ណាតូ ជួបប្រជុំនៅសប្តាហ៍ក្រោយ ដើម្បីរកយុទ្ធសាស្រ្តថ្មី តតាំងជាមួយរុស្ស៊ី 

តាមការចុះផ្សាយរបស់សារព័ត៌មាន Politico កាលពីថ្ងៃសៅរ៍ទី១២ខែតុលាឆ្នាំ២០២៤, នៅសប្តាហ៍ក្រោយនេះ រដ្ឋមន្ត្រីការពារជាតិនៃបណ្តាប្រទេសជាសមាជិកអង្គការណាតូ នឹងជួបប្រជុំគ្នាក្នុងទីក្រុងព្រុចសែលនៃប្រទេសបែលហ្ស៊ិក ដើម្បីរៀបចំយុទ្ធសាស្ត្រថ្មីជំនួសយុទ្ធសាស្រ្តអាយុកាលរាប់ទសវត្សរ៍របស់ខ្លួនពាក់ព័ន្ធទំនាក់ទំនងជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្ន ទំនាក់ទំនងរវាងអង្គការណាតូនិងរុស្ស៊ី កំពុងធ្លាក់ចុះដល់កម្រិតទាបបំផុត ក្រោយផ្ទុះជម្លោះអ៊ុយក្រែនក្នុងខែកុម្ភៈឆ្នាំ២០២២ ហើយត្បិតមានបញ្ហានេះក៏ពិតមែន ប៉ុន្តែច្បាប់ Founding Act របស់សម្ព័ន្ធភាពដឹកនាំដោយអាមេរិកមួយនេះ ជាមួយទីក្រុងមូស្គូ នៅតែជាធរមាន។

យោងតាមប្រភពខាងលើ, ឯកសារឆ្នាំ១៩៩៧ ដែលចែងថា ណាតូនិងរុស្ស៊ី មានគោលដៅរួមត្រូវកសាងអឺរ៉ុបដែលមានស្ថិរភាព សន្តិភាព និងគ្មានការបែងចែកនោះ គឺមិនឆ្លុះបញ្ចាំងពីស្ថានភាពបច្ចុប្បន្នទេ។

រម្លឹកទៅក្នុងអំឡុងពេលកិច្ចប្រជុំកំពូលនៅទីក្រុងវ៉ាស៊ីនតោនកាលពីខែកក្កដា អង្គការណាតូបានចាត់ទុកទីក្រុងមូស្គូថាជាការគំរាមកំហែងដ៏សំខាន់បំផុតនិងដោយផ្ទាល់ចំពោះសន្តិសុខរបស់សម្ព័ន្ធមិត្ត ចំណែកប្រទេសរុស្ស៊ីនៅតែបន្តអះអាងថា ការពង្រីកទៅភាគខាងកើតរបស់ប្លុកនេះ គឺជាគ្រោះថ្នាក់សម្រាប់ខ្លួនដែរ។

ដូច្នេះពេលនេះ បណ្តាប្រទេសណាតូកំពុងព្យាយាមរៀបយុទ្ធសាស្ត្រយុទ្ធសាស្រ្តផ្សេងៗដើម្បីតតាំងជាមួយរុស្ស៊ី និងជំរុញកិច្ចពិភាក្សានៅក្នុងសម្ព័ន្ធភាព លើប្រធានបទធំៗដូចជាអនាគតនៃច្បាប់ Founding Act ជាដើម។

យ៉ាងណា អ្វីដែលគេបារម្ភអំពីការរីកធំនៃជម្លោះនោះគឺថា កាលពីដើមសប្តាហ៍នេះ អនុរដ្ឋមន្ត្រីការបរទេសរុស្ស៊ី លោក Aleksandr Grushko និយាយថា ណាតូ លែងលាក់បាំងការពិតទៀតហើយថាខ្លួនកំពុងរៀបចំសម្រាប់ជម្លោះយោធាដ៏មានសក្តានុពលជាមួយទីក្រុងមូស្គូ ហើយណាតូកំពុងប្រឈមមុខជម្លោះដោយផ្ទាល់ជាមួយរុស្ស៊ី ជុំវិញការបញ្ជូនសព្វាវុធជាបន្តទៅឲ្យអ៊ុយក្រែន៕

អត្ថបទ៖ សុខ សុវណ្ណ

ចុចអាន៖ អង្គការណាតូនឹង​ធ្វើសមយុទ្ធ​ទ្រង់​ទ្រាយ​ធំ​ប្រចាំឆ្នាំសប្តាហ៍​ក្រោយ​ ខណៈរុស្ស៊ីគំរាមលោកខាងលិច