រដ្ឋាភិបាលនឹងចុះ MOU ជាមួយវិស័យឯកជនក្នុងឧស្សាហកម្មទេសចរណ៍ដើម្បីចែកចាយផលិត​ផលស្វាយចន្ទីទៅក្នុងវិស័យនេះ

ក្រសួងពាណិជ្ជកម្មកំពុងធ្វើការប្រមូលធាតុចូលពីបណ្តាភាគីពាក់ព័ន្ធនៅក្នុងវិស័យទេសចរណ៍ សមាគមសហព័ន្ធស្វាយចន្ទីកម្ពុជា និងសមាគមស្វាយចន្ទីកម្ពុជា ដើម្បីរៀបចំអនុស្សរណៈនៃការយោគយល់គ្នាមួយក្នុងការដើម្បីជំរុញការប្រើប្រាស់ និងចែកចាយ ផលិតផលគ្រាប់ស្វាយចន្ទីកម្ពុជាទៅក្នុងវិស័យសណ្ឋាគារ និងភោជនី​យ​ដ្ឋានឱ្យកាន់តែទូលំទូលាយ។

កាលពីព្រឹកថ្ងៃ ទី២១ ខែតុលា ឆ្នាំ២០២៤លោកស្រី តោ ពិឡា រដ្ឋលេខាធិការក្រសួងពាណិជ្ជកម្ម បានដឹកនាំកិច្ចប្រជុំស្តីពី “ការផ្តល់ធាតុចូលលើសេចក្តីព្រាងអនុស្សរណៈនៃការយោគយល់គ្នា រវាងសមាគមសហព័ន្ធស្វាយចន្ទីកម្ពុជា សមាគមស្វាយចន្ទីកម្ពុជា ជាមួយសមាគមសណ្ឋាគារ សមាគមភោជនីយដ្ឋាន និងសមាគមសហព័ន្ធចុងភៅកម្ពុជា” ដើម្បីពិភាក្សា និងកែសម្រួលសេចក្តីព្រាង​នៃអនុស្សរណៈនៃការយោគយល់គ្នានេះ។

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីថា សមាគមស្វាយចន្ទីកម្ពុជា មិនទាន់ទទួលបានសេចក្ដីព្រៀងនោះទេ ប៉ុន្តែសមាគមបានជួយរៀបចំឡូហ្គោ សម្រាប់ស្វាយចន្ទីដាក់លក់សមូហភាពតំណាងឱ្យជាតិ ហើយបានផ្ញើទៅក្រសួងពាណិជ្ជកម្មក្នុងការសម្រេច។

លោក អួន ស៊ីឡុត បញ្ជាក់ថា ប្រសិនបើមានការចុះ អនុស្សរណៈនៃការយោគយល់គ្នានេះ នឹងជួយជំរុញការលក់ស្វាយ​ចន្ទីក្នុងស្រុក ដែលលោកប្រាប់ថា កន្លងមកការលក់ក្នុងស្រុកមានទំំហំតិចតួច ដោយសារតែក្រុមហ៊ុនធំៗមួយចំនួន ផលិតហើយនាំចេញផ្ទាល់ទៅក្រៅប្រទេស។

លោកយល់ថា ប្រសិនបើគ្រាប់ស្វាយចន្ទីយើងផ្សព្វផ្សាយដល់សមាគមចុងភៅ នោះការស្រូបទាញផលិតផលក្នុងស្រុកបានកាន់តែលឿន និងកាន់តែច្រើន ខណៈសមាគមលើកទឹកចិត្តក្នុងការប្រើប្រាស់លទ្ធភាពឱ្យអស់ក្នុងស្រុក ដោយសារងាយស្រួលជាងការនាំចេញ។

លោក អួន ស៊ីឡុត បន្ថែមថា៖ «កន្លងមកក្រសួងពាណិជ្ជកម្មបានខិតខំប្រឹងប្រែង ក្នុងការជួយឱ្យមានការលក់នៅតាមអាកាសយានដ្ឋាន ហើយនេះគឺលក់នៅតាមសណ្ឋាគារ និងភោជនីយដ្ឋាន គឺរឹតតែល្អ ព្រោះយើងត្រូវតែប្រើឱ្យអស់លទ្ធភាពស្វាយចន្ទីក្នុងស្រុក ដែលមានតែក្រសួងទេដែលជួយរកទីផ្សារ ខ្ញុំជំរុញឱ្យអតិថិជនប្រើប្រាស់ផលិតផលក្នុងស្រុក»។

យោងតាមសមាគមស្វាយចន្ទីកម្ពុជា គិតចាប់ពីខែមករា ដល់ខែសីហា ឆ្នាំ ២០២៤ ការប្រមូលផលស្វាយចន្ទីកម្ពុជា​សម្រេច​​បាន​ប្រមា​ណ​ ៨៧ ម៉ឺនតោន ក្នុងនោះនាំចេញទៅវៀតណាមជិត ៨០ ម៉ឺនតោន គិតជាទឹក​ប្រាក់​ប្រមា​ណ​ ១ ពាន់ ២ រយលានដុល្លារ៕

អត្ថបទ៖ ឡេង ដេត