មនុស្សជាង១លាននាក់រងផលប៉ះពាល់ដោយទឹកជំនន់នៅស៊ូដង់ខាងត្បូង

ទឹកជំនន់ដ៏បំផ្លិចបំផ្លាញដែលបណ្តាលមកពីភ្លៀងធ្លាក់ខ្លាំងបានវាយប្រហារផ្នែកជាច្រើននៃប្រទេសស៊ូដង់ខាងត្បូងប៉ះពាល់​ដល់មនុស្សជាង ១លាននាក់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ Xinhua នៅថ្ងៃទី២០ខែតុលា​នេះ។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយនៅក្នុងការអាប់ដេត ចេញផ្សាយនៅទីក្រុងJuba រដ្ឋធានីនៃប្រទេសស៊ូដង់ខាងត្បូង ថា ទឹកជំនន់បានធ្វើឱ្យមនុស្សជាង​ ២៧ម៉ឺន​​នាក់ផ្លាស់ទីលំនៅនៅក្នុងស្រុកចំនួន​៤២នៃ​ស្រុកសរុបចំនួន ៧៨ទូទាំងប្រទេស។

ទីភ្នាក់ងារអង្គការសហប្រជាជាតិបាននិយាយថា ៤០ភាគរយនៃចំនួនប្រជាជនដែលរងផលប៉ះពាល់គឺមកពីភាគខាងជើងតំបន់ Bahr el Ghazal និងរដ្ឋ Unity ខណៈអង្គការសហប្រជាជាតិបានព្យាករណ៍ថាទឹកជំនន់ដែលមិនធ្លាប់មានពីមុនមកអាចប៉ះពាល់ដល់មនុស្សរហូតដល់ ៣.៣ លាននាក់នៅចន្លោះខែកញ្ញាដល់ខែធ្នូ។ លើសពីនេះភ្លៀងធ្លាក់ខ្លាំងនិងទឹកជំនន់បានធ្វើឱ្យផ្លូវផ្គត់ផ្គង់សំខាន់ៗចំនួន ១៥ ត្រូវបានកាត់ផ្ដាច់ដែលធ្វើឲ្យការផ្គត់ផ្គង់ជំនួយកាន់តែពិបាកទៅដល់តំបន់តែរងគ្រោះ។

ប្រទេសស៊ូដង់ខាងត្បូងកំពុងប្រឈមមុខនឹងទឹកជំនន់ដែលមិនធ្លាប់មានពីមុនមក ជាមួយនឹងការព្យាករណ៍ព្យាករណ៍ពីទឹកភ្លៀងលើសពីមធ្យមភាគ ទឹកទន្លេហូរចេញពីប្រទេសអ៊ូហ្គង់ដា និងទឹកជំនន់ដែលអាចបំបែកកំណត់ត្រាមិនធ្លាប់មានបាន។ ជាមួយគ្នានេះប្រទេសនេះក៍គឺជាចំណុចក្តៅនៃភាពអត់ឃ្លានក្នុងចំណោមប្រទេសចំនួន ១៨ នៅទូទាំងពិភពលោក ដែលបញ្ហាសន្តិសុខស្បៀងកាន់តែយ៉ាប់យ៉ឺន នេះបើយោងតាមរបាយការណ៍របស់អង្គការសហប្រជាជាតិ៕

អត្ថបទ៖ ប៊ុន សុភាព