ២០២៤, លោក ត្រាំ បានប្រកាសធ្វើឲ្យសហរដ្ឋអាមេរិក ក្លាយជាមហាអំណាចក្នុងការរុករកនៅលំហអវកាស ដោយធ្វើឲ្យបានមុនពេលចប់អាណត្តិ ហើយក្នុងបេសកកម្មនោះនឹងមានការដឹកនាំដោយនាយកប្រតិបត្តិក្រុមហ៊ុន SpaceX គឺលោក Elon Musk ផ្ទាល់តែម្តង។

លោក ត្រាំ ប្រាប់ទៅអ្នកគាំទ្រថា «យើងនឹងដឹកនាំពិភពលោកក្នុងការរុករកនៅទីអវកាស។  យើងនឹងទៅដល់ភពអង្គារ មុនផុតអាណត្តិរបស់ខ្ញុំ។ Elon បានសន្យាជាមួយខ្ញុំហើយថា គាត់នឹងធ្វើរឿងនេះ។ យើងនឹងឈ្នះ ហើយគាត់នឹងទៅដល់ភពអង្គារនៅចុងបញ្ចប់នៃអាណត្តិរបស់យើង យើងនឹងនាំមុខប្រទេសចិន»។

ក្រៅពីការសន្យានាំអាមេរិកទៅភពក្រហមមុនឆ្នាំ២០២៨ លោក ត្រាំ ក៏ប្រកាសគោលនយោបាយប្រាប់ទៅអ្នកគាំទ្រផងដែរ ដោយប្តេជ្ញាបិទព្រំដែនភាគខាងត្បូងរបស់សហរដ្ឋអាមេរិក បញ្ចប់ជម្លោះអ៊ុយក្រែន បន្ទាបតម្លៃថាមពលនិងអតិផរណា។

សូមបញ្ជាក់ថា ពេលកាន់តំណែងអាណត្តិដំបូង លោក ត្រាំ បានចេញបញ្ជាប្រតិបត្តិជាច្រើន ទាក់ទងនឹងលំហ។ ជាក់ស្តែង នៅឆ្នាំ២០១៧ គាត់បានប្រគល់ភារកិច្ចឲ្យអង្គការណាសា ដឹកនាំការបញ្ជូនមនុស្សទៅកាន់ឋានព្រះចន្ទ សម្រាប់ប្រតិបត្តិការរុករករយៈពេលវែង ក្រោយមកនឹងធ្វើបេសកកម្មនាំមនុស្សទៅកាន់ភពអង្គារ និងគោលដៅផ្សេងទៀតជាបន្តបន្ទាប់។

លុះមកដល់ឆ្នាំ២០១៩ លោក ត្រាំ បានបង្កើតកងកម្លាំងអវកាសអាមេរិក បន្ថែមទៅលើកងយោធារបស់ប្រទេសនេះ ធ្វើឲ្យក្រុមប្រឆាំងរិះគន់គាត់ថា មានបំណងធ្វើទំនើបកម្មយោធានៅក្នុងលំហអវកាស៕

អត្ថបទ៖ សុខ សុវណ្ណ

ចុចអាន៖ មិនគួរឲ្យជឿ! រកឃើញ ភ្នំភ្លើងដ៏ធំមហិមា សំងំលាក់ខ្លួនលើភពអង្គារ