កូរ៉េខាងជើង ផ្តាំទៅកូរ៉េខាងត្បូងថា បើដ្រូននៅតែហោះមកទៀត គ្រាប់កាំភ្លើងធំនឹងហោះទៅវិញ

លើកនេះ ប្រទេសកូរ៉េខាងជើងបានព្រមានខ្លាំងៗនិងផ្តាំផ្ញើទៅកូរ៉េខាងត្បូងថា កងទ័ពនៅខ្សែត្រៀមជួរមុខនឹងមិនអត់ធ្មត់ទៀតឡើយ ហើយបើសិនដ្រូននិងខិត្តប័ណ្ណនៅតែបន្តហោះចូលទីក្រុងព្យុងយ៉ាង នោះគ្រាប់កាំភ្លើងធំនឹងហោះទៅវិញហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសុក្រទី១១ខែតុលា កូរ៉េខាងជើងបានចោទកូរ៉េខាងត្បូងរួចទៅហើយថា បានបញ្ជូនដ្រូនឲ្យមកទម្លាក់ខិត្តប័ណ្ណឃោសនាលើទីក្រុងព្យុងយ៉ាង ចំនួនបីដងក្នុងខែនេះ ហើយក៏គំរាមឆ្លើយតបដោយកម្លាំងដែរ ប្រសិនបើរឿងនេះកើតឡើងម្តងទៀត។

មកដល់ថ្ងៃអាទិត្យ ក្រសួងការពារជាតិកូរ៉េខាងជើងបានចេញសេចក្តីថ្លែងការណ៍ថា កងទ័ពបានចេញបញ្ជាដល់កងកាំភ្លើងធំនិងអង្គភាពផ្សេងទៀតដែលស្ថិតនៅជិតព្រំដែនជាមួយកូរ៉េខាងត្បូង ឲ្យត្រៀមលក្ខណៈវាយប្រហារគោលដៅសត្រូវ បើឃើញដ្រូនហោះឆ្លងដែនម្តងទៀត។

តាមការបញ្ជាក់ពីអ្នកនាំពាក្យដដែល, ភាពតានតឹងផ្នែកយោធាយ៉ាងធ្ងន់ធ្ងរ កំពុងកើតមាននៅលើឧបទ្វីបកូរ៉េ ដោយសារតែដ្រូនរបស់កូរ៉េខាងត្បូង ហើយបើកូរ៉េខាងជើង វាយប្រហារចាស់ដៃមែន ទឹកដីកូរ៉េខាងត្បូងទាំងមូល នឹងរលាយក្លាយទៅជាផេះមិនខាន។

នេះមិនមែនជាលើកទីមួយឡើយ ដែលកូរ៉េខាងជើង ព្រមានប្រើពាក្យពេចន៍ធ្ងន់ៗបែបនេះ ​ក្នុង​គ្រា​មាន​ជម្លោះកាន់តែខ្លាំង​ជាមួយ​កូរ៉េខាងត្បូង និង​សហរដ្ឋអាមេរិក​។

ទំនាក់ទំនងរវាងកូរ៉េទាំងពីរនៅតែតានតឹងចាប់តាំងពីកិច្ចខិតខំផ្នែកការទូតដឹកនាំដោយសហរដ្ឋអាមេរិកស្តីពីការបញ្ចប់កម្មវិធីនុយក្លេអ៊ែររបស់កូរ៉េខាងជើង បានដួលរលំនៅឆ្នាំ២០១៩ ហើយចាប់តាំងពីពេលនោះមក កូរ៉េខាងជើងរឹតតែពង្រីកឃ្លាំងអាវុធនុយក្លេអ៊ែររបស់ខ្លួន ហើយតែងគំរាមបាញ់នុយក្លេអ៊ែរវាយប្រហារកូរ៉េខាងត្បូង និងសហរដ្ឋអាមេរិក៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើង​ចោទ​កូរ៉េខាងត្បូង​ថា​បង្ហោះ​ដ្រូន​ចូល​ព្យុងយ៉ាង​ និងគំរាម​ឆ្លើយ​តបចាស់​ដៃ​​