ព័ត៌មានអន្ដរជាតិ

ឥណ្ឌូណេស៊ីព្យាករកំណើនសេដ្ឋកិច្ច ៥,១ ភាគរយ សម្រាប់ឆ្នាំ ២០២៤

បានផុស

២ នាទី មុន

នៅ

ថ្ងៃសៅរ៍ ១៩ តុលា ២០២៤

ដោយ

រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី លោកស្រី Sri Mulyani Indrawati បានព្យាករថា ឥណ្ឌូណេស៊ីនឹងឃើញពីកំណើនសេដ្ឋកិច្ចប្រមាណ ៥,១ ភាគរយ សម្រាប់ឆ្នាំ ២០២៤ ដោយទាបជាងគោលដៅ ៥,២ ភាគរយ ដែលរដ្ឋាភិបាលនាមកំណត់ក្នុងថវិការដ្ឋឆ្នាំ ២០២៤ ប៉ុន្តែជាងកំណើន ៥,០៥ ភាគរយ កាលពីឆ្នាំមុន។ នេះបើតាមការចុះផ្សាយរបស់កាសែត Jakarta Globe កាលពីថ្ងៃសុក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Sri Mulyani បានគូសបញ្ជាក់ថា ការបោះឆ្នោតថ្នាក់មូលដ្ឋានឆ្នាំ ២០២៤ ដែលធ្វើឡើងនាខែវិច្ឆិកាខាងមុខ រំពឹងថានឹងជំំរុញការចំណាយរបស់ប្រជាជន ដែលនឹងរួមចំណែកយ៉ាងសំខាន់ដល់កំណើនសេដ្ឋកិច្ចជាតិ។ ជាមួយគ្នានោះ ត្រីមាសទី៤ចុងឆ្នាំ គឺជារដូវពិធីបុណ្យផ្សេងៗដូចជាបុណ្យណូអែល និងឆ្លងឆ្នាំសកលជាដើម ដែលវានឹងបង្កើនការចំណាយរបស់អ្នកប្រើប្រាស់បន្ថែមទៀត។

លោកស្រីបានថ្លែងក្នុងសន្និសីទសារព័ត៌មានមួយ បន្ទាប់ពីកិច្ចប្រជុំប្រចាំត្រីមាសរបស់គណៈកម្មាធិការស្ថិរភាពហិរញ្ញវត្ថុ (KSSK) នៅធនាគារ Bank Indonesia កាលពីថ្ងៃសុក្រថា៖ «ក្នុងអំឡុងពេលថ្ងៃឈប់សម្រាកជាតិ យើងឃើញពីកំណើននៃការធ្វើដំណើររបស់ប្រជាជន ដែលរួមចំណែកជាវិជ្ជមានដល់ការប្រើប្រាស់ក្នុងសេដ្ឋកិច្ចរបស់យើង»។

គួរគូសបញ្ជាក់ថា ទីភ្នាក់ងារស្ថិតិកណ្តាល (BPS) របស់ឥណ្ឌូណេស៊ីឯណោះវិញ បានរាយការណ៍ថា កំណើនសេដ្ឋកិច្ចរបស់ឥណ្ឌូណេស៊ីសម្រាប់ត្រីមាសទី២ ឆ្នាំ ២០២៤ នឹងឈានដល់ ៥,០៥ ភាគរយ។ ទន្ទឹមនឹងនេះ ធនាគារពិភពលោកបានកែប្រែការព្យាកររបស់ខ្លួនជាមធ្យមសម្រាប់កំណើនសេដ្ឋកិច្ចឥណ្ឌូណេស៊ី ពី ៤,៩ ភាគរយ (សម្រាប់ឆ្នាំ ២០២៤ និង ២០២៥) ទៅ ៥,១ ភាគរយ វិញក្នុងមួយឆ្នាំៗ ចន្លោះពីឆ្នាំ ២០២៤-២០២៦៕