៩ខែក្នុងឆ្នាំ២០២៤ ការអនុវត្តយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ សម្រេចបានជាង១៣ម៉ឺនសំណុំរឿង

ក្នុងរយៈពេល៩ខែក្នុងឆ្នាំ២០២៤ សាលាដំបូងរាជធានី ខេត្តទូទាំងប្រទេសបានជំរុញ និងពន្លឿនការដោះស្រាយរឿងក្តីសរុបជាង១៣ម៉ឺនសំណុំរឿង ក្នុងចំណោមសំណុំរឿងជាង១៨ម៉ឺនសំណុំរឿង។

លោក ជិន ម៉ាលីន រដ្ឋលេខាធិការក្រសួងយុតិ្តធម៌ និងជាអ្នកនាំពាក្យក្រសួងយុត្តិធម៌បានឲ្យដឹងថា សំណុំរឿងទាំងអស់មានទាំងសំណុំរឿងព្រហ្មទណ្ឌ សំណុំរឿងរដ្ឋប្បវេណី និងសំណុំរឿងដទៃទៀតនៅទូទាំងប្រទេសសរុបចំនួន ១៨០ ៦៦១ សំណុំរឿង និងត្រូវបានគណៈបញ្ជាការដឹកនាំយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និង យុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការបានចំនួនសរុប ១៣២ ៨០៥ សំណុំរឿង ស្មើនឹង ៧៣,៥១% នៃសំណុំរឿងទាំងអស់។

សូមបញ្ជាក់ថា កាលពីថ្ងៃទី១០ ខែតុលា ឆ្នាំ២០២៤ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានគណៈបញ្ជាការដឹកនាំយុទ្ធនាការ បានដឹកនាំកិច្ចប្រជុំបូកសរុបលទ្ធផលការងាររយៈពេល៩ខែ នៃការអនុវត្ត យុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ ដែលត្រូវបានប្រកាសដាក់ចេញកាលពីថ្ងៃទី៩ ខែមករា ឆ្នាំ២០២៤ កន្លងទៅ។ កិច្ចប្រជុំនេះមានការចូលរួមពីសំណាក់ថ្នាក់ដឹកនាំនៃគណៈបញ្ជាការដឹកនាំយុទ្ធនាការ និងសាលាជម្រះក្តី និងអង្គការអយ្យការអមសាលាជម្រះក្តីគ្រប់ជាន់ថ្នាក់ទូទាំងប្រទេស។ ទន្ទឹមនេះសាលាជម្រះក្តី និងអង្គការអយ្យការអមសាលាជម្រះក្តីគ្រប់ជាន់ថ្នាក់នៅទូទាំងប្រទេស បានដោះស្រាយវិវាទ ជូនប្រជាពលរដ្ឋ តាមរយៈការសម្រុះសម្រួលផ្សះផ្សាបានចំនួន ២៧៤ ករណី។

គណៈបញ្ជាការដឹកនាំយុទ្ធនាការ បានសម្តែងនូវការកោតសរសើរ និងវាយតម្លៃខ្ពស់ចំពោះលទ្ធផលដែលសម្រេចបានខាងលើ ដែលនេះគឺជាការបង្ហាញអំពីការយកចិត្តទុកដាក់ប្រកបដោយការទទួលខុសត្រូវខ្ពស់របស់សាលាជម្រះក្តី និងអង្គការ អយ្យការអមសាលាជម្រះក្តីគ្រប់ជាន់ថ្នាក់នៅទូទាំងប្រទេស ក្នុងការដោះស្រាយរឿងក្តីឱ្យបានឆាប់រហ័សជូន ប្រជាពលរដ្ឋ៕

អត្ថបទ៖ សុភា