អគ្គនាយកពន្ធនាគារ ចុះពិនិត្យប្រព័ន្ធធារាសាស្រ្ត ដើម្បីត្រៀមការដ្ឋានសាងសង់ពន្ធនាគារខត្តកែប

នាថ្ងៃទី១១ ខែតុលា ឆ្នាំ២០២៤ ឧត្តមអគ្គានុរក្សថ្នាក់លេខ១ ឈន សាណាត អគ្គនាយកនៃអគ្គនាយកដ្ឋានពន្ធនាគារ បានចុះពិនិត្យប្រព័ន្ធធារាសាស្រ្ត ដើម្បីត្រៀមការដ្ឋានសាងសង់ពន្ធនាគារខត្តកែប ដែលមានវត្តមានអមដំណើរដោយអគ្គនាយករង ប្រធាននាយកដ្ឋាន ប្រធានពន្ធនាគារ និងមន្រ្តីជំនាញពាក់ព័ន្ធ។

ក្នុងដំណើរការត្រួតពិនិត្យនេះ លោកឧត្តមអគ្គានុរក្សថ្នាក់លេខ១ ឈន សាណាត បានណែនាំដល់ពន្ធនាគារខេត្តកែប ពិនិត្យមើលប្រភពទឹកដែលហូរធ្លាក់ពីលើភ្នំចូលស្រះ ហើយត្រូវយកទឹកក្នុងស្រះស្តុកទឹកទុក ហើយសហការជាមួយមន្ទីរពិសោធន៍យកទៅពិនិត្យ ដើម្បីជៀសវាងមានសារធាតុធ្វើឱ្យប៉ះពាល់ដល់សុខភាព។

បន្ថែមពីនេះ ត្រូវឈូសឆាយ កាប់ដីភ្នំត្រូវមានលក្ខណៈស្តង់ដា ត្រៀមគម្រោងរៀបចំរបងកំផែង ត្រួតពិនិត្យប្លង់ និងព្រុំប្រទល់ឱ្យបានច្បាស់លាស់ ព្រមទាំងត្រៀមរៀបចំការដ្ឋានសាងសង់អគារឃុំឱ្យបានឆាប់រហ័ស៕