ស្រីលង្កាបិតសាលាខណៈទឹកជំនន់វាយលុកស្ទើរពេញប្រទេស

ប្រទេសស្រីលង្កាបានប្រកាសបិទសាលារៀននៅក្នុងរដ្ឋធានីកូឡុំបូ និង​តំបន់​ជាយក្រុង​នេះ​​ ខណៈដែលភ្លៀងធ្លាក់ខ្លាំងបានបង្កឲ្យមានទឹកជំនន់នៅតំបន់ជាច្រើននៃប្រទេសនេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​AP។​

ភ្លៀងធ្លាក់ខ្លាំងកាលពីចុងសប្តាហ៍នេះ បានធ្វើឱ្យមានការបំផ្លិចបំផ្លាញនៅក្នុងផ្នែកជាច្រើននៃប្រទេស ដោយបានជន់លិចផ្ទះ វាលស្រែ និងផ្លូវថ្នល់។ មនុស្ស​៣​នាក់បានលង់ទឹកស្លាប់ ខណៈដែលមនុស្សប្រហែល ១៣៤០០០ នាក់បានរង​ផល​ប៉ះពាល់​ដោយ​ទឹកជំនន់នេះ។ នេះបើយោងតាមមជ្ឈមណ្ឌលគ្រប់គ្រងគ្រោះមហន្តរាយរបស់ប្រទេស។

ភ្លៀងធ្លាក់ខ្លាំងនិងទឹកជំនន់បានធ្វើឱ្យខូចខាតផ្ទះចំនួន ២៤០ ហើយមនុស្សជិត ៧០០០នាក់ ត្រូវបានជម្លៀសចេញ ខណៈ​អាជ្ញាធរ​បាន​កាត់​ចរន្ត​អគ្គិសនី​នៅ​តំបន់​មួយ​ចំនួនដើម្បីជា​ការ​ប្រុង​ប្រយ័ត្ន។ កងទ័ពជើងទឹក និងកងទ័ពត្រូវបានដាក់ពង្រាយដើម្បីជួយសង្គ្រោះជនរងគ្រោះ ផ្តល់អាហារ និងសម្ភារៈចាំបាច់ផ្សេងៗទៀត ខណៈទឹកជំនន់នៅ​តំបន់​ខ្លះ ទឹក​បាន​​ចូល​​ដល់​​ដំបូល​ផ្ទះ និងដំបូល​ហាង។

ប្រទេសស្រីលង្កាបានកំពុងប្រឈមមុខនឹងស្ថានភាពអាកាសធាតុធ្ងន់ធ្ងរចាប់តាំងពីខែឧសភា ដែលភាគច្រើនបណ្តាលមកពីភ្លៀងមូសុងខ្លាំង។ កាលពីខែមិថុនា មនុស្ស១៦​នាក់បានស្លាប់ដោយសារទឹកជំនន់ និងបំណាក់ដី ខណៈប្រទេសផ្សេង​​ទៀត​នៅអាស៊ីអាគ្នេយ៍បានកំពុងប្រឈមនឹងបញ្ហាអាកាសធាតុប្រែប្រួល ដែលបង្កឲ្យមានព្យុះកំណាច និងទឹកជំនន់ធ្ងន់ធ្ងរសម្លាប់មនុស្សរាប់សិបនាក់ និងការបំផ្លិតបំផ្លាញធ្ងន់ធ្ងរ៕

អត្ថបទ៖ ប៊ុន សុភាព