ព័ត៌មានជាតិ

មន្ត្រីជលផលកំពង់ចាម បន្តចុះបង្ក្រាបឧបករណ៍នេសាទខុសច្បាប់ នៅភូមិសាស្ត្រស្រុកព្រៃឈរ

បានផុស

៤ ខែ មុន

នៅ

ថ្ងៃអង្គារ ១៥ តុលា ២០២៤

ដោយ

មន្ត្រីខណ្ឌរដ្ឋបាលជលផលកំពង់ចាម បានបន្តចុះបង្ក្រាបឧបករណ៍នេសាទខុសច្បាប់នៅភូមិសាស្ត្រស្រុកព្រៃឈរ និងសហគមន៍នេសាទឃុំមៀន ដើម្បីចូលរួមទប់ស្កាត់ និងបង្ក្រាបបទល្មើសនេសាទខុសច្បាប់នៅតាមព្រែក បឹង និងទន្លេ ក្នុងខេត្តកំពង់ចាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ១៥ ខែតុលា ឆ្នាំ ២០២៤ នេះ ខណ្ឌរដ្ឋបាលជលផលកំពង់ចាម សហការជាមួយអាជ្ញាធរ ស្រុកព្រៃឈរ និងសហគមន៍សាមគ្គីឃុំមៀន និងដោយមានការសម្របសម្រួលពី លោក វង្ស ប៊ុនវិសុទ្ធ ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្ក្រាបបទល្មើសជលផល បាន ៥ ករណី ក្នុងនោះ មន្ត្រីជំនាញបានកសាងសំណុំរឿងតាមនីតិវិធីច្បាប់ស្តីពីជលផល និងរុះរើកាប់បំផ្លាញចោលវត្ថុតាង នៃបទល្មើសជលផលនៅនឹងកន្លែង។

បើតាមការបញ្ជាក់ពី លោក លី ស្រ៊ី នាយខណ្ឌស្ដីទីជលផលកំពង់ចាម បានឲ្យដឹងថា ជាលទ្ធផល ប្រតិបត្តិការចុះបង្ក្រាបបទល្មើសជលផលនេះដែរ ក្រុមការងារបានរុះរើកាប់បំផ្លាញចោលវត្ថុតាងនៅចំណុចស្រុកព្រៃឈរ និងសហគមន៍នេសាទសាមគ្គីឃុំមៀន។ ចំពោះឧបករណ៍ដែលបំផ្លាញចោលរួមមាន ៖ ឧបករណ៍លូស្បៃមុងសរុប ២៥ មាត់, របាំងស្បៃមុងប្រវែង ៦៤៥ ម៉ែត្រ , បង្គោលចម្រឹងចំនួន ៣៧៥ ដើម, ចាក់លែងកូនត្រីចម្រុះទម្ងន់សរុប ៣២ គីឡូក្រាម ចូលក្នុងបឹងវិញ។

ទន្ទឹមនេះដែរ លោកនាយខណ្ឌស្តីទីជលផលកំពង់ចាម ដែលដឹកនាំផ្ទាល់ បានបន្តចុះអប់រំផ្សព្វផ្សាយដល់ប្រជានេសាទឈប់នេសាទនៅតំបន់ កុំប្រើប្រាស់ឧបករណ៍ល្មើសច្បាប់ និងស្នើសុំឲ្យអាជ្ញាធរមូលដ្ឋានចូលរួមសហការរាយការណ៍ និងបង្ក្រាប។ អ្វីដែលមន្ត្រីជំនាញស្នើសុំទៀតនោះ គឺសូមឲ្យប្រជាពលរដ្ឋចូលរួមសហការទប់ស្កាត់ការនេសាទខុសច្បាប់ ដើម្បីរក្សាពូជត្រីបានច្រើន៕

អត្ថបទ និង រូបភាព ៖ ឡេក ចាន់ពេជ្រ