ព័ត៌មានជាតិ
ស្នងការរងនគរបាលខេត្តកោះកុង ៖ រាល់ការមកទទួល ឬដាក់ពាក្យប្រឡង សុទ្ធតែអនុវត្តដោយសុក្រឹតភាពតាមគោលការណ៍
លោកស្នងការរងនគរបាលខេត្តកោះកុង អះអាងថា គ្រប់យុវជន យុវនារី មកទទួល ឬដាក់ពាក្យប្រឡងប្រជែងចូលបម្រើការងារជាមន្ត្រីនគរបាល គឺសុទ្ធតែអនុវត្តដោយសុក្រឹតភាព និងតម្លាភាពទៅតាមគោលការណ៍ដែលបានកំណត់។
យុវជន យុវនារី ដែលមានចំណាប់អារម្មណ៍ប្រឡងចូលបម្រើការងារជាមន្ត្រីនគរបាលបំពេញជួស នៃស្នងការនគរបាលខេត្ត សូមកុំបារម្ភឡើយ ប្រសិនមានគ្រប់លក្ខខណ្ឌដែលកំណត់គណៈកម្មការប្រឡង។ ប្រឡងជាប់ ជាប់ដោយរីករាយពេញចិត្ត ប្រសិនបើធ្លាក់ ក៏ធ្លាក់ដោយអស់ចិត្ត។ នេះជាការបញ្ជាក់របស់ លោកឧត្ដមសេនីយ៍ត្រី មីន រស្មី ស្នងការរងនគរបាលខេត្តកោះកុង ទទួលបន្ទុកផែនធនធានមនុស្ស នៃស្នងការដ្ឋាននគរបាលខេត្តកោះកុង។
លោកស្នងការរងនគរបាលខេត្ត បន្តទៀតនៅថ្ងៃទី ២២ ខែតុលា ឆ្នាំ ២០២៤ ថា លក្ខខណ្ឌជាបេក្ខជនអាចមានសិទ្ធិប្រឡងបានចែងក្នុងសេចក្ដីជូនដំណឹងរបស់ក្រសួងមហាផ្ទៃរួចរាល់អស់ហើយ។
បើតាមលោកឧត្ដមសេនីយ៍ត្រី មីន រស្មី បេក្ខជនប្រឡង ត្រូវមានសញ្ជាតិខ្មែរ ទីលំនៅអចិន្ត្រៃយ៍នៅក្នុងខេត្ត កាយសម្បទារឹងមាំ មិនពាក់ព័ន្ធគ្រឿងញៀន មិនធ្លាប់មានទោសទណ្ឌ កម្ពស់ចាប់ពី ១.៧ ម៉ែត្រ សម្រាប់បុរស ស្ត្រី ១.៦៥ ម៉ែត្រ ឡើងទៅ មានសញ្ញាបត្រកម្រិតវប្បធម៌ដែល មានតម្លៃស្មើជាដើម។ ទៀតសោត ចំពោះលក្ខខណ្ឌតម្រូវនេះធ្វើឡើងក្របខណ្ឌទូទៅប្រទេសតែម្ដង ពុំ មានការ សម្របសម្រួលក្រៅផ្លូវការណាឡើយ។
គិតត្រឹមថ្ងៃទី ២១ ខែតុលា ឆ្នាំ ២០២៤ ស្នងការដ្ឋាននគរបាលខេត្តកោះកុង បានទទួលពាក្យរបស់យុវជន យុវនារី ចំនួន ១៣ នាក់ហើយ ដោយបានចុះបញ្ជីឈ្មោះស្នើសុំប្រឡងតាមប្រព័ន្ធអនឡាញ បន្ទាប់ពីពួកគេគ្មានជាប់ពាក់ព័ន្ធនឹងសារធាតុញៀន មានលក្ខខណ្ឌឯកសារត្រឹមត្រូវ និងសម្បទារឹងមាំ ស្របតាមគោលការណ៍របស់ក្រុមការងារគណៈកម្មការប្រឡង។
យុវជន ទួន ណាវិត រស់នៅឃុំប៉ាក់ខ្លង ស្រុកមណ្ឌលសីមា និងយុវនារី ភ្លាំង ស្រីណៃ រស់នៅសង្កាត់ដងទង់ ក្រុងខេមរភូមិន្ទ អ្នកដែលមានការចាប់អារម្មណ៍ចង់បម្រើការងារជាមន្ត្រីនគរបាល គាំទ្រចំពោះដំណើរការនីតិវិធីរបស់គណៈកម្មការប្រឡង ដោយសារតែមានសភាពតឹងរ៉ឹងតាមលក្ខខណ្ឌរបស់ក្រសួងមហាផ្ទៃកំណត់ឲ្យ។
តំណាងយុវជន និងយុវនារី ដដែល បន្ថែមថា សូម្បីតែមិនមានកាយសម្បទាគ្រប់គ្រាន់ ខុសកម្ពស់ ឬទម្ងន់បន្តិច ក៏មិនអាចទិញពាក្យប្រឡងបានដែរ នេះហើយជាការកែទម្រង់ដ៏ល្អប្រសើរចំពោះការប្រឡងដោយតម្លាភាព យុត្តិធម៌ និងគ្មានពាក្យចចាមអារ៉ាមពុំល្អបន្តទៀតទៅលើដំណើរការប្រឡងនាពេលមុខ៕
អត្ថបទ ៖ សិរីវឌ្ឍនៈ
-
ព័ត៌មានអន្ដរជាតិ៥ ថ្ងៃ ago
អ្នកជំនាញព្រមានឲ្យវៀតណាម ត្រៀមខ្លួនទទួលកំពូលព្យុះទីហ្វុង ខែក្រោយ
-
សន្តិសុខសង្គម១ សប្តាហ៍ ago
នគរបាលបញ្ជូនលោក ដួង តារា ទៅឃុំខ្លួននៅពន្ធនាគារប៉េហ្សុី
-
ជីវិតកម្សាន្ដ១ សប្តាហ៍ ago
ភឹម ស្រីណូ ត្រូវអ្នកលេងបណ្ដាញសង្គមថៃតាមវាយប្រហារ ក្នុងនោះក៏មានបវរកញ្ញាថៃឆ្នាំ ២០២០ ផងដែរ
-
ព័ត៌មានអន្ដរជាតិ២៤ ម៉ោង ago
ទឹកជំនន់ភ្លាមៗវាយប្រហាររដ្ឋ New Mexico បណ្តាលឱ្យស្លាប់និងរបួសច្រើន
-
ព័ត៌មានអន្ដរជាតិ៤ ថ្ងៃ ago
ប្រព័ន្ធធ្វើចលនាទឹកជុំវិញផែនដីបានបាត់បង់តុល្យភាពជាលើកដំបូងក្នុងប្រវត្តិសាស្ត្រមនុស្សជាតិ
-
កីឡា១ ថ្ងៃ ago
ម្ចាស់មេដាយទាំងអស់ក្នុងការប្រកួតយុទ្ធគុនចម្រុះខ្មែរបុរាណ ពានរង្វាន់សម្តេចធិបតី
-
ព័ត៌មានអន្ដរជាតិ២២ ម៉ោង ago
សង្គ្រាមលោកលើកទី៣លេចឡើងស្ទង់ៗ
-
ជីវិតកម្សាន្ដ២៤ ម៉ោង ago
តាមពិត Kan ផ្ទុករឿងអាស្រូវច្រើនសន្ធឹក ខណៈដែលមហាជនសម្រុកជីកកកាយឡើងវិញ