ប្រមុខមហាផ្ទៃ តែងតាំងលោក នុត សវនា ជាប្រធានពន្ធនាគារព្រៃស បន្ទាប់ពន្ធនាគារនេះផ្ទុះរឿងអ្នកជាប់ឃុំ ជប់លៀង

លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានតែងតាំង លោក នុត សវនា ដែលជាអ្នកនាំពាក្យ និងជាអគ្គនាយករង នៃអគ្គនាយកដ្ឋានពន្ធនាគារ ឱ្យទទួលបន្ទុកជាប្រធានមណ្ឌលអប់រំកែប្រែទី១ ឬហៅថាពន្ធនាគារព្រៃស។ នេះបើតាមប្រកាសតែងតាំងមន្ត្រីរាជការរបស់លោក ស សុខា ចេញនៅថ្ងៃទី១៦ ខែតុលា ឆ្នាំ២០២៤។

ក្នុងមាត្រា១ នៃប្រកាសស្ដីពីការតែងតាំងមន្ត្រីរាជការ បានសម្រេចថា ៖«ត្រូវបានតែងតាំង លោក ឧត្ដមអគ្គានុរក្សថ្នាក់លេខ១ នុត សវនា ឱ្យទទួលបន្ទុកជាប្រធានមណ្ឌលអប់រំកែប្រែទី១ នៃអគ្គនាយកដ្ឋានពន្ធនាគារបន្ថែមលើមុខតំណែងបច្ចុប្បន្ន»។

ការតែងតាំងនេះ ធ្វើឡើងបន្ទាប់ពីលោក ផែង វណ្ណៈ​ ផ្សព្វផ្សាយវីដេអូ ជនជាតិចិន និងជនជាតិខ្មែរ ដែលកំពុងជាប់ឃុំមួយក្រុម ធ្វើពិធីជប់លៀង រាំលេង ដែលអះអាងថានៅក្នុងមណ្ឌលអប់រំកែប្រែទី១​ឬហៅថាពន្ធនាគារព្រៃស លើបណ្ដាញសង្គមហ្វេសប៊ុក។

ម្យ៉ាងទៀត ការតែងតាំងនេះ បានធ្វើឡើងរយៈពេលមួយថ្ងៃបន្ទាប់ពីសម្ដេចធិបតី ហ៊ុន ម៉ាណែត បានប្រកាសជាផ្លូវការថា បានឯកភាពឱ្យឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពិនិត្យដោះដូរក្បាលម៉ាស៊ីនដឹកនាំពន្ធនាគារព្រៃស ឬមណ្ឌលអប់រំកែប្រែទី១ ដើម្បីដោះស្រាយបញ្ហាអសកម្មនានាដែលបាននិងកំពុងកើតឡើងនាពេលបច្ចុប្បន្ន។

គួរឱ្យដឹងថា មណ្ឌលអប់រំកែប្រែទី១​ មានទីតាំងភូមិព្រៃស សង្កាត់ព្រៃស ខណ្ឌដង្កោ រាជធានីភ្នំពេញ។ មុនថ្ងៃទី១០ ខែកញ្ញា ប្រធានមណ្ឌលអប់រំកែប្រែទី១ ឬពន្ធនាគារព្រៃស គឺជាលោកឧត្តមអគ្គានុរក្សថ្នាក់លេខ១ យិន គន្ធ។ ប៉ុន្តែលោក យិន គន្ធ បានចូលនិវត្តន៍ពីតួនាទីជាប្រធានមណ្ឌលអ​ប់រំ និងកែប្រែទី១ ត្រឹមថ្ងៃទី០៩ ខែកញ្ញា ឆ្នាំ២០២៤។ ក្រោយការចូលនិវត្តន៍របស់លោក យិន គន្ធ មួយថ្ងៃ គឺចាប់ពីថ្ងៃទី១០ ខែកញ្ញា ឆ្នាំ២០២៤ លោកឧត្ដមអគ្គានុរក្សថ្នាក់លេខ២ ​ម៉ុង ម៉េងអ៊ាន់ ត្រូ​វបាន​តែង​តាំង​ជា​ប្រ​ធាន​ស្តី​ទី​មណ្ឌល​អប់រំកែប្រែទី១៕