សន្តិសុខសង្គម

ស្ត្រីមានផ្ទៃពោះជិតគ្រប់ខែម្នាក់ មិនស្រួលខ្លួន ថប់ដង្ហើម គាំងបេះដូងស្លាប់ពេលបញ្ជូនទៅកាន់មន្ទីរពេទ្យ

បានផុស

៤ ខែ មុន

នៅ

ថ្ងៃអង្គារ ២២ តុលា ២០២៤

ដោយ

ស្ត្រីមានផ្ទៃពោះជិតគ្រប់ខែម្នាក់ មានអាការមិនស្រួលខ្លួន ថប់ៗ ដង្ហើម ត្រូវបានបុរសជាសង្សារ និងប្រជាពលរដ្ឋ ហៅរថយន្តសង្គ្រោះមកដឹកយកទៅសង្គ្រោះ តែជាអកុសលដាច់ខ្យល់ស្លាប់ពេលបញ្ជូនទៅមន្ទីរពេទ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ខាងលើនេះ កាលពីវេលាម៉ោង ១ រំលងអធ្រាត្រ ឈានចូលថ្ងៃទី ២២ ខែតុលា ឆ្នាំ ២០២៤ នៅបន្ទប់ជួល ស្ថិតក្នុងភូមិអង្គ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

តាមប្រភពបានឲ្យដឹងថា ស្ត្រីរងគ្រោះឈ្មោះ ជ សណ អាយុ ២២ ឆ្នាំ មុខរបរកម្មការិនីរោងចក្រ ទើបឈប់សម្រាកពីការងារដោយសារមានផ្ទៃពោះជិតគ្រប់ខែ ស្នាក់នៅបន្ទប់ជួលកើតហេតុខាងលើ មានស្រុកកំណើតនៅភូមិព្រៃខ្លា ឃុំត្នោតជុំ ស្រុកស្រគរ ខេត្តពោធិ៍សាត់។ ចំណែកបុរសជាសង្សារឈ្មោះ ឃាម ពេជ្រ អាយុ ២៣ ឆ្នាំ រស់នៅភូមត្រពាំងខ្លី ឃុំត្នោតជុំ ស្រុកស្រគរ ខេត្តពោធិ៍សាត់។

តាមសម្ដីបុរសជាសង្សារបានឲ្យដឹងថា ពួកគេទាំង ២ នាក់ បានស្រលាញ់គ្នាជាងមួយឆ្នាំមកហើយ គឺស្រលាញ់ចិត្ត និងចិត្ត និងក្រុមគ្រួសារខាងស្ត្រីជាសង្សារក៏បានដឹងឮខ្លះដែរ តែមិនដឹងថាមានផ្ទៃពោះនោះទេ។

បុរសខាងលើបន្តថា មុនពេលកើតហេតុ នៅវេលាម៉ោងប្រមាណ ១២ និង ៣០ នាទី រំលងអធ្រាត្រ ឈានចូលថ្ងៃទី ២២ ខែតុលា ឆ្នាំ ២០២៤ ខណៈគាត់កំពុងដេក ស្រាប់តែឮសំឡេងស្ត្រីរងគ្រោះ ស្រែក គាត់ក៏ទាញខ្នើយឲ្យជនរងគ្រោះកើយ បន្ទាប់មកក៏ស្ងាត់ ដូចជាមានដង្ហើមតិចៗ។

បុរសខាងលើបន្តទៀតថា ភ្លាមៗ រូបគាត់ និងអ្នកជិតខាងបន្ទប់ ក៏ចង់យកជនរងគ្រោះទៅសង្គ្រោះបន្ទាន់ភ្លាមៗ ដែរ។ ណាមួយ ជនរងគ្រោះពោះធំ ពិបាកយកចុះក្រោម កាំជណ្ដើរតូចចង្អៀត ទើបទាក់ទងទៅរថយន្តសង្គ្រោះបន្ទាន់របស់មន្ទីរបង្អែកពោធិ៍ចិនតុង ដើម្បីយកស្ត្រីរងគ្រោះទៅសង្គ្រោះបន្ទាន់ដែរ តែទម្រាំរថយន្តសង្គ្រោះមកដល់ អស់រយៈពេលប្រមាណជិតកន្លះម៉ោង ហើយបានបញ្ជូនយកទៅសង្គ្រោះបន្ទាន់នៅមន្ទីរពេទ្យតេជោសន្តិភាព តែជាអកុសលពេលរថយន្តសង្គ្រោះបន្ទាន់បញ្ជូនយកទៅសង្គ្រោះបន្ទាន់ ដោយក្រុមគ្រូពេទ្យបានបញ្ជាក់ប្រាប់ថា ជនរងគ្រោះបានដាច់ខ្យល់ស្លាប់បាត់ទៅហើយ ទើបដឹកសពមកកន្លែងកើតហេតុវិញ រង់ចាំសមត្ថកិច្ចជំនាញចុះពិនិត្យ។

ក្រោយកើតហេតុ ប្រជាពលរដ្ឋបានទាក់ទងទៅសមត្ថកិច្ចនគរបាលប៉ុស្តិ៍ រួចក៏ទាក់ទងទៅសមត្ថកិច្ចនគរបាលជំនាញកោសល្យវិច័យរាជធានីភ្នំពេញ ដើម្បីមកកន្លែងកើតហេតុ ពិនិត្យសពជនរងគ្រោះបានឲ្យដឹងថា (គាំងបេះដូងអាចបណ្ដាលមកពីជំងឺបេះដូងទៅលើអ្នកមានផ្ទៃពោះជិតគ្រប់ខែ)៕

អត្ថបទ ៖ សំណាង