សន្តិសុខសង្គម

ភ្លៀងធ្លាក់មួយមេធំនៅព្រំប្រទល់កម្ពុជា-ថៃ បណ្ដាលឱ្យទឹកជន់លិច និងកួចលំនៅឋានប្រជាពលរដ្ឋរស់នៅតាមបណ្ដោយព្រំដែន

បានផុស

១៦ នាទី មុន

នៅ

ថ្ងៃសៅរ៍ ១៩ តុលា ២០២៤

ដោយ

ប៉ៃលិន ៖ នាល្ងាចថ្ងៃទី១៨ ខែតុលា ឆ្នាំ២០២៤ វេលាម៉ោង ៦និង០០នាទី មានភ្លៀងធ្លាក់មួយមេធំ នៅខេត្តចន្ទបុរី ប្រទេសថៃជាប់នឹងព្រំប្រទល់ខេត្តប៉ៃលិន បណ្ដាលឱ្យទឹកអូរ តាមបណ្ដោយព្រំដែនកើនឡើងយ៉ាងគំហុក ធ្វើឱ្យជន់លិចនិងកួចលំនៅឋានប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្តីរាយការណ៍ ដែលកម្ពុជាថ្មីទទួលបាន ឱ្យដឹងថា ជំនន់ទឹកភ្លៀងនេះ បានកើតឡើងត្រង់ចំណុចលូដាច់ ភូមិផ្សារព្រំត្បូង ឃុំស្ទឹងកាច់ ស្រុកសាលាក្រៅ ខេត្តបៃលិន។ បើតាមប្រពលរដ្ឋបានឱ្យដឹងថា ភ្លៀងបានចាប់ផ្ដើមធ្លាក់តាំងពីម៉ោង៣រសៀលរហូតដល់ម៉ោង៦ល្ងាច ទើបបណ្ដាលឱ្យទឹកអូរ តាមបណ្ដោយព្រំដែនកើនឡើងយ៉ាងគំហុក ធ្វើឱ្យផ្ទះប្រជាពលរដ្ឋជន់លិច និងកួចយកទាំងរថយន្តទៀតផង។

បន្ទាប់ពីកើតហេតុភ្លាមៗ អាជ្ញាធរស្រុកសាលាក្រៅ ដែលដឹកនាំដោយលោក ជា សុឃុម បានដុតដៃដុតជើងចុះអន្តរគមន៍ជួយសង្គ្រោះប្រជាពលរដ្ឋ ដោយក្នុងនោះក៏មានការសហការជាមួយកម្លាំងប្រដាប់អាវុធ ព្រមទាំងអាជ្ញាធរមូលដ្ឋាន។

បើតាមប្រជាពលរដ្ឋដែលរស់នៅតាមបណ្ដោយព្រំដែនកម្ពុជា-ថៃ បានលើកឡើងថា រហូតមកដល់ម៉ោងនេះ ភ្លៀងក៏នៅតែកំពុងរលឹមឥតស្រាកស្រាន្ត។ ហើយអាជ្ញាធរប្រទេសថៃ បានចេញសេចក្តីប្រកាសអាសន្ន ដើម្បីឱ្យប្រជាជនដែលរស់នៅតាមបណ្ដាយព្រំដែនជាប់មាត់អូរ ត្រូវមានការប្រុងប្រយ័ត្នខ្ពស់៕

ដោយ ៖ សេង សុវណ្ណារិទ្ធ