ព័ត៌មានជាតិ

៨ ខែ ឆ្នាំ ២០២៤ កម្ពុជាទទួលបានទេសចរបរទេសមកទស្សនាជាង ៤ លាននាក់

បានផុស

៦ ម៉ោង មុន

នៅ

ថ្ងៃអង្គារ ៨ តុលា ២០២៤

ដោយ

ក្នុងរយៈពេល ៨ ខែ ឆ្នាំ ២០២៤ កម្ពុជាទទួលបានទេសចរបរទេសមកទស្សនាជាង ៤ លាន ២ សែននាក់។ នេះបើតាមលោក តុប សុភ័ក្រ រដ្ឋលេខាធិការ និងជាអ្នកនាំពាក្យក្រសួងទេសចរណ៍បានឲ្យកម្ពុជាថ្មីដឹងនៅរសៀលថ្ងៃ ៧ ខែតុលា ឆ្នាំ ២០២៤។

បើធៀបរយៈពេលដូចគ្នាឆ្នាំ ២០២៣ ការវិលត្រឡប់របស់ទេសចរបរទេសសម្រេចបានប្រមាណជាង ៩៧% នៅក្នុងក្របខណ្ឌទូទាំងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ មន្រ្តីក្រសួងទេសចរណ៍រូបនេះបានបញ្ជាក់ថា ការងើបឡើងវិញនៃវិស័យទេសចរណ៍មានភាពខុសៗគ្នាតាមតំបន់គោលដៅទេសចរណ៍ដូចជា តំបន់អេកូទេសចរណ៍នៅភូមិភាគឦសាន តំបន់បេតិកភណ្ឌនៅខេត្តសៀមរាប និងតំបន់មាត់សមុទ្រ តែនិយាយជារួមក្នុងក្របខ័ណ្ឌទូទាំងប្រទេសការវិលត្រឡប់មកវិញនៃទេសចរបរទេសសម្រេចបានប្រហែល ៩៧%។

កម្ពុជាកំពុងស្តារវិស័យទេសចរណ៍ឡើងវិញ ហើយបើតាមការព្យាករណ៍ឆ្នាំ ២០២៤ កម្ពុជាអាចទទួលបានទេសចរបរទេសក្នុងរង្វង់ ៦ លាននាក់។ លោក តុប សុភ័ក្រ បានបន្តថា ចាប់ពីខែតុលានេះទៅ កម្ពុជានឹងទទួលបានកំណើនទេសចរអន្តរជាតិកាន់តែច្រើនថែមទៀត ខណៈជារដូវដែលទេសចរដើរកម្សាន្តច្រើន។

នៅឆ្នាំ ២០១៩ កម្ពុជាទទួលបានទេសចរបរទេសមកទស្សនាប្រមាណ ៦ លាន ៦ សែននាក់ ដែលជាកំណត់ត្រាខ្ពស់បំផុត។ យ៉ាងណាមិញ វិបត្តិជំងឺកូវីដបានធ្វើឲ្យប៉ះពាល់រំខានដល់ការធ្វើដំណើររបស់ភ្ញៀវទេសចរ។ ឆ្នាំ ២០២០ ទេសចរបរទេសធ្វើដំណើរមកទស្សនាប្រទេសកម្ពុជា បានថយចុះមកត្រឹមប្រមាណ ១ លាន ១ សែននាក់ និងនៅឆ្នាំ ២០២១ ធ្លាក់មកត្រឹម ១៩ ម៉ឺននាក់។ នៅឆ្នាំ ២០២២ ស្ថានភាពវិស័យទេសចរណ៍ប្រទេសកម្ពុជា ចាប់ផ្តើមងើបឡើងវិញបន្តិច ដោយកម្ពុជាទទួលបានទេសចរបរទេសមកទស្សនាប្រមាណ ២ លាន ២ សែន នាក់ ខណៈឆ្នាំ២០២៣ កម្ពុជាទទួលបានភ្ញៀវទេសចរបរទេសប្រមាណ ៥ លាន ៤ សែននាក់ កើនឡើង ១៣៩.៥% បើធៀបនឹងឆ្នាំ២០២២។

មន្រ្តីក្រសួងទេសចរណ៍បានអះអាងថា នៅឆ្នាំ ២០២៥ ការងើបឡើងវិញនៃវិស័យទេសចរណ៍របស់ប្រទេសកម្ពុជា នឹងវិលត្រឡប់ទៅរកស្ថានភាពដូចមុនវិបត្តិកូវីដ-១៩។

«ឆ្នាំ ២០២៣ លំហូរនៃការធ្វើដំណើររបស់ទេសចរបរទេស ចាប់ផ្តើមមានការកើនឡើង។ ឆ្នាំ ២០២៣ កម្ពុជាបានស្តារឡើងវិញនៃវិស័យទេសចរណ៍បាន ៨៣% ហើយឆ្នាំ ២០២៥ កម្ពុជារំពឹងនឹងឈានសម្រេចគោលដៅទទួលបានកំណើនភ្ញៀវទេសចរបរទេសដូចមុនវិបត្តិជំងឺកូវីដ»។ លោក តុប សុភ័ក្របញ្ជាក់បន្ថែម។

ជាមួយគ្នានេះ លោកក៏លើកឡើងពាក់ព័ន្ធការដាក់ឲ្យដំណើរការប្រព័ន្ធសាលាកបត្រចូលប្រទេស E arrival ដែលរដ្ឋាភិបាលបានដាក់ឲ្យដំណើរការនៅតាមច្រកព្រលានយន្តហោះអន្តរជាតិ ដែលបានជួយសម្រួលដល់ការធ្វើដំណើររបស់ភ្ញៀវទេសចរនិងអ្នកដំណើរមិនឲ្យមានការរំខាន ដែលធ្វើឲ្យចេញចូលកាន់តែមានភាពងាយស្រួល ប្រសើរជាងមុនក៏បានជួយទាក់ទាញទេសចរមកកម្សាន្តប្រទេសកម្ពុជាកាន់តែច្រើនថែមទៀត។

យ៉ាងណាមិញ លោក ខៀវ ធី ប្រធានសមាគមន៍មគ្គុទ្ទេសក៍ទេសចរអង្គរបានឲ្យកម្ពុជាថ្មីដឹងថា លោកមិនទាន់ហ៊ានរំពឹងទុកថា កំណើនទេសចរមកកម្សាន្តប្រទេសកម្ពុជា អាចនឹងមានស្ថានភាពល្អប្រសើរដូចមុនកូវីដ ដោយសារលោកមើលឃើញបញ្ហាមួយចំនួនបានសម្អុយឈ្មោះប្រទេសកម្ពុជា ឲ្យទេសចរបរទេសរារែកចិត្តក្នុងការធ្វើដំណើរមកទស្សនាប្រទេសកម្ពុជា។

លោកលើកឡើងករណីការផ្សព្វផ្សាយពីករណីឆបោកតាមអនឡាញ បញ្ហាចាប់ជំរិតរួមទាំងបញ្ហាសន្តិសុខសុវត្ថិភាពដែលបានប៉ះពាល់ដល់អារម្មណ៍ភ្ញៀវទេសចរ។

ជាមួយគ្នានេះ កង្វះខាតការតភ្ជាប់នៃការធ្វើដំណើររបស់ទេសចរ ដែលត្រូវចំណាយខ្ពស់បើធៀបប្រទេសជិតខាង ក៏បង្អាក់ទាក់ទាញទេសចរមកកម្សាន្តប្រទេសកម្ពុជាផងដែរ៕