ចំនួនមនុស្សស្លាប់ដោយសារព្យុះកំណាច Milton នៅរដ្ឋ Florida កើនឡើងកាន់តែច្រើន

គិតត្រឹមព្រឹកថ្ងៃសុក្រទី១១ខែតុលាឆ្នាំ២០២៤ ចំនួនមនុស្សស្លាប់ដោយសារព្យុះកំណាចMilton នៅរដ្ឋ Florida បានកើនដល់១៦នាក់ហើយ ខណៈគេបារម្ភថា តួលេខជនរងគ្រោះនឹងបន្តឡើងបន្ថែមទៀត ព្រោះនៅមានមនុស្សជាច្រើនកំពុងបាត់ខ្លួន។ នេះបើតាមការចុះផ្សាយរបស់ BBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Milton បានវាយប្រហាររដ្ឋ Florida ក្នុងនាមព្យុះប្រភេទទី៣ ជាមួយកម្លាំង២០៥គីឡូម៉ែត្រក្នុងមួយម៉ោង ហើយឥទ្ធិពលរបស់វា បង្កើតឲ្យមានខ្យល់កួចយ៉ាងសាហាវ ភ្លៀងផ្គររន្ទះ និងទឹកជំនន់ទូទាំងតំបន់តែម្តង។

ក្រៅពីឆក់យកជីវិតមនុស្ស ព្យុះ Milton ក៏បង្កទុកវេទនាដល់មនុស្សរាប់លាននាក់ផងដែរ ពោលគឺបានផ្តាច់អគ្គិសនីដល់ផ្ទះជាង៣.៣លានខ្នងនិងអាជីវកម្មរាប់ម៉ឺនកន្លែង។

នៅទីក្រុង Tampa និង St. Petersburg, ទឹកភ្លៀងបានធ្លាក់ចុះក្នុងកម្រិត ៤១សង់ទីម៉ែត្រ បង្កជាជំនន់រហ័ស ជន់លិចភាគខាងលិចនិងកណ្តាលរដ្ឋ Florida។

ស្របពេលជាមួយគ្នានោះ បើតាមការបញ្ជាក់ពីអភិបាលរដ្ឋ, ព្យុះ Milton បានបង្កឲ្យមានខ្យល់ខួចធំៗយ៉ាងសាហាវចំនួន១៩ ដោយកួចកម្ទេចផ្ទះ១២៥ខ្នង ភាគច្រើនជាផ្ទះចល័ត។

សូមបញ្ជាក់ជាថ្មី Milton គឺជាព្យុះសង្ឃរាកាចសាហាវបំផុតដែលទីក្រុង Tampa មិនធ្លាប់ជួបប្រទះសោះនៅក្នុងប្រវត្តិសាស្រ្តរយៈពេលជាង១០០ឆ្នាំ។

ត្បិតតែភ្លាមៗមិនទាន់មានរបាយការណ៍ច្បាស់ៗអំពីទំហំនៃការខូចខាត ប៉ុន្តែគេប៉ាន់ស្មានថា កំពូលព្យុះសង្ឃរានេះ នឹងបង្កការខូចខាតដល់សេដ្ឋកិច្ចអស់ទឹកប្រាក់រាប់ពាន់លានដុល្លារឯណោះ៕

អត្ថបទ៖ សុខ សុវណ្ណ

ចុចអាន៖ ទៅដល់រដ្ឋ Florida ហើយ! កំពូលព្យុះ Milton ចាប់ផ្តើមសម្លាប់មនុស្សនិងបង្កការបំផ្លិចបំផ្លាញ