ម៉ាឡេស៊ី​​អាច​ទទួល​ផល​ដោយ​ប្រយោលពី​គោលនយោបាយ​ជំរុញសេដ្ឋកិច្ចរបស់​ចិន​

អ្នកជំនាញ​និយាយ​ថា​ ម៉ាឡេស៊ីទំនងជានឹងទទួលបានអត្ថប្រយោជន៍ដោយប្រយោលពីវិធានការជំរុញសេដ្ឋកិច្ចថ្មីៗរបស់ប្រទេសចិន ដែលរួមមាន​ការកាត់បន្ថយអត្រាការប្រាក់ និងវិធានការជំរុញ​ទីផ្សារអចលនទ្រព្យ ​ដោយភាព​រឹង​មាំនៃ​សេដ្ឋកិច្ចចិន​នឹង​ជំរុញ​​ឱ្យមានតម្រូវការទំនិញ និងសេវាកម្មជាដើម​។

សេដ្ឋវិទូ និងជាជំនួយការអ្នកគ្រប់គ្រងស្រាវជ្រាវនៅវិទ្យាស្ថានម៉ាឡេស៊ីសម្រាប់កិច្ចការប្រជាធិបតេយ្យ និងកិច្ចការសេដ្ឋកិច្ច (IDEAS) លោកស្រី​ Doris Liew បាននិយាយថា វិធានការគាំទ្រទីផ្សារអចលនទ្រព្យ​ក្នុងប្រទេសចិន ដូច​ជា​ការកាត់បន្ថយអត្រាការប្រាក់ និងតម្រូវការបង់រំលោះ អាចបង្កើនធន​សម្រាប់អ្នកប្រើប្រាស់ក្នុងការចំណាយលើទំនិញ និងសេវាកម្មផ្សេងទៀត ដែល​នឹង​ធ្វើឱ្យសេដ្ខកិច្ចចិន​មាន​ភាព​សន្ទុះ​ខ្លាំង​ឡើង​វិញ។

​ដោយចិន​គឺជាដៃគូពាណិជ្ជកម្មដ៏សំខាន់មួយ​សម្រាប់ម៉ាឡេស៊ី​ ការងើបឡើងវិញនៃសេដ្ឋកិច្ចរបស់ប្រទេស​នេះ​ នឹងមានភាពវិជ្ជមានសម្រាប់ម៉ាឡេស៊ី ហើយ​វិស័យដែល​អាច​ទទួល​ផល​រួម​មាន​ ​​វិស័យ​ទេសចរណ៍ ផលិតកម្ម ប្រេងដូង ប្រេង និង​ឧស្ម័នជាដើម​។

ភ្ញៀវទេសចរណ៍មក​ពីចិន ស្ថិតក្នុងចំណោមភ្ញៀវទេសចរកំពូលៗទាំង៥​របស់​ម៉ាឡេស៊ី​ក្នុង​ឆមាសទី១​នៃ​ឆ្នាំ​នេះ​ ដោយ​រួមចំណែក​ប្រមាណ ១,៤៤ លាន​នាក់​។ ​​

យ៉ាងណា​មិញ លោកស្រី​ Doris បានពន្យល់ថា ភាពទន់ខ្សោយជារួមនៃសេដ្ឋកិច្ចចិន គួបផ្សំនឹងអត្រាគ្មានការងារធ្វើខ្ពស់ ជាពិសេសក្នុងចំណោមមនុស្សវ័យក្មេង និង​ការ​អូស​បន្លាយ​នៃ​វិបត្តិអចលនទ្រព្យ​ អាចកំណត់ប្រសិទ្ធភាពនៃ​គោលនយោបាយ​ជំរុញ​សេដ្ឋកិច្ចចិន​។ អ្នកប្រើប្រាស់អាចនៅតែបន្ត​ប្រុងប្រយ័ត្នចំពោះការចំណាយ ដោយសារតែភាពមិនច្បាស់លាស់អំពីស្ថិរភាពហិរញ្ញវត្ថុនាពេលអនាគតរបស់ពួកគេ។

​