ព័ត៌មានអន្ដរជាតិ

ទ័ពអាកាសសិង្ហបុរីបញ្ចេញយន្តហោះចម្បាំងពីរគ្រឿងទៅអមយន្តហោះដែលគំរាមបំផ្ទុះគ្រាប់បែក

បានផុស

២ ខែ មុន

នៅ

ថ្ងៃពុធ ១៦ តុលា ២០២៤

ដោយ

ប្រទេសសិង្ហបុរីបានចេញបញ្ជាឱ្យកងទ័ពអាកាសនៃសាធារណរដ្ឋសិង្ហបុរី (RSAF) ប្រតិបត្តិហោះហើរយន្តហោះចម្បាំង F-15SG នៅរាត្រីថ្ងៃអង្គារទី១៥ខែតុលា ដើម្បីអមយន្តហោះមួយគ្រឿងរបស់ក្រុមហ៊ុនអាកាសចរណ៍ដែលមានតម្លៃទាប Air India Express បន្ទាប់ពីការគំរាមបំផ្ទុះគ្រាប់បែកនៅលើជើងហោះហើរមកកាន់សិង្ហបុរី។

ប្រភេទយន្តហោះ F-15SG របស់សិង្ហបុរី ដែលបញ្ជាឲ្យទៅអមដំណើរយន្តហោះឥណ្ឌា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNA រដ្ឋមន្ត្រីក្រសួងការពារជាតិ លោក Ng Eng Hen បានលើកឡើងនៅក្នុងសារបង្ហោះតាមបណ្តាញសង្គមហ្វេសប៊ុកថា ក្រុមហ៊ុនអាកាសចរណ៍បានទទួលអ៊ីមែលថា មានគ្រាប់បែកនៅលើជើងហោះហើរលេខ AXB684 ដែលធ្វើដំណើរទៅកាន់ប្រទេសសិង្ហបុរី។

សារព័ត៌មានរបស់ឥណ្ឌា The Hindu បានផ្សាយនៅថ្ងៃអង្គារថា មានជើងហោះហើរច្រើនបានទទួលសារក្លែងក្លាយគំរាមកំហែងបំផ្ទុះគ្រាប់បែកនៅលើយន្តហោះ។ Air India Express បានហៅហោះចេញពីMadurai នៃ រដ្ឋ Tamil Nadu នៅភាគខាងត្បូងប្រទេសឥណ្ឌាកាលថ្ងៃទី១៥ខែតុលា។

តាម CNA យន្តហោះ F-15SG ចំនួនពីរគ្រឿងបានហោះអមយន្តហោះចេញពីតំបន់ដែលមានប្រជាជនរស់នៅច្រើន ហើយវាបានចុះចតនៅអាកាសយានដ្ឋានអន្តរជាតិ Changi នៅម៉ោងប្រហែល១០និង០៤នាទីយប់ យឺតជាងមួយម៉ោងបន្ទាប់ពីការគ្រោងទុកសម្រាប់ការចុះចតធម្មតា។

លោករដ្ឋមន្ត្រីក្រសួងការពារជាតិ បាននិយាយថា៖«ប្រព័ន្ធការពារអាកាសដែលមានមូលដ្ឋានលើដីរបស់យើង និងក្រុមកម្ចាត់អាវុធជាតិផ្ទុះក៏ត្រូវបានដាក់ឱ្យប្រុងជើងការកម្រិតខ្ពស់ ។ នៅពេលវាចុះចតដល់ដី យន្តហោះត្រូវបានប្រគល់ឱ្យប៉ូលីសអាកាសយានដ្ឋាន» ដោយបន្ថែមថា ការស៊ើបអង្កេតកំពុងបន្ត។

លោក រដ្ឋមន្ត្រីក្រសួងការជាតិបាននិយាយថា៖«អរគុណច្រើនចំពោះការលះបង់ និងវិជ្ជាជីវៈរបស់កងកម្លាំងប្រដាប់អាវុធសិង្ហបុរី និងក្រុមសន្តិសុខជាតិរបស់យើង ដែលរក្សាយើងឱ្យមានសុវត្ថិភាពនៅក្នុងមាតុភូមិរបស់យើង ទោះបីជាមានការគំរាមកំហែងនៅជុំវិញយើងក៏ដោយ»។

ជាការឆ្លើយតបទៅនឹងសំណួររបស់ CNA កងកម្លាំងប៉ូលីសសិង្ហបុរី (SPF) បាននិយាយថា វាត្រូវបានជូនដំណឹងអំពីការគំរាមកំហែងគ្រាប់បែកនៅម៉ោងប្រហែល៨និង២៥នាទីយប់។

SPF បាននិយាយថា៖«យន្តហោះបានចុះចតដោយសុវត្ថិភាពនៅអាកាសយានដ្ឋាន Changi នៅម៉ោងប្រហែល១០និង០៤នាទីយប់ ក្រោមការអមដោយយន្តហោះចម្បាំង RSAF»៕

ដោយ រ៉ាន់ រើយ