ព័ត៌មានអន្ដរជាតិ

នាវាចម្បាំងរុស្ស៊ីទៅដល់មីយ៉ាន់ម៉ា រៀបចំសមយុទ្ធបាញ់គ្រាប់ពិត

បានផុស

៦ ខែ មុន

នៅ

ថ្ងៃចន្ទ ២១ តុលា ២០២៤

ដោយ

Chheang

ប្រព័ន្ធផ្សព្វផ្សាយរបបសឹកមីយ៉ាន់ម៉ា Global New Light of Myanmar បានចុះផ្សាយនៅថ្ងៃទី២១ខែតុលាថា នាវាកងទ័ពជើងទឹករុស្ស៊ីបានទៅដល់ទឹកដីរបស់ខ្លួនហើយ ដើម្បីចូលរួមសមយុទ្ធរួមគ្នាជាលើកទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាវាចម្បាំង៤គ្រឿង និងនាវាដឹកជញ្ជូន១គ្រឿងរបស់កងកម្លាំងប៉ាស៊ីហ្វិករុស្ស៊ី បានចតនៅឯកំពង់ផែ Yangon កាលពីថ្ងៃទី២០ខែតុលា ត្រៀមសម្រាប់សមយុទ្ធសន្តិសុខដែនទឹករួមគ្នារវាងប្រទេសទាំងពីរ។

របបសឹកមីយ៉ាន់ម៉ា បានប្រកាសកាលពីថ្ងៃអាទិត្យថា ខ្លួននឹងរៀបចំសមយុទ្ធសន្ដិសុខបាញ់គ្រាប់ពិតនៅលើដែនទឹកនាភាគខាងជើងសមុទ្រ Andaman ចន្លោះពីថ្ងៃទី២០ដល់ថ្ងៃទី២៤ខែតុលា ដោយព្រមានទូកនេសាទ និងយន្តហោះនានាមិនត្រូវឲ្យធ្វើដំណើរឆ្លងកាត់តំបន់ទាំងនោះទេ។ អំឡុងការប្រកាសនោះ របបសឹកមីយ៉ាន់ម៉ា មិនបានប្រាប់អំពីវត្តមានរបស់កងកម្លាំងរុស្ស៊ីទេ។

សមយុទ្ធលើកមុនរវាងប្រទេសពីរ បានធ្វើឡើងកាលពីខែវិច្ឆិកាឆ្នាំ២០២៣។

ក្រៅតែពីចិន រុស្ស៊ីក៏ជាសម្ព័ន្ធមិត្តជិតស្និទ្ធរបស់របបសឹកមីយ៉ាន់ម៉ាផងដែរ ដែលផ្ដល់ទាំងសព្វាវុធ និងការគាំទ្រការទូត ដើម្បីប្រយុទ្ធនឹងបក្សប្រឆាំងប្រដាប់អាវុធក្នុងប្រទេស។

ក្រុមអ្នកវិភាគ បាននិយាយថា បន្ទាប់ពីកងកម្លាំងជើងគោករងការប៉ះទង្គិចច្រើន របបសឹកកំពុងពឹងផ្អែកកាន់តែខ្លាំងឡើងលើកម្លាំងទ័ពអាកាសរបស់ខ្លួន ដែលរួមមានយន្តហោះរុស្ស៊ី Sukhoi Su-30s, MiG-29s និង Yak។

មេទ័ពកំពូលនៃរបបសឹក លោក Min Aung Hlaing បានធ្វើដំណើរទៅកាន់ប្រទេសរុស្ស៊ីជាច្រើនដងចាប់តាំងពីដឹកនាំរដ្ឋប្រហារឆ្នាំ២០២១ រួមទាំងការជួបជាមួយប្រធានាធិបតីរុស្ស៊ី លោក វ៉្លាឌឺមៀរ ពូទីន ក្នុងឆ្នាំ២០២២៕

ដោយ៖ ឈាង