អគ្គិភ័យឆេះរោងកម្មករស្នាក់នៅរបស់ក្រុមហ៊ុនខ្សែកាបជាង១០បន្ទប់

រោងកម្មករបស់ក្រុមហ៊ុនតបណ្ដាញខ្សែកាបត្រូវបានអគ្គិភ័យឆាបឆេះយ៉ាងសន្ធោសន្ធៅអស់ប្រមាណជាង១០បន្ទប់។ ករណីអគ្គិភ័យនេះបានកើតឡើងកាលពីវេលាម៉ោង២និង២៥រសៀល ថ្ងៃទី១៨ ខែតុលា ឆ្នាំ២០២៤ ស្ថិតនៅភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ។

តាមសាក្សីពីកន្លែងកើតហេតុបានអោយដឹងថា នៅមុនពេលមានអគ្គិភ័យខាងលើនេះ គឺគាត់បានឮសំឡេងផ្ទុះចំនួន២ដង តែគ្មានអ្នកចាប់អារម្មណ៍ លុះមួយសន្ទុះមកក៏មានអណ្តាតភ្លើងឆាបឆេះឡើងតែម្តង។ ភ្លាមៗ មានប្រជាពលរដ្ឋបានរាយការណ៍ទៅសមត្ថកិច្ចអោយចុះអន្តរាគមន៍។ រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ដែលប្រចាំការគោលដៅសាលាខណ្ឌសែនសុខ បានមកដល់១គ្រឿង ទើបមាន២គ្រឿងទៀតមកដល់ដើម្បីអន្តរាគមន៍រហូតរលត់ទៅវិញនៅវេលាម៉ោង២និង៥០នាទីរសៀលថ្ងៃដដែល។

ក្នុងរង្វង់ប្រតិបត្តិការពន្លត់អគ្គិភ័យនេះលោក ម៉ូវ ម៉ានិត អភិបាលខណ្ឌសែនសុខចចុះផ្ទាល់ដល់ទីតាំងកើតហេតុ ដើម្បីដឹកនាំកម្លាំងអន្តរាគមន៍ និងបានប្រើប្រាស់រថយន្តពន្លត់អគ្គិភ័យចំនួន៣គ្រឿង។ ចំពោះមូលហេតុនៃការឆាបឆេះនេះសមត្ថកិច្ចនៅមិនទាន់បញ្ជាក់នៅឡើយ៕

អត្ថបទ៖ សំណាង